1  * Room 15.25-26Judia kanageso soraaya yoŋoojoŋ ala ilailaa moneŋ meŋ kululuuwutiwaajoŋ qisiŋ noŋgiti, iikawaajoŋ kokaeŋ jeŋ kotoŋ oŋonjeŋ: Niinoŋ Galesia prowinswaa uumeleeŋ kanagesoya kanagesoya jeŋ kotoŋ oŋombeti, oŋonoŋ kaaŋiadeeŋ mono iikawaa so kokaeŋ amakebu:

2 Sonda so weeŋ mutuya kanoŋ oŋo kuuya aŋa aŋa mono nanduŋ amakebu. Toomoriaŋ meŋkejutiwaa so moneŋgia bakaya ii kowigiaa goraayanoŋ ama galeŋ koma laligowu. Kaeŋ aŋgi niinoŋ kambaŋ moŋnoŋ oŋoonoŋ kawe kanoŋ nanduŋ saŋgabaŋga ambutiwaa so mende ambuto, ii saanoŋ kowigianoŋga meŋ alatanoŋ ambu.

3 Kaeŋ aŋgi oŋoonoŋ kamaŋati, niinoŋ kambaŋ iikanoŋ saanoŋ jeŋ-asa-asari tere ooŋ eja gawoŋ kawaajoŋ mogi sokonji, mono iyoŋoo borogianoŋ ama wasiŋ oŋombe kulukululuu kaleŋgia ii meŋ Jerusalem kembu. 4 Niinoŋ yoŋowo motooŋ kemambaajoŋ kemaŋati eeŋ, iyoŋonoŋ mono saanoŋ niwo toroqeŋ motooŋ kowe kotoŋ kemboŋa. Kiaŋ.

5  * Apo 19.21Niinoŋ Masedonia prowins uuguŋ kemaŋa. Kawaajoŋ Masedonia mesaoŋgo mono oŋoonoŋ kamambaajoŋ mojeŋ. 6 Oŋoonoŋ kaŋ kambaŋ tosaaŋa oŋowo rabenaga me koŋuru kambaŋ (winter) ii kaaŋagadeeŋ oŋoo batugianoŋ toroqeŋ laligodaborowenaga. Kaeŋ laligowe saanoŋ ilaaŋ noŋgi daeŋ daeŋ kembenaga, iikanoŋ mono afaaŋgoŋ kana toroqeŋ kemaŋa. 7 Kambaŋ kokaamba oŋoonoŋ kaŋ tatawagadeeŋ iŋiima uŋuuguŋ kemambaajoŋ mende mojento, Poŋnoŋ oo jewaati eeŋ, mono kambaŋ tosaaŋa oŋowo ramambaajoŋ jojorijeŋ.

8  * Lew 23.15-21; Dut 16.9-11* Apo 19.8-10Kaeŋ jojorijento, wala Efesus siti kokanoŋ toroqeŋ laligowe gbani jaayaqeqe dologa (pentekost) kanoŋ kaŋ kuuwaa. 9 Anutunoŋ noojoŋ gawombaa naguya somata hororo saanoŋ gawoŋ somata mewe hoŋa kolooŋ seiŋkejato, mamaganoŋ tuarenjeŋ ama nomakeju. Kawaajoŋ kokanoŋ toroqeŋ laligomambaajoŋ mojeŋ.

10  * 1 Kor 4.17Timotinoŋ nii kaaŋa Pombaa eja geria kolooŋ gawoŋa meŋ laligoja. Kawaajoŋ iinoŋ oŋoonoŋ kawaati eeŋ, oŋo mono kalaŋ koma mugi kee momoya qaa oŋoo batugianoŋ laligowaa. 11 Moŋnoŋ moŋ mende iima sisiriiŋ jejewili ambato, oŋowo laligoro tegoro noonoŋ kamambaajoŋ jewaati, iikanoŋ mono ilaaŋ mugi luaenoŋ oŋomesaoŋ eleema kawa. Niinoŋ uumeleeŋ alauruna yoŋowo ii iibombaajoŋ mambonjoŋ.

