22
Wiipɛna Ludazi
Dauda lɛ̀.
1 Ma Luda, ma Luda,
à kɛ̀ dia n ma ton-ee?
Ma wii pɛ̀,
à kɛ̀ dia nɛ́ɛ mↄ́ ma mì síroo?
2 Ma Luda,
ma lɛ́ zùnzi fãantɛ̃, mↄde nɛ́ɛ wemalaro,
ma wii pɛ̀nzi gwãavĩ dↄ, mɛ́ɛ yĩtɛro.
3 Ń kú adona ń vɛ̃ɛna kpatan,
mmↄn kɛ̀ Isarailinↄ è n sáabu kpá.
4 Ḿbe wa dezinↄ n náanɛ kɛ̀,
aↄ̃ n náanɛ kɛ̀, ben n ń mì sì.
5 Aↄ̃ lɛ́ zùnzi, ben aↄ̃ bↄkii è,
aↄ̃ n náanɛ kɛ̀, ben wí e ń kũro.
6 Kↄ̀kↄ nɛ́ngon ma ũ, gbɛ̃nteen ma ũro,
wèe ma sↄ̃sↄ̃ↄ, wèe kya kaamagu.
7 Gbɛ̃ kɛ̀ aↄ̃ↄe ma gwaanↄↄ e ma faboo,
aↄ̃ↄe lɛ́zukii kɛɛma,
aↄ̃ↄe ń mì kɛɛ degũdegũ wèe bee:
8 Lán èe Dii náanɛ kɛɛ nà, ɛ̃ndɛ̃ à à mì sí,
tó à yã kànɛmɛ, à à mì sí.
9 Ḿbe n ma bↄ ma da gbɛɛɛn,
n ma gwa aafia ma yↄ̃migurↄ.
10 Má na n ↄzĩ zaa nɛ́'isↄmmɛ,
ma Ludan n ũ zaalɛ má kú ma da gbɛɛɛn.
11 Ǹtongↄ̃ kúmao zã̀ro,
zaakɛ wahaa kĩi kũ̀mao,
gbɛ̃kee kuu à dↄmalɛro.
12 Wà ligamazi paripari lán zùswareenↄ bà,
wà ma kagura kɛ̀ lán Basã bùsu zùsware gbãaanↄ bà.
13 Wèe lɛ́ aɛɛmazi lán músu ↄ́ↄdↄri
kɛ̀ aↄ̃ↄe pↄ́ kɛɛ gyáigyainↄ bà.
14 Ma gbãaa yã̀a lán í kwɛɛna bà,
ma gupɛkiinↄ bↄ̀kũn píngi,
ma mɛ̀ yↄ̀ lán zↄ́sa bà.
15 Ma kòto gàga lán pɛ̃ɛ korii bà,
ma nɛ́nɛ nà ma lɛ́ musu,
wà ma daɛ lán gɛ̀ bà bùsutin.
16 Lɛwannↄ gãli liganamazi,
gbɛ̃ zaaa pìnↄ nànakↄ̃rɛma,
aↄ̃ ma ↄↄnↄ kↄ̃n ma gbánↄ zↄ̃̀zↄ̃.
17 Mɛ́ fↄ̃ mà a wánↄ naro píngi,
wà wɛ́ɛ bìibiia, wèe ma gwaa.
18 Aↄ̃ ma pↄ́kãsãanↄ kpàatɛtɛkↄ̃nɛ,
aↄ̃ kàbankpɛ kɛ̀ ma uta yã musu.
19 Dii, ǹtongↄ̃ kúmao zã̀ro,
ḿbe ma gbãaa ũ,
ǹ mↄ́ ǹ dↄmalɛ kpakpaa.
20 Ǹ ma bↄ aↄ̃ fɛ̃ɛdaa lɛ́zĩ,
ǹ ma wɛ̃̀ndi sí lɛwan pìnↄa.
21 Ǹ ma bↄ músu pìnↄ lɛ́zĩ,
ǹ ma si zùsɛ̃tɛ pìnↄ kobaa.
22 Mɛ́ n tↄ́ bↄ ma gbɛ̃nↄ tɛ́,
mɛ́ n sáabu kpá kakↄ̃ana guu.
23 A Dii vĩakɛrinↄ, à à sáabu kpá,
a Yakubu boriinↄ, à à tↄ́ bↄ,
a Isarailinↄ, à mì siɛnɛ.
24 Zaakɛ èe kya ká takaasideenlo,
èe à wɛ̃ndakɛɛ faboro,
èe mìkpɛɛ zunɛro,
à swã kpà à wiipɛnazi.
25 Mɛ́ n sáabu kpá pari kakↄ̃ana guu,
mɛ́ lù kɛ̀ má sɛ̀nnɛ papa n vĩakɛrinↄ aɛzĩ.
26 Takaasideenↄ é pↄ́ ble wà kã,
Dii kii wɛ̀tɛrinↄ é à sáabu kpá,
aↄ̃égↄ̃ kú wɛ̃̀ndio gurↄ píngi.
27 Andunalɛzɛkideenↄ égↄ̃ Dii dↄ̃ aↄ̃ aɛ dↄa,
borii kɛ̀ aↄ̃ↄ kuunↄ é kúɛnɛ ń píngi,
28 zaakɛ kíblena nɛ́ Dii pↄ́mɛ,
è kí ble bori píngia.
29 Anduna auzikideenↄ é dↄnzi kɛnɛ ń píngi
kↄ̃n gbɛ̃ kɛ̀ aↄ̃ↄ kú gaa lɛ́zĩnↄ,
gbɛ̃ kɛ̀ aↄ̃ gàa gákiianↄ é mì siɛnɛ ń píngi.
30 Zia gbɛ̃nↄ é dↄzi,
aↄ̃é Dii yã tↄ̃kɛ̃ gbɛ̃ kɛ̀ aↄ̃é suunↄnɛ,
31 Aↄ̃é mìsina yã o gbɛ̃ kɛ̀ wèe ń i kↄ̀roonↄnɛ
zaakɛ à gĩakɛ à kɛ̀.