16
Iesusa mac nda maŋgepat
(Matiu 28.1-8 na Luk 24.1-12 na Ion 20.1-10)
1 Karica Wɨktɨtɨkna Ra maiatke, Makdala auŋna Mariaapa, Salomeapa, Maria Iemisna aemmap, mina tabrirapa iŋpemb laiŋta reikap oikca aŋgɨrca kɨprina, na mina Iesusna waɨrmo matauna taŋna moca. 2 Na raita ŋgatna ra lacauna ŋaŋarmuŋ ŋgoinna mina muk mataŋgat. 3 Na mina ndorita rɨkmo gaindopatna, “Mandaia ndo aimo otaca taŋca tɨŋ mboraca eacrena waut aniacmo rukica tɨŋa gotit?” 4 Na an kɨdrɨkca mina kɨpca rambuŋairi, na mina watta taŋrinanna, an taŋga mboracrina wautta tɨŋmo mba mac aŋgɨa mboracri. Wanaiŋ. Mina rukica taŋga roumbca tɨkca eacrina. Na an wautta bagaraniac ŋgoin. 5 Ainda moca mina an muk inik mambukat, na mina watrinanna, ramoot ŋgam ianna par umbaia mbiraca eacrina, na ma tik ŋgapaoc gogok rocot aoca eacrena. Na mina mana watca ŋgep ŋgoreac naŋgeprina.
6 Na ma minmo gaindopatna, “Ne kai nanambi teac. Aku lamŋirena, ne Nasaret auŋna Iesusa mina ik nakeracrinanna, orena kɨprina. Na ma mac nda ŋgeprina. Na ma ganna mba eacreke. An taupca mina manmo anna tɨkrinanmo ne wat. 7 Mt 26.32, na Mk 14.28Na ne taŋca mana iŋa raŋgairena ramtaɨrapa Pita motoca kam neaŋ, Iesusa nenmo Galili auŋmo, outta taŋnande. Na ne manmo Galili auŋa tɨkca watnande, an kirara ma nenmo ŋgaua mbopatna.”
8 Ainda moca an meikpitikca nda laruca, mina mukmo tɨkcarica kɨpcarica mataŋgat. Na mina iroar inkara ŋgep ŋgoreac naŋgepri, mina manekri. Na mina ramoot ianmo kam ianna mba mbopatke, mina nanambicariatna.* Landamŋina ramtaɨr wɨtta gaind ndamŋirena, an kambca sapta 16 wes 9na taŋca wes 20na mɨn ndeacrena, Makca mba tiratke, anmo kabena ramootta iŋmbaia tiratnan. Na an kamna taupca, landamŋina ramtaɨr ndeida gaind ndamŋirina, kabena kam tɨp emtemma eacrena. Na an kamma gaind, “An meikpitikca taŋga Pitaapa manap eacrena ramtaɨrmo kamb wɨtta mba mbopri. An meikca minmo an ramoot ŋgamma minmo mbopatna kamb ndoprina. Na iŋmbaia Iesusa ndo minmo kam aŋgɨca taŋna aiŋa neaŋga mina gan tiacarpaikna auŋembmo taŋri. An aiŋmo mina ra gagaca tɨkca mo ŋgepca taŋga ra itirikna mɨn, na anna Raraŋ Aetaniaca ndona meikramtaɨr mac nda aŋgɨna kam, na minmo iarwara eteacna wat laŋ neaŋna. Na an kamma anna Raraŋ Aetaniac niŋgiknan, ma mba maiitndai.”
Makdala auŋna Maria Iesusmo watrina
(Matiu 28.9-10 na Ion 20.11-18)
9 Lk 8.2Na Iesusa rana ŋgat kabena ra lacauna ŋaŋarmuŋ ŋgoinna ma mac nda ŋgeprina. Na ma Makdala auŋna Mariamo out ndarurina. Na an meac tikca ŋgaua Iesusa manmo par kabeapa mbut mbuniŋna ŋerŋgaur ŋgorikcapnanna moa kecaririna. 10 Lk 24.10Ri, Maria ma taŋga Iesusap ŋgaua taŋrena ramtaɨrmo mambopat. Na an ramtaɨra iroar inkar makukuca eacrenanna mina aerena. 11 Na ma minmo gaindopatna, “Iesusa ma eteacna watap, na ma eacrena. Na aku manmo watrina.” Na mina an kambmo waraca mina mba rɨpacatke.
Iesusna iŋa raŋgairena ramtaɨrta ramoot mbuniŋa Iesusmo taupca tɨkca watrina
(Luk 24.13-35)
12 Karica iŋmbaia mana iŋa raŋgairena ramootniŋa, an auŋ aniacmo tɨkcarica taup ndiŋa taŋri. Na Iesusa maniŋ ndambuŋ ndarurinanna, ma kabena ramootna tikna kirar toc ndarurina. 13 Na maniŋa taŋga mana iŋa raŋgairena ramtaɨrmo an kam ndoprina, na mina maniŋmo mba rɨpacatke.
