Bibeli Luayãtaalá Salomↄↄ lɛ 5

5

Kía

1 Ma gɛ̃ ma kaau, ma nↄkpama báasɛ̃de,

ma a zↄ̃go lí'ↄ gò ń pↄ́ gĩnanaↄ,

ma a zↄsapuna blè ń a ío,

ma a vɛ̃ɛ mì ń ma vĩo.

Yelusalɛũ nɛnↄnaↄ

À pↄble gbɛ̃́ↄ,

à imi à kã́ á bↄ̃̀nↄblenaↄ.

Nↄɛ

2 Málɛ i'o, ãma ma làasoo bɛ̃́ɛ,

ma yenzide ma, àlɛ gbalɛ.

Kía

Gba wɛ̃mɛɛ ma gbɛ̃na báasɛ̃de,

ma felen sãasaide!

Fíi kpà ma miwa,

gwãasĩna mↄ̀sɛ ma mikã nìni.

Nↄɛ

3 Ma a ula bↄ̀, mí ɛa mà da lↄa?

Ma gbá pìpi, i ɛa gbãsĩkpa lↄa?

4 Ma yenzide ↄgɛ̃̀ gbà fòou,

ↄ̃ ma mɛ lɛ́ kɛ fèfe.

5 Ma fɛlɛ gɛ gbawɛ̃i ma yenzideɛ,

ma ↄ lɛ́ yↄyↄ ń zↄ̃go lí'ↄ tulaleo,

zↄ̃go lípi nísi lɛ́ bàalɛ ma ↄnɛↄwa,

à fĩ̀ gbatabↄwa.

6 Ma gbawɛ̃̀ ma yenzideɛ,

ãma à gɛ̃̀zɛa à tà kↄ̀.

Kɛ́ àlɛ yã'o, aà ni ma kũ.

Ma aà wɛ̀ɛlɛ, mi aà eo,

ma lɛzùzuaàzi, i weao.

7 Gudↄ̃anaↄ bↄ̀a,

kɛ́ aalɛ bɛbɛ wɛ̃́lɛ guu.

Aa ma gbɛ̃ aa ma wiwi,

bĩ́idↄ̃anapiↄ ma pↄlↄgãu wòlomala.

8 Yelusalɛũ nɛnↄnaↄ,

tó a ma yenzide è,

á oɛ̀ kpelewa ni?

Ma naɛ́ Luazi à oɛ̀mɛɛ,

ma yeaaàzi ma mɛ bùsa.

Yelusalɛũ nɛnↄnaↄ

9 Bↄ́ n yenzide dɛò dãↄlai?

N gbɛ̃́ pↄ́ ń kɛfɛũ dɛ nↄɛↄla píi,

bↄ́ n yenzide dɛò dãↄla

ↄ̃ n gbasa n nawɛ̃ɛ Luazi màai?

Nↄɛ

10 Ma yenzide tɛ̃a pípia,

gbɛ̃ↄn ↄ̀aasↄsↄo lɛɛ kwiↄ guu ↄ̃mɛ vua ũ.

11 Aà miá vua tɛ̃ɛtɛ̃ɛɛ,

aà mikã dɛ sí plɛ̀ɛɛ

lán gbagbaa kã́wa.

12 Aà wɛ́ dɛ lán felen pɛ́lɛa íuwa,

aà wɛ́pi pípia ń vĩo, mɛ́ a sàlala.

13 Aà gɛɛ dɛ lán pↄ́ gĩnanaↄ buawa,

a gĩdↄ nanannↄ.

Aà lɛ́baa dɛ lán lávuwa,

àlɛ yↄyↄ ń zↄ̃go lí nísio.

14 Aà ↄ dɛ lán vua lipↄ̃ↄↄ pↄ́ diamaa dadauwa,

aà gbɛɛ dɛ lán wesa swaa yↄↄa pↄ́ wà safii gbɛ pɛ̀pɛwawa.

15 Aà gbáↄ dɛ lán gbɛ̀pɛlɛ bɛɛɛde

pↄ́ wà a zɛbↄ pì ń vuaowa.

À bↄ̀ lán Libã bùsuwa,

aà zɛa maa lán sɛdɛ líwa.

16 Aà lɛ́á zↄ́ɛ,

aà gupii kɛfɛũ.

Yelusalɛũ nɛnↄnaↄ,

lá ma gbɛ̃na yenzide dɛn we.