1 Keinan balonoŋ bodi lombotawo ii toroqeŋ ero. 2 Jeikobwaa kanagesourutanoŋ wiit padi Iijipt kantrinoŋa meŋ kagiti, ii kuuya nedaborogi qaono maŋgianoŋ merauruta kokaeŋ iŋijoro: “Oŋo mono mombo eleema kema nenenana