Iesusa ndona iŋa raŋgairena ramtaɨrta aiŋna kam ndoprina
(Matiu 28.16-20 na Luk 24.36-49 na Ion 20.19-23)
14 1 Ko 15.5Ainda moca iŋmbaia mana iŋa raŋgairena ramtaɨr parniŋapa mbut kabena mɨnna ramtaɨra, mbiraca ambca eacri mbuŋa Iesusa min ndambuŋ malaruat. Na ma minmo kaega moatnanna, anna gaind, mina iroar inkara gagrar koind, aintik ma mac nda ŋgepatnanna, mina rɨtɨpaik kocor. Na meikramtaɨra manmo watca anna kam ndoprinanmo, mina minmo mba rɨpacatke. 15 Mt 28.19, na Up 1.8, na Kol 1.23Karica ma minmo gaindopatna, “Ne gan tiacarpaikmo muruŋa taŋca meikramtaɨrmo muruŋcamiŋmo kam wembaŋ laŋmo wiwiti taŋ. 16 In 3.18, na 3.36, na 12.48, na Up 2.38, na Ro 10.9, na 1 Pi 3.21Na ramootta rɨpaca kɨtac puk aŋgɨr te, Raraŋ Aetaniaca manmo mac nda aŋgɨnandet. Na ramootta rɨpac ŋgocor te, ma ritri waparacna ramo ma laruca wɨtɨknandet. Na an mɨnna Raraŋ Aetaniaca manmo mba aŋgɨritndait. 17 Up 2.4, na 5.16, na 8.7, na 10.46, na 1 Ko 12.10, na 12.28Na Raraŋ Aetaniaca rɨpacrena meikramtaɨrta paɨr puŋga, ma ŋgagatraca monandet. Na mina aukna i mbuŋa mina ŋerŋgaur ŋgorikmo mo kecarinandet, na mina kabena auŋna kam mbuŋ toco mbopnandet. 18 Lk 10.19, na Up 5.15-16, na 28.3-9, na Ie 5.14-15Na mina nduipmo ndorita paɨr puŋga utiŋnandet. Na mina titocna pukna kocna reikca meikramtaɨra moa menacrenanna, am te, an koca minmo mba mo ŋgocraiitndai. Na roumbbebta meikramtaɨrmo mina ndorita paɨr tɨk te, mina laiŋga monandet.”
Iesusa tamuŋna auŋ mac
nda magat
nda magat
(Luk 24.50-53 na Up Aŋgɨrena Ramtaɨrta Aiŋ 1.9-11)
19 Ŋap 110.1, na Up 1.2-3, na 1.9-11, na 2.33-34, na 7.55Karica Kacoot Iesusa minmo kamb topca maiatke, Raraŋ Aetaniaca manmo tamuŋna auŋ naaŋgɨra mataŋgat. Na Iesusa taŋga mana par umbaia mambiracat. 20 Up 5.12, na 14.3, na 1 Ko 2.4-5, na Ib 2.3-4Ainda moatke, mana iŋa raŋgairena ramtaɨra mataŋgat, na mina kam wembaŋ laŋmo auŋembmo muruŋ mawiwitiri. Na Kacootta minap aiŋa mori, na ma minmo moa gagraca mina ŋgagatracara morina, na mina kambmo moa gagrarina.
16:7 Mt 26.32, na Mk 14.28
*16:8 Landamŋina ramtaɨr wɨtta gaind ndamŋirena, an kambca sapta 16 wes 9na taŋca wes 20na mɨn ndeacrena, Makca mba tiratke, anmo kabena ramootta iŋmbaia tiratnan. Na an kamna taupca, landamŋina ramtaɨr ndeida gaind ndamŋirina, kabena kam tɨp emtemma eacrena. Na an kamma gaind, “An meikpitikca taŋga Pitaapa manap eacrena ramtaɨrmo kamb wɨtta mba mbopri. An meikca minmo an ramoot ŋgamma minmo mbopatna kamb ndoprina. Na iŋmbaia Iesusa ndo minmo kam aŋgɨca taŋna aiŋa neaŋga mina gan tiacarpaikna auŋembmo taŋri. An aiŋmo mina ra gagaca tɨkca mo ŋgepca taŋga ra itirikna mɨn, na anna Raraŋ Aetaniaca ndona meikramtaɨr mac nda aŋgɨna kam, na minmo iarwara eteacna wat laŋ neaŋna. Na an kamma anna Raraŋ Aetaniac niŋgiknan, ma mba maiitndai.”
16:9 Lk 8.2
16:10 Lk 24.10
16:14 1 Ko 15.5
16:15 Mt 28.19, na Up 1.8, na Kol 1.23
16:16 In 3.18, na 3.36, na 12.48, na Up 2.38, na Ro 10.9, na 1 Pi 3.21
16:17 Up 2.4, na 5.16, na 8.7, na 10.46, na 1 Ko 12.10, na 12.28
16:18 Lk 10.19, na Up 5.15-16, na 28.3-9, na Ie 5.14-15
16:19 Ŋap 110.1, na Up 1.2-3, na 1.9-11, na 2.33-34, na 7.55
16:20 Up 5.12, na 14.3, na 1 Ko 2.4-5, na Ib 2.3-4