Bibeli Luayãtaalá Soũↄ 139

139

Dii yã́pii dↄ̃a

Davidi lɛ.

1 Dii, n ma tàasikà ń dↄ̃̀,

2 ń ma zↄ̃lɛa ń ma fɛlɛao dↄ̃.

Ń n zãkɛo ń yã́ pↄ́ málɛ yáↄ kũa.

3 Ni ma táa'oa ń ma wúlɛao gwa,

ma kɛkɛá píi dↄ́ɛkɛ̀nnↄ.

4 E yã́ àↄ gɛ́ bↄi ma lɛ́u,

Dii, ń dↄ̃ sã́asã.

5 Ń liaamazi kpɛ ń aɛo,

n ↄ kumala.

6 Dↄ̃a bee dɛmɛɛ dabuyã ũɛ,

a dɛmala, ma ↄ̃nↄ i kawào.

7 Má má gɛ́u mà pili n Nisĩnawai?

Má má bàalɛ tau, ńyↄ̃ↄ ku weo ni?

8 Tó ma fɛlɛ gɛ́ musu, ń kú we!

Tó ma tòo sↄ̀ miau, ń kɛ́!

9 Tó ma fɛlɛ gɛ ĩatɛ̃bilɛkĩi gukpɛ,

tó ma gɛ zↄ̃lɛ ísia baale bɛ'aɛ,

10 baa wekĩi má naa n ↄzĩɛ,

ńyↄ̃ↄ ma kũa n ↄplaauɛ.

11 Tó ma mɛ̀ gusia kumala,

ge gupua pↄ́ má kúu li gwã́ ũ,

12 gu líↄ sianɛo,*

gwã́ ìↄ puanɛ lán fãanɛwaɛ,

asa gupua ń gusiao doũ nɛɛ.

13 Ḿmɛ n ma sↄ̃ pɛ̀mɛɛ,

n ma ikàsa ma da nↄ̀sɛu.

14 Ma n sáaukɛ̀, n yãkɛa ì dia,

ma kɛa dɛ dabuyã ũ, à bↄ̀ ma saɛ,

a yã́ ma kũa gbãa.

15 Gↄↄ pↄ́ ma daalɛ nɛasakpɛ guu,

ma wáe ulɛanɛo.

Kɛ́ ma mɛ lɛ́ i asii guu we,

16 n wɛsìmalɛ nↄ'itɛ̃na ũ.

Lá n ma gↄↄ dìlɛ píi,

a lɛ́ kú n taalau

zadↄ̃ a kee i daalɛo.

17 Lua, n làasoo gbiamɛɛ maamaaɛ,

a naoa zↄ̃ↄ fá!

18 Tó má ye nao, an dasi dɛ ũfãaa.

Tó ma vu, miↄ kunnↄɛ e tia.

19 Lua, bↄ́ ńlɛ dã́ ń gbɛ̃vãiↄi?

À gomala gbɛ̃dɛnaↄ!

20 N ibɛɛↄ ì n yã'o ń nↄ̀sɛvãioɛ,

n tↄ́ gbia ń lɛ́uo.

21 Dii, má za n zangudeↄguo lé?

Má ye gbɛ̃́ pↄ́ fɛ̀lɛnnↄↄ gĩyãio.

22 Má zańgu vãivãi,

ma ń dílɛ ma ibɛɛↄ ũɛ.

23 Lua, ma gwagwa, ní ma nↄ̀sɛ dↄ̃,

ma tàasika, níↄ ma asiiↄ kũa.

24 Gwa tó má dↄ́ɛ'ĩi vĩ,

ní dↄaamɛɛ n zɛ́ gasai guu.

*139:12 Dan 2.22