1 E Daina, e tune Iakop, e Lea i vano ge matai e huriki a ngatavine na tanga dagi. 2 E Hamor, a bakovi dagi na kabu na Hivi, i matakaria ra tanga dagi iea. E tuna, e Sekem. Na tahuna e Sekem i masia e Daina, i lakavua. 3 E Sekem i ngaru hatekea e Daina, e tune Iakop. Lakea i lukea na ngava, ge ngarua. 4 Muri e Sekem i takia e tamana, i ta maea, “O tulia a ngatavine iea ge girihigu.”

5 Na tahuna e Iakop i longoa e Daina ni lakavu, i uka ma i takia tara ngava. I dava kunana e huriki e tuna ri gi hamule taro, a vuhuna ria lobo ri vano ri matakari a sipsip. 6 Muri e tamane Sekem i vano, ge ta turane Iakop. 7 Na tahuna e huriki e kurabane Daina ri hamule na robo, ri longoa e Daina ni lakavu, i madihi a hatene ria, a vuhuna e Sekem i rata a rabu hale na kabu ne Israel na ni mahita turane Daina, re tune Iakop. Ra naro iea i hale hateka.

8 Lakea e Hamor i taki ria, “E tugu e Sekem i ngarua e Daina. Mu habia vona ge girihina. 9 Si gi vaparangi vakuloi. Mu habi valai ne mia a ngatavine. Mia ranga bara mi habi lakene mua a ngatavine. 10 Mu made turane mia, mu leho vona a malala na tabeke mu ngaru. Mu vahabi, mu vakona, bara mu tahoka a mahala vona a malala iea.”

11 Lakea e Sekem i takia e tamane Daina turana e huriki e kurabana, i ta maea, “Mua bara mu longo mai iau, bara habi tavula ne mua a maki mu nana iau vona. 12 Mu takia a mapana ngatavine, turana ranga maki, bara habi ne mua. Pali a ngatavine iea, mu habia nau ge girihigu.”

13 E huriki e tune Iakop ri longo tamilalu, ri tami e Hamor rua e tuna e Sekem, a vuhuna e kurabane ria, e Daina, ni rata a naro hale vona. 14 Lakea ri taki rua, “I uka ma mi gi longo mai marua. I uka ma mi gi habia e kurabane mia na bakovi i uka ma ni pala a kulina, ma ge habi a nimaruhu ne mia. 15 Bara mi longo mai ioe na maki i taku kunana. Mi ngaru mu gu pala a kuline huriki a bakovi lobo, ri gi manga mia. 16 Muri bara mi habi mua e huriki a ngatavine ne mia. Mua ranga bara mu habi ne mia e huriki a ngatavine. Bara mi made turane mua, muri bara hita a viri ala taku. 17 Pali mua, i uka ma mu longo mai mia, ni gi pala a kuline mua, bara mi bole mulea e kurabane mia, mi vano.”

18 A nitane ria i nangi kamumu ne Hamor rua e tuna, e Sekem. 19 A riau iea, ri kavurike hatekea e huriki a kabu ne tamana, i malaviriri kunana i muri mai a ngava ri taki, a vuhuna i ngaru hatekea e Daina. 20 E Hamor rua e tuna e Sekem, ru lakea na poridala na tanga dagi, ru ta turana e huriki a bakovi vonga. 21 Ru ta maea, “A narone e huriki a bakovi nga i kamumu. Ri gi made turane hita na malala ne hita, ri gi rata harikia ne ria. A malala i tabuli tavula, i uka viri ge leho vona. Ngane si gi parangi na ngatavine ne ria, pali ria ranga bara ri parangi na ngatavine ne hita. 22 Pali si gi valongo mai vona tara ngava. E huriki a bakovi ne hita, ni gi pala a kuline ria, si gi manga ria. Muri bara ri longo ni made na malala ne hita, bara hita a viri ala taku kunana. 23 A maka mahala, a sipsip, a bulmakau ranga, bara ne hita. Si gi longo mai ria, bara ri made turane hita.”

24 E huriki a bakovi ri pagitala na poridala na tanga dagi, ri longo vona a nitane Hamor rua e tuna e Sekem. Lakea ni pala a kuline e huriki a bakovi lobo na tanga dagi. 25 I rongo ria a voko, ri malo kunana. I lobo a parava i tolu, lakea e tune Iakop ala rua, e Simion e Levi, ra to kinana taku e Daina, ru bole a bainat ne rua, ru vaubi turana e huriki a bakovi na tanga dagi, ru rabalaki ria. 26 Ru rabalaki na bainat e Hamor rua e tuna e Sekem, lakea ru bole mulea e Daina na ruma ne Sekem. 27 Ri sike e huriki e tune Iakop ranga, ri matai a podane huriki ri mate, ri bole a maki lobo na tanga dagi, a vuhuna e Sekem i rata a naro hale ne kurabane ria. 28 Ri bole a maka sipsip a bulmakau, a donki, a mahala lobo i tabuli pololilo, i tabuli polovavo na tanga dagi. 29 Ri bole a maka mahala, e huriki a ngatavine, e huriki a koma, ri bole a maki lobo na tanga dagi.

30 Muri e Iakop i taki e Simion rua e Levi, “Marua muru rata hale a nimadegu. Muru rata iau ngane i uka ma a made kamumu na matane huriki a Kenan a Peres, re huriki a tahona a robo iea. Hita, i uka ma si ala kupo. E huriki nga bara ri vadili palupu, bara ri ratapile iau turane huriki a kabu nau.”

31 Lakea ru nana maea, “O luhoi navai, miri gi mata taroa e kurabane maria, ni gi rata manga a ngoi?”