33
E Moses i Gamai a Maka Kabu ne Israel
1 E Moses ra bakovi i vakalongo a nitana Vure, a parava vona ni mate i valai tabukoi, lakea i gamai e huriki a Israel, 2 i taki ria i ta maea,
“E BAKOVI DAGI i made na lolo e Sinai,
i valai i bele manga a haro na robo e Idom.
A parana na lolo e Paran i parai e huriki a tara vona.
A agelo i ravulu e rangale (1,000) ri made turana.
A kanono dagi i hube na limana a kanena.
3 A Vure i ngaru hateka e huriki a tara vona,
re huriki ri malamala i matakari ria.
Ri turume ri lolu puru na matana, ri ramai a maka vinara vona.
4 Iau e Moses a habi ne mua a maka vinara nga mu gu ramai.
Ra vinara nga a nita muholi hateka ne hita e huriki a hamone Iakop.
5 E BAKOVI DAGI ia a hariki ne Iesurun.* A pelegona e Iesurun a viri malamala, re Israel.
Na tahuna a maka kabu ne Israel turane huriki a gare ne ria
ri vapopo, i matakari ria.”
6 E Moses i gamai a kabu ne Reuben i ta maea,
“A kabu ne Reuben i kiroko, pali ra kabu iea i uka ma ge lobo.”
7 I taki a kabu ne Iuda i ta maea,
“O BAKOVI DAGI o luhoi e huriki a Iuda ri nana ioe go tuhori ria.
O bole valai ria ri gi dili turane huriki a tara ranga.
O tuhori ria, ri vaubi ne huriki a pile.”
8 * Nim 17:7; 28:30; Gi 20:13I taki a kabu ne Levi i ta maea,
“BAKOVI DAGI, o habi na kabu ne Levi, re huriki a vora kamumu vomu,
a kedo e Tumim e Urim, ra kedo nga ru vakasiri a ningaru vomu ne ria.
O toni ria na tanga e Masa, na naru e Meriba.
9 Ri tora hateka ni ramai a nitamu a ngava dagi vomu.
I uka ma ri ramai a ningaru ne tamane ria, ne turane ria, ne tune ria.
Ri ramai kunana a ningaru vomu.
10 Ri gi tovo e huriki a Israel ri gi ramai a vinara vomu.
Ri gi rungani a havu mangisipa na matamu,
ri gi rata a nihabi gutu-vuro na dede vomu.
11 BAKOVI DAGI, o kori e huriki na kabu ne Levi ri gi pesi tora,
bara o vivi vona a leho ri rata.
O pahadanu e huriki a pile ne ria
i uka ma ri gi pesi rike tabu.”
12 I taki a kabu ne Bensamin i ta maea,
“BAKOVI DAGI o gamai e huriki na kabu ne Bensamin o made tabukoi ne ria,
o matakari kamumu ria na parava vakaroro.”
13 I taki a kabu ne Iosep i ta maea,
“BAKOVI DAGI, o habi a simuru na hunu,
a naru na malala na kabu ne Iosep,
ge vakabele a naru ge kupo na tabeke vona.
14 Ge ratea a haro i para langa na hania ne ria,
ge rata a maka uve ri gi koru kamumu na maka keva lobo.
15 A maka lolo hosi ge kamumu a malala ne ria
ni gi rata vonga a maka hania,
ge koru kamumu vona a maka uve.
16 A maki ni kani kamumu ge vonu vona a malala ne Iosep.
E BAKOVI DAGI i made pololilo na kai kiroko i nono, i taki iau
ge rata kamumu hatekea a kabu iea,
a vuhuna e Iosep i tahoka a rana ne huriki e turana.
17 A hamone Iosep ri gao hateka
manga a tabua na bulmakau a toga i tahoka a pelengana.
A kabu ne Manase ri ala kupo i manga a pelengana tara,
a kabu ne Epraim ri ala kupo hateka i manga a pelengana tara.
Na pelengana nga i rua i padi a kabu tebi,
i kope lae ria ri laho viliha ri harena na nilobona malala.”
18 I taki a kabu ne Sebulun i ta maea,
“Mua a kabu ne Sebulun ra leho ni vakuloi a maki
turana a robo basi ge nunu kamumu.
A leho na kabu ne Isikar ni vakuloi a maki ne huriki a tahotanga,
ia tara ge nunu kamumu.
19 Ra kabu nga ru gu gale ranga kabu ri gi valai na lolo ne rua,
ri gi rata a nihabi malamala.
Ru gu rata a leho ni vakuloi a maki na mahala ru bole na dari na lavu.
Bara ru bole hateka a moni vona a maka leho nga.”
20 I taki a kabu ne Gad i ta maea,
“A Vure i ratea a malala na kabu ne Gad i bele dagi,
i mavonga mua lobo mu kavurikea a rana.
A kabu ne Gad i manga a laion
i dava i po a kanimatana ge rabalaki a kania vona,
ge kinirape tala a vahana a kulina gina.
21 Na tahuna e huriki a matakari ne Isarel ri vapopo ni verua a malala,
a kabu ne Gad ri vulakia tara tabekena malala i bolea.
Ra tabekena malala a kabu ne Gad i bolea i kamumu hateka,
i kara e huriki a matakari kunana ri gi bolea.
A kabu ne Gad i ramai malamala a nita na vinara ne BAKOVI DAGI.”
22 I taki a kabu ne Dan i ta maea,
“A kabu ne Dan i manga a tuna laion,
i pe a robo e Basan i page page valai.”
23 I taki a kabu ne Naptali i ta maea,
“BAKOVI DAGI, o habi a maki kamumu ne huriki a Naptali.
A Darilomu e Galili i tabuli na malala ne ria,
a harena malala i polotaroa a naru i puru lokovonga popote.”
24 I taki a kabu ne Aser i ta maea,
“BAKOVI DAGI, o rata kamumua a kabu ne Aser.
A maka kabu lobo ne Israel ri ngarua.
A maka kai a oliv ge kupo na malala vona
ge bole a naruna ge kupo.
25 A nure na tanga ne ria ge tahoka a logo dagi ni gi rata na aen.
Ri gi made kamumu vakaroro, i uka ma ri gi mangenge.
26 “Mua o huriki a Israel i uka tara vure ge manga a Vure ne Iesurun.
I tahoka a nitora dagi i made pololilo na nipara dagi,
i laho puru rike na bubu ge tuhori hita.
27 A Vure i made vakaroro,
i nugutata hita vakaroro na limana
i uka ma i pe hita.
Na tahuna mu vano mu bolea a malala ne mua,
bara i lili tala e huriki a pile ne mua,
i taki mua bara mu rabalaki lobo ria.
28 Muri a kabu ne Iakop ge made kamumu,
e huriki a pile i uka ma ri gi valai ri gi vaubi turane ria.
Ra tabeke iea a simuru i boru i vakamea a malala
i koru kamumu vona a maka vit a vain.
29 Mua o huriki a Israel, mu vivi hateka,
e BAKOVI DAGI i uka ma i tuhoria tara kabu,
ge manga a hini i tuhori mua.
E BAKOVI DAGI i manga a galeu ne mua
i manga a bainat ne mua.
I tagari mua na tahuna na vabinga,
i rata mua mu rangi ria.
E huriki a pile ne mua bara ri tangi valai ne mua
ri taki mu gu dodo ria.
Pali mua bara mu pahadanu ria mu ratapile ria.”