Luda yã takada kↄ̃n Bokobaru yão LAASUUDEE 3

Yã píngi kↄ̃n a gurↄↄomɛ

1 Yã píngi kↄ̃n a gurↄↄomɛ,

bↄkↄ̃tɛ píngi kↄ̃n a kɛgurↄↄo.

2 Nɛ́'igurↄↄ kuu, gagurↄↄ kuu,

pↄ́tↄ̃gurↄↄ kuu, à wurɛgurↄↄ kuu.

3 Dɛgurↄↄ kuu, gbana aafia gurↄↄ kuu,

gborogurↄↄ kuu, à dↄgurↄↄ kuu.

4 Ɔ́ↄdↄgurↄↄ kuu, yáadↄgurↄↄ kuu,

sósobikɛgurↄↄ kuu, kↄ̃kↄ̃'ogurↄↄ kuu.

5 Gbɛ̀fãakↄ̃ana gurↄↄ kuu, gbɛ̀kakↄ̃ana gurↄↄ kuu,

bↄ̃̀ndagagurↄↄ kuu, à kɛ̃na gurↄↄ kuu.

6 Pↄ́wɛtɛgurↄↄ kuu, à ↄkpazina gurↄↄ kuu,

pↄ́kũna gurↄↄ kuu, à gbarɛna gurↄↄ kuu.

7 Pↄ́gaakɛ̃gurↄↄ kuu, à nabigurↄↄ kuu,

lɛ́kũna gurↄↄ kuu, yã'ona gurↄↄ kuu.

8 Yenzi gurↄↄ kuu, zangu gurↄↄ kuu,

zĩ̀kagurↄↄ kuu, kaɛna aafia gurↄↄ kuu.

9 Bↄ́ àren zĩkɛri è e nawɛ̃a kɛ̀ à kɛ̀a? 10 Ma zĩi kɛ̀ Ludaa dà gbɛ̃nteenↄnɛ aↄ̃ kɛɛ è. 11 Ludaa tò pↄ́ píngi maa a gurↄↄa. À kuuna gurↄ píngi laasuu dà gbɛ̃ntee swɛ̃̀n dↄ, baa kↄ̃n beeeo eé fↄ̃ à yã kɛ̀ Luda e kɛɛ zaa anduna daɛna ai à mìdɛnaa gbá dↄ̃ro. 12 Má dↄ̃ kɛ̀ pↄ́kee maa kↄ̃n gbɛ̃nteeo dɛ kuuna pↄnnaa guu kↄ̃n maakɛnao à wɛ̃̀ndi lɛ́nlaro. 13 Tó gbɛ̃ e pↄ́ blee èe í mii èe a zĩ píngi sáabu kpaa, Luda bé à à gbà. 14 Má dↄ̃ kɛ̀ yã kɛ̀ Luda è kɛɛ égↄ̃ kuu gurↄ píngimɛ. Weé fↄ̃ wà pↄ́ke kaaranlo, weé fↄ̃ wà pↄ́ke lagonlo. Ludaa kɛ̀ lɛ, lɛ wàgↄ̃ a vĩa vĩ yãnzimɛ. 15 Pↄ́ kɛ̀ kuu tia gĩakɛ à kuu zaa zi kↄ̀. Pↄ́ kɛ̀ eégↄ̃ kuu zia kuu yã kↄ̀. Luda è yã kɛ̀ wà kɛ̀ yãanↄ gbɛ̀ sísi.

16 Ma yã è anduna guu dↄ,

guu kɛ̀ dɛ yãzɛdee gↄ̃ kún,

yãzɛsaidee bé à kú gwe,

guu kɛ̀ dɛ yã maaa gↄ̃ kún sↄ̃,

yã zaaa bé à kú gwe.

17 Ma bè ma swɛ̃̀ guu,

Luda é yãkpaɛ kɛ kↄ̃n gbɛ̃ maaanↄ

kↄ̃n gbɛ̃ zaaanↄ ń píngi,

zaakɛ yãkɛna píngi kↄ̃n a gurↄↄomɛ,

bↄkↄ̃tɛ píngi kↄ̃n a kɛgurↄↄo.

18 Ma bè ma swɛ̃̀ guu dↄ, gbɛ̃nteenↄ sↄ̃, Luda è ń yã wɛ́ɛ wɛ̃ńnɛ lɛ aↄ̃ↄ dↄ̃ ń zĩndaa kɛ̀ wà dɛ lán nↄ̀bↄnↄ bàmɛ. 19 Baa zaa zi gbɛ̃nteenↄ kↄ̃n nↄ̀bↄnↄ, góro dↄ̃nkↄ̃ bé èe ń bikũu. Lán nↄ̀bↄ è ga nà lɛn gbɛ̃ntee è ga lɛ se, aↄ̃ wesabona dↄ̃nkↄ̃mɛ. Gbɛ̃ntee dɛ nↄ̀bↄlaro, zaakɛ à píngi pãmɛ. 20 Aↄ̃ píngi è gá gu dↄ̃nkↄ̃mmɛ, zaakɛ aↄ̃ píngi bↄ̀ bùsuti guumɛ, aↄ̃ píngi é ɛara à gↄ̃ bùsuti ũmɛ. 21 Tó gbɛ̃ntee ninii è tá musu, nↄ̀bↄ pↄ́ sↄ̃ è tá gĩzĩmɛ, dé bé à dↄ̃ↄ? 22 À yã bé à tò má è yãkee maa kↄ̃n gbɛ̃nteeo dɛ à a zĩ sáabu kpálaro, zaakɛ à bakan gwe. Dé bé eé tó à dↄ̃ yã kɛ̀ eé kɛ à gbɛraa?