31
Zĩndakpana Diia
Dauda lɛ̀.
1 Dii, ḿbe ma nanzi,
ǹton tó wí ma kũ zikiro.
Ǹ ma mì sí n maakɛna yãnzi,
2 Ǹ swã kpámazi, ǹ ma faaba kɛ kpakpaa,
ǹ gↄ̃ ma utɛki gbɛ̀ ũ,
zɛki gbãaa kɛ̀ eé ma faaba kɛɛ ũ.
3 Ma gbɛ̀si kↄ̃n ma zɛki gbãaaon n ũ,
ǹ dↄmɛ aɛ ǹ ma da zɛ́a n tↄ́ yãnzi.
4 Ǹton tó mà si bà kɛ̀ wà kpàkpamɛɛnlo,
zaakɛ ma mìsirin n ũ.
5 Ma a ninii nànnɛ n ↄzĩ,
ǹ ma mì sí Dii Luda yãpurade.
6 Ma za gbɛ̃ kɛ̀ aↄ̃è na tãanↄan,
Diin má náanɛ kɛ̀.
7 Mɛ́ yáa dↄ mà pↄnnaa kɛ kↄ̃n n yenzio,
zaakɛ n ma yã'ↄ̃amma è,
n ma nawɛ̃akɛna dↄ̃̀mɛ.
8 Nɛ́ɛ ma na ma ibɛɛnↄnɛ ń ↄzĩro,
n ma gba mɛ̀porokii.
9 Ǹ ma wɛ̃nda gwa Dii,
zaakɛ má kagurakɛnamɛ,
pↄsiaa tò ma wɛ́ɛ gↄ̃̀ súkusuku,
ma pↄↄ sia kũ̀ ma nↄ̀sɛ yàka.
10 Pↄsiaa e ma wɛ̃̀ndi lagoo,
m̀bna e ma wɛ̃̀ yãaa,
laasuu tò má gbãaa vĩ dↄro,
ma wánↄ bùsa.
11 Ma gbɛ̃daaanↄ è kya kámagu ma ibɛɛnↄ yãnzi,
ma yã è ma gbɛ̃nↄ vĩa kũ maamaa,
gbɛ̃ kɛ̀ weè dakↄ̃rɛ gãalɛnↄ è pãmɛ.
12 Ma yã e dↄ gbɛ̃ken dↄro,
ma gↄ̃ lán gɛ̀ bà,
ma gↄ̃ńnɛ lán oo kãndo bà.
13 Mɛɛ̀ ma kɛ̀ gbɛ̃nↄↄ e ma pee pari,
vĩapↄnↄↄ ligamazi.
Aↄ̃è kakↄ̃a wà lɛ́ kpákↄ̃sↄ̃mazi,
aↄ̃è lɛdolɛ kɛ ma wɛ̃̀ndibↄna yãnzi.
14 Mↄde ḿbe ma n náanɛ kɛ̀ Dii,
mɛɛ̀ be ma Ludan n ũ.
15 Ma wɛ̃̀ndi ègↄ̃ kú n ↄzĩ gurↄ píngimɛ,
ǹ ma sí ma ibɛɛ kɛ̀ aↄ̃ↄe ma wɛtɛɛ
wà ma dɛɛnↄ ↄzĩ.
16 Ǹ uu were mamↄma n zↄ̀bleria,
ǹ ma mì sí n yenzi guu.
17 Dii, ǹton tó wí ma kũro,
zaakɛ ma wii pɛ̀nzi.
Ǹ tó wí zaakɛrinↄ kũ,
ǹ tó aↄ̃ lɛ́ gↄ̃ nakↄ̃ana gɛ̀wãan,
18 ǹ tó ɛgɛtori pìnↄ nɛ́nɛ naɛ.
Aↄ̃è dↄkɛ kↄ̃n gbɛ̃ maaanↄ,
aↄ̃è kya káńgu kↄ̃n ĩadãnao.
19 Auziki kɛ̀ ń kàkↄ̃a n vĩakɛrinↄnɛ bíta,
nɛɛ̀ aubarika da gbɛ̃ kɛ̀ aↄ̃ↄ nanziinↄn gbɛ̃ píngi wáa.
20 Tó gbɛ̃nↄ lɛ́ kpàkↄ̃sↄ̃ńzi, nɛɛ̀ ń utɛ n kuu,
tó wèe lɛokpakↄ̃a kɛɛńyo, nɛɛ̀ ń dãkpa n kukiia.
21 Aubarikadeen Dii ũ,
zaakɛ à yenzi bíta ↄ̀dↄamɛ
wɛ́tɛ kɛ̀ wà lìgazi guu.
22 Swɛ̃̀ kɛ̃̀magu gwe,
ben ma bè, wà n kii zɛ́ zↄ̃̀mɛ.
Kɛ̀ ma faaba lɛ́ zùnzi,
n ma wɛ̃nda wiipɛna mà.
23 Àgↄ̃ ye Diizi, amↄa a gbɛ̃nↄ.
Dii è a náanɛkɛrinↄ dãkpa,
è fĩa bo ĩadãrinↄnɛ pãsĩpãsĩ.
24 Amↄa kɛ̀ a wɛ́ɛ dↄ Diizinↄ,
àgↄ̃ gbãa à a swɛ̃̀ kpáɛ.