Bibeli Luayãtaalá Soũↄ 96

96

Dii mɛ́ Kía zↄ̃ↄ ũ

(1Lad 16.23-33)

1 À lɛ̀ dafu sí Diiɛ,

dṹnia gbɛ̃́pii, à lɛsi Diiɛ.

2 À lɛsi Diiɛ, í aà tↄbↄ,

àↄ aà zĩblea baokpa lá gu lɛ́ dↄ.

3 À aà gawi yã'o buiↄnɛ,

à aà yãbↄnsaɛↄ galikɛ gbɛ̃́piiɛ.

4 Dii zↄ̃ↄ, à kà wà aà táasilɛ,

à kà wà vĩakɛɛ̀ dɛ diiↄla píi.

5 Buipãleↄ diiↄá pↄ́ gianaↄnɛ,

Dii mɛ́ musu kɛ̀.

6 Zↄ̃ↄkɛ ń bɛɛɛo kuwà,

gbãa ń gawio ku aà kĩ́iɛ.

7 À gawi ń gbãao dↄ̃ Diiɛ,

bùsu píi gbɛ̃́ↄ, à dↄ̃ Diiɛ.

8 À Dii tↄ́ gawi dↄ̃ɛ̀,

à mↄ aà ua, í aà gba pↄ́.

9 À kúlɛ Diiɛ ń lousisi'ulaↄ daa,

zĩ́lɛdeↄ, à tó á mɛ àↄ kukɛ aà aɛ,

10 í o bui píiɛ, Dii mɛ́ lɛ́ kible.

À dṹnia kàlɛ gíũgiũ, a deea vĩo.

A yã́kpalɛkɛ ń gbɛ̃́piio a zɛ́wa.

11 Musudeↄ, à pↄnakɛ,

zĩ́lɛdeↄ, à vĩ àↄ kɛ̃aa,

ísia ń pↄ́ pↄ́ kúuↄ, à kↄ̃fĩkɛ.

12 Sɛ̃̀a ń pↄ́ pↄ́ kúuↄ, à kúkuakɛ,

lí pↄ́ kú lákpɛuↄ i gulakɛ píi.

13 Aa pↄnakɛ Dii aɛ, asa àlɛ mↄ́,

àlɛ mↄ́ yã́kpalɛkɛi ń dṹniaoɛ.

A yã́kpalɛkɛ ń dṹniao a zɛ́wa,

a yã́gↄ̃gↄ̃ gbɛ̃́ↄnɛ ń sĩanao.