Bibeli Luayãtaalá Soũↄ 98

Dii mↄa táasilɛa

1 À lɛ̀ dafu sí Diiɛ,

asa à yãbↄnsaɛↄ kɛ̀,

à zĩblè ń a gã̀sa pↄ́ a kua adoa gbãao.

2 Dii tò wa dↄ̃̀ a zĩblè,

à a gbɛ̃suabaa gbãa ↄ̀lↄ bui píiɛ.

3 Gbɛ̃kɛ ń náai pↄ́ a vĩ ń wá Isailiↄ dↄaàgu.

E dṹnia lɛ́wa wa è lá wá Lua zĩblè.

4 Dṹnia gbɛ̃́pii, à pↄna wii dↄ Diiwa,

à vĩ ń wiio, à gulakɛ à lɛ̀ sí.

5 À lɛsi Diiɛ ń mↄↄnlɛao,

ń mↄↄnlɛao ń lɛtɛ̃dↄawao

6 ń kã̀aepɛao ń kuu'ↄo,

à pↄna wii dↄ Dii wá Kíawa.

7 Ísia ń pↄ́ pↄ́ kúuↄ, à kↄ̃fĩkɛ,

ń tↄↄlɛo ń gbɛ̃́ pↄ́ kuwàↄ píi.

8 Swaↄ, à gã̀alɛ Dii aɛ.

Gbɛ̀sĩsĩↄ, à gulakɛ sãnusãnu,

9 asa àlɛ mↄ́ yã́kpalɛkɛi tↄↄlɛɛ.

A yã́kpalɛkɛ ń dṹniao a zɛ́wa,

a yã́gↄ̃gↄ̃ gbɛ̃́ↄnɛ ń sĩanao.