12 Uumeleeŋ alanana Apolos iwaa qaa ii kokaeŋ jemaŋa: Iinoŋ uumeleeŋ alauruna yoŋowo oŋoonoŋ kawaatiwaajoŋ qaa kotakota ijoŋ uu kuuŋ mube. Kaeŋ kuuŋ mubeto, kambaŋ kokaamba oŋoonoŋ kamambaajoŋ uuta kotiiro togoja. Kanageŋ kambaŋa saanoŋ eŋ mubaati, mono iikanoŋ kawaa. Kiaŋ.

13 Oŋo mono uugbiligbili laligoŋ momalaarigia meŋ gbiliŋ kotiiŋ laligowu. Eja kotigaa so mono uuwaa naŋgonaŋgo ejemba kolooŋ Pombaa ku-usuŋawo nambu. 14 Iwoi kuuya ama mewuti, ii mono uujopanoŋ aŋgi koloowaa.

15  * 1 Kor 1.16Stefanas iwaa mirinoŋ laligojuti, oŋo ii moma oŋonju. Akaia prowinsnoŋ gawoŋ meniŋ uugia meleeŋgi gawonanaa hoŋa mutuya kaeŋ kolooroti, ii moju. Yoŋonoŋ ejemba soraaya ii pondaŋ weleŋ qeŋ oŋoma uugia iikanoŋ somoŋgoŋ ama laligojuti, ii moju. Oo uumeleeŋ alauruna, niinoŋ uugia kokaeŋ kuuŋ oŋonjeŋ: 16 Oŋo kaaŋiadeeŋ ejemba kaaŋa ano yoŋowo toroqeŋ gawoŋ motooŋ meŋ Anutuwaa weleŋ qeŋkejuti, mono kuuya iyoŋoo qaa baatanoŋ kema laligowu.

17 Niinoŋ Stefanas Fortunatus ano Akaikus koi kagitiwaajoŋ aisooŋkejeŋ. Oŋo niwo Efesus koi mende laligogi yoŋonoŋ mono oŋoo kitigia kolooŋ ainjoloŋ ama noŋgi sokonja. 18 Yoŋonoŋ oŋoo uŋagia keraqeeaŋgo qeŋ laligojuti, iikawaa so mono noo uŋana kaaŋagadeeŋ keraqeeaŋgo qeŋ noma laligogi. Kawaajoŋ oŋo mono eja kaaŋa yoŋoojoŋ mogi uro ii asuganoŋgadeeŋ jeŋ qaagiaajoŋ tororo geja ama laligowu.

19  * Apo 18.2Uumeleeŋ kanagesoya kanagesoya Eisia prowins kokanoŋ laligojuti, iyoŋonoŋ mono yeizozogia aŋgi oŋoonoŋ kaja. Akwila Prisila ano uumeleeŋ kanageso yoroo mirinoŋ ajorooŋkejuti, iyoŋonoŋ mono Pombaa qatanoŋ yeizozogia mamaga aŋgi oŋoonoŋ kaja. 20 Uumeleeŋ alauruna kuuya Efesus koi laligojuti, iyoŋonoŋ mono yeizozogia aŋgi oŋoonoŋ kaja. Oŋo mono uumeleeŋ alaurugia yoŋowo joloŋgia jeŋ aŋgoŋ aoŋ buugia kitoŋ neŋ laligowu.

21 Neenaa yeizozona oŋoonoŋ ama qana neenaa boronanoŋ kokaeŋ oojeŋ: Pool.

22 Moŋnoŋ Poŋ mende jopagoŋ uujopa mende ama laligoji eeŋ, Poŋnoŋ mono qasuaaŋa iwaa qaganoŋ ano ubaa. Poŋnana, gii mono kawa!

23 Poŋ Jiisaswaa kaleŋmoriaŋanoŋ mono oŋowo ewa.

24 Kraist Jiisaswo qokotaaŋ nanjuti, noo uujopananoŋ mono kuuya oŋowo eŋ kotuegoŋ oŋono laligowu. Qaa ii oŋanoŋ. Kiaŋ.