Luda yã takada kↄ̃n Bokobaru yão LAASUUDEE 6

1 Ma nↄ̀sɛyakayã è anduna guu dↄ kɛ̀ ↄ tↄ̃̀ gbɛ̃nteenↄa. 2 Luda gbɛ̃ kà ↄↄdaaa à à gbà auziki kↄ̃n bɛ̀ɛo, à pↄ́ kɛ̀ dɛ àgↄ̃ à nii dɛɛ píngi vĩ, ben Ludaa e à gba zɛ́ à aufãni kɛ̀oro, gbɛ̃ pãnde bé à gↄ̃̀ vĩ. Beee nɛ́ yã pãamɛ, nↄ̀sɛyakayã pãsĩmɛ dↄ.

3 Tó gbɛ̃ nɛ́ ì mɛ̀n basↄↄro, ben à zi kũ̀ kótokoto, baa kↄ̃n à gìkɛnao, tó èe pↄnnaa kɛoro, tó à gà, tó à vĩina kpedanaro, ma bè nɛ́ kɛ̀ wà ì gɛ̀ ũu sã̀ↄ dɛàla. 4 Zaakɛ nɛ́ pì mↄ̀ pãmɛ, ben à tà gusiaan, à tↄ́ gↄ̃̀ gusiaan. 5 Baa kɛ̀ èe ↄfãntɛ̃ ero bensↄ̃ à yãke dↄ̃ro, à mɛ̀ kpaɛna dɛ auzikidee pìla. 6 À dɛ gbɛ̃ kɛ̀ kuu wɛ̃̀ bↄrↄ plaa pↄnnakɛsaila. Aↄ̃è gá gu dↄ̃nkↄ̃ ń pínginloo?

7 Gbɛ̃ntee ísimma kɛ̀ à gà èe kpaa,

lɛ à pↄ́ e à da lɛ́n yãnzimɛ,

mↄde à gbɛɛɛ è kãro.

8 Bↄ́n ↄ̃ndↄ̃dee dɛo yↄ̃nkↄↄlaa?

Bↄ́ àren yãkɛna a zɛ́a è i takaasideenɛ?

9 Pↄnnakɛna kↄ̃n pↄ́ kɛ̀ ń vĩio

maa dɛ à pãnde nidɛnala.

Beee nɛ́ yã pãamɛ dↄ, pɛna gukoriamɛ.

10 Pↄ́ kɛ̀ kɛ̀ yã tↄ́ vĩ kↄ̀,

pↄ́ kɛ̀ gbɛ̃ntee dɛ à ũ sↄ̃, wà dↄ̃ kↄ̀.

Gbɛ̃ntee é fↄ̃ à lɛokpakↄ̃a kɛ

kↄ̃n gbɛ̃ kɛ̀ à gbãaa dɛalaaoro.

11 Yãbↄɛna parii è yã yaka.

Bↄ́ àren beee vĩ gbɛ̃nɛ?

12 Dé bé à dↄ̃ pↄ́ kɛ̀ maa kↄ̃n gbɛ̃nteeo à wɛ̃̀ndi kori zaka kɛ̀ è gɛ̃tɛ lán ↄra bà guuu? Dé bé eé fↄ̃ à yã kɛ̀ eé kɛ à kpɛɛ anduna guu onɛ?