1 Ma wɛ́ɛ dↄ̀ Diizi maamaa,

ben à aɛ dↄ̀ma à ma wiipɛna mà.

2 À ma bↄ kokotɛ̃wɛɛn,

à ma bↄ foo guu.

À ma gbá pɛ̀ɛ gbɛ̀si musu,

à ma zɛ gwe gíngin.

3 À lɛ̀ dufu dàmɛ ma lɛ́n,

wa Luda sáabukpana pↄ́ ũ.

Gbɛ̃nↄ é e pari, vĩa é ń kũ,

aↄ̃é Dii náanɛ kɛ.

4 Aubarikadeen gbɛ̃ kɛ̀ Dii náanɛ vĩi ũ,

bensↄ̃ è aɛ dↄ ĩadãrinↄ kↄ̃n tãagbãgbãrinↄaro.

5 Dii ma Luda, n yãbↄnsaɛkɛnanↄↄ pari,

weé fↄ̃ wà yã kɛ̀ nɛ́ɛ pɛɛawee dↄdↄro.

Tó mɛ́ɛ tↄ̃kɛ̃ɛnnɛ, à lɛ́ vĩro,

mɛ́ fↄ̃ mà o píngiro.

6 Ń ye sa'opↄ ke gbaaziro,

ben n ma gba swã mà yã mao.

Nɛ́ɛ sa'opↄ kɛ̀ wè ká tɛ́n à tɛ́ kũ

ke durun agbaakpabↄ gbekaro.

7 Ben ma bè: Maɛ kɛ̀,

ma mↄ lán wà kɛ̃̀ takadan ma yã musu nà.

8 Má ye n pↄyezi kɛmɛ, ma Luda,

n doka kú ma swɛ̃̀ guu.

9 Mɛ́ yãzɛdee baaru kpá pari kakↄ̃ana guu,

mɛ́ ma lɛ́ nakↄ̃aro, lán ń dↄ̃ nà Dii.

10 Mɛ́ɛ n yãzɛdee utɛńnɛro,

ma n náanɛ kↄ̃n n mìsinao yã ò.

Mɛ́ɛ gí n yenzi kↄ̃n n yãpuraao o

pari kakↄ̃ana guuziro.

11 Dii, ǹton gí ma wɛ̃nda gwaziro,

n yenzi kↄ̃n n yãpuraao gↄ̃ ma dãkpaa.

12 Zaakɛ yã zaaa kɛ̀ liganamazi lɛ́ vĩro,

ma taarinↄ dàmala, mɛ́ɛ guu eero,

à pari dɛ ma mìkãla, swɛ̃̀ kɛ̃̀magu.

13 Dii, ǹ sùu kɛ ǹ ma mì sí,

Dii, ǹ kɛ kpakpaa ǹ mↄ́ ǹ dↄmalɛ.

14 Ǹ tó wí gbɛ̃ kɛ̀ aↄ̃ↄe ma wɛɛ wà ma dɛɛnↄ kũ,

aↄ̃ ń mì pɛ́ɛ.

Ǹ tó gbɛ̃ kɛ̀ aↄ̃ↄ yezi mà mↄ́nzi eenↄ kpɛɛ li,

aↄ̃ uu yãkↄ̃tɛ.

15 Gbɛ̃ kɛ̀ aↄ̃è bemɛ taalɛ taalɛɛnↄ,

ǹ tó wí ń kũ aↄ̃ kɛ gìri.

16 Gbɛ̃ kɛ̀ aↄ̃ↄe n kii wɛtɛɛnↄ,

ǹ tó aↄ̃ pↄↄ kɛmma nna aↄ̃ yáa dↄ.

Gbɛ̃ kɛ̀ aↄ̃ↄ ye n mìsinazinↄ

gↄ̃ bee Dii bíta.

17 Takaaside wɛ̃ndadeen ma ũ,

ǹ laasuu lɛ́ ma yãzi, Dii.

Ḿbe ma dↄnlɛri ũ kↄ̃n ma mìsirio,

ma Luda, ǹton gì kɛro.