Luda yã takada kↄ̃n Bokobaru yão ZIA YÃ 8

Kãɛ'ↄ swɛɛplaade gona

1 Kɛ̀ Sãnɛ Bↄ̀rↄ kãɛ'ↄ swɛɛplaadee gò, ludambɛɛ kɛ̀ kítikiti lán minti baaakuri taka bà. 2 Ben ma malaika gↄ̃ↄn swɛɛplaaa kɛ̀ aↄ̃ègↄ̃ zɛzɛna Luda aɛnↄ è, wà kãkãki kpàḿma mɛ̀n swɛɛplaa.

3 Ben malaika pãnde mↄ̀ à zɛ̀ tuaetitikpatakii kɛ̀ wà pì kↄ̃n vurao saɛ, à tɛ́sibↄ kɛ̀ wà pì kↄ̃n vurao kũna. Wà tuaetiti kpàa bítabita, lɛ à kakↄ̃a kↄ̃n Luda gbɛ̃nↄ píngi aduakɛnanↄ à kpata, ben à kpàta kíblekita aɛ tuaetitikpatakii pìa. 4 Ben tuaetiti tɛ́sukpɛ kↄ̃n Luda gbɛ̃nↄ aduakɛnanↄo fɛ̀ɛ malaika ↄzĩ Luda aɛ. 5 Ben malaika pì tɛ́sibↄ sɛ̀, à tɛ́ sìo tuaetitikpatakiia à pà, ben à zù tↄↄtɛ. Lou e vĩi, èe pũtãa èe pii, ben tↄↄtɛ nìgãnigã.

Kãkãki mɛ̀n swɛɛplaaanↄ pɛna

6 Malaika gↄ̃ↄn swɛɛplaaa kɛ̀ aↄ̃ↄ kãkãki mɛ̀n swɛɛplaa kũna pìnↄ à pɛna soru kɛ̀. 7 À káakudee a kãkãki pɛ̀, ben wà lougbɛ kↄ̃n tɛ́o kakↄ̃ana kↄ̃n aruo kù tↄↄtɛa. Tↄↄtɛ lɛo aagↄ̃dee tɛ́ kũ̀, línↄ lɛo aagↄ̃dee tɛ́ kũ̀, sɛ̃̀ ísi tɛ́ kũ̀ míↄmiↄ.

8 Malaika plaadee a kãkãki pɛ̀, ben pↄ́ tɛ́dee bↄ̀ à sì ísiaan lán kpii bíta bà. Ísia lɛo aagↄ̃dee lì aru ũ, 9 ben ísia pↄ́ bɛ̃ɛnↄ lɛo aagↄ̃dee gàga, góro'itɛnↄ lɛo aagↄ̃dee yàka.

10 Malaika aagↄ̃dee a kãkãki pɛ̀, ben sↄsↄnɛ bíta kɛ̀ èe tɛ́ kũu lán sɛ̃̀tɛ bà bↄ̀ ludambɛ à lɛ̀ɛ à dà swaanↄ kↄ̃n bianↄ lɛo aagↄ̃deela. 11 Sↄsↄnɛ pì tↄ́n Sɛwɛɛ. Í lɛo aagↄ̃dee lì sɛwɛɛ ũ, ben gbɛ̃ kɛ̀ aↄ̃ í pì mìnↄ gàga pari à kyã̀kyã yãnzi.

12 Malaika siigↄ̃dee a kãkãki pɛ̀, ben wà ↄfãntɛ̃ lɛo aagↄ̃dee lɛ̀ kↄ̃n mↄvura lɛo aagↄ̃deeo kↄ̃n sↄsↄnɛnↄ lɛo aagↄ̃deeo, lɛ aↄ̃ lɛo aagↄ̃de sia kũ yãnzi. Ben fãantɛ̃ lɛo aagↄ̃dee gↄ̃̀ gupuraa sai, lɛn à dɛ lɛ gwãavĩ dↄ. 13 Ben ma kúu è èe vĩaa musumusu. Má mà à wii gbãaa lɛ̀ à bè: Wãiyoo, wãiyoo, wãiyoo gbɛ̃ kɛ̀ aↄ̃ↄ kú tↄↄtɛnↄ malaika gↄ̃ↄn aagↄ̃ↄ kɛ̀ aↄ̃ gↄ̃̀ pìnↄ kãkãki'ↄ kɛ̀ eé bↄ yãnzi.