4
Lua tò yã́ bↄ̀ ń Ablahaũo na a náai pↄ́ a kɛ̀ yã́i
1 Wá Yudaↄ, wá o kpelewa wá dezi káau Ablahaũ yã́ musu ni? 2 Tó Lua tò yã́ bↄ̀aànↄ na yã́ pↄ́ a kɛ̀ yã́iɛ, dↄ̃ à fↄ̃̀ ĩ́anadã̀. Ãma a fↄ̃ dã Luaɛo. 3 Kpelewa wa ò lá guui? Wà mɛ̀ Ablahaũ Lua náaikɛ̀, ↄ̃ Lua tò yã́ bↄ̀aànↄ na.* Daa 15.6, Gal 3.6 4 Fĩaboa zĩkɛnaɛá gbɛ̃kɛkɛaɛ̀ no, aà aseaɛ. 5 Baa tó gbɛ̃́ lɛ́ yãe kɛo, tó àlɛ Lua pↄ́ ì to yã́ bↄ ń tàaedeↄ na náaikɛ, Lua a to yã́ bↄaànↄ na a náai pↄ́ àlɛ kɛ yã́iɛ. 6 Davidi gbɛ̃́ pↄ́ Lua tò yã́ bↄ̀aànↄ na yãekɛsai báaa'ea yã'ò à mɛ̀:
7 Báaadeↄn gbɛ̃́ pↄ́ Lua ń tàaeↄ wòlomá à ń duuna kɛ̃̀máↄ ũ.
8 Báaaden gbɛ̃́ pↄ́ Dii a aà duuna yãdao ũ.† Soũ 32.1-2
9 Báaa beeá gbɛ̃́ pↄ́ tↄ̃zↄ̃̀ pↄ́ɛ adoa, ge gyafↄↄde pↄ́ɛ lↄ? Wà mɛ̀ Lua tò yã́ bↄ̀ ń Ablahaũo na, kɛ́ à a náaikɛ̀ yã́iɛ. 10 Kpelewa Ablahaũ dɛ gↄↄ pↄ́ Lua tò yã́ bↄ̀aànↄ nai? Aà tↄ̃zↄ̃aa ge gyafↄↄdeɛ? I tↄ̃zↄ̃o, gyafↄↄdeɛ. 11 Ɔ̃ à tↄ̃zↄ̃̀, kɛ́ Lua tò yã́ bↄ̀aànↄ na a gyafↄↄgↄↄ seela ũ.‡ Daa 17.10 Màa a dɛ gyafↄↄde pↄ́ Lua tò yã́ bↄ̀ńnↄ na Luapi náaikɛa yã́iↄ píi dezi ũ. 12 A dɛ gbɛ̃́ pↄ́ aa tↄ̃zↄ̃̀ↄ dezi ũ lↄɛ. I kɛ an tↄ̃zↄ̃a yã́i no, kɛ́ aa tɛ́ wá dezi Ablahaũ pↄ́ Lua náaikɛ̀ a gyafↄↄgↄↄ iai yã́iɛ.
Lá Ablahaũ Lua náaikɛ̀
13 Lua lɛgbɛ̃̀ Ablahaũɛ ń aà buiↄ à mɛ̀ dṹnia a gↄ̃ ń pↄ́ ũ.§ Daa 17.4-6, 22.17-18, Gal 3.29 I kɛ aà ikoyã kũa yã́i no, kɛ́ Lua tò yã́ bↄ̀aànↄ na a náai pↄ́ a kɛ̀ yã́iɛ. 14 Tó gbɛ̃́ pↄ́ aa ikoyã kũaↄ mɛ́ aa kible, dↄ̃ luanaaikɛa ài vĩo, mɛ́ Lua lɛgbɛ̃a kɛ̀ famaɛ,* Gal 3.18 15 asa ikoyã ì mↄ́ ń Lua pↄkũmaoɛ. Gu pↄ́ ikoyã kúuo, tàae líↄ ku we sↄ̃o. 16 Ayãmɛto pↄ́ pↄ́ Lua a lɛgbɛ̃̀ eaá aà náaikɛa yã́ɛ, kɛ́ àↄ dɛ aà gbɛ̃kɛyã ũ. Beewa lɛgbɛ̃apiá Ablahaũ buipiↄ píi pↄ́ɛ, i kɛ gbɛ̃́ pↄ́ aa Mↄizi ikoyã kũa ńtɛ̃ɛↄ no, ń gbɛ̃́ pↄ́ aalɛ Lua náaikɛ lán Ablahaũwaↄɛ lↄ. Ablahaũá wápii deziɛ.† Gal 3.7 17 A dɛ wá dezi ũ Lua kĩ́i, lá a kɛ̃a láuwa. Lua mɛ̀ a aà dìlɛ bui dasiↄ dezi ũ. Ablahaũ Lua pↄ́ ì wɛ̃ni kpa gɛↄwa ì to pↄ́ pↄ́ kú yãaoↄ àↄ ku‡ Daa 17.5 náaikɛ̀. 18 À Lua náaikɛ̀, à wɛdↄ̀ pↄ́ pↄ́ gbɛ̃e wɛ́ dↄiozi, ↄ̃ à gↄ̃̀ bui dasiↄ dezi ũ lá Lua òɛ̀wa à mɛ̀, aà buiↄ aaↄ dasi lán saanaↄwa.§ Daa 15.5 19 Ablahaũ kà wɛ̃̀ basↄo taawa. Baa tó à làasookɛ̀ a gↄ̃ɛkɛbↄsaiwa ń Sala nɛasakpɛ kákaao, aà luanaaikɛa lí busao.* Daa 17.17 20 Ìli seakɛ lɛ́ pↄ́ Lua gbɛ̃̀ɛwao, i gí Lua náaikɛio, ↄ̃ à gbãa'è a luanaaikɛawa à Lua tↄbↄ̀, 21 asa a dↄ̃ a fɛ̃a vĩo, Lua gbãa kà à lɛ́ pↄ́ á gbɛ̃̀pi kɛ. 22 Ayãmɛto Lua tò yã́ bↄ̀aànↄ na. 23 Wi yã́ bↄaaànↄ napi kɛ̃ aà yã́i adoo, 24 wa kɛ̃̀ wá gbɛ̃́ pↄ́ Lua a to yã́ bↄwanↄ naↄ yã́iɛ lↄ, wá gbɛ̃́ pↄ́ wálɛ Lua pↄ́ wá Dii Yesu bↄ̀ gau náaikɛↄ. 25 Lua aà kpàmá kɛ́ à e wá tàaeↄ kɛ̃́wá yã́iɛ,† Isa 53.4-5 ↄ̃ à aà bↄ̀ gau, kɛ́ yã́ e bↄwanↄ na yã́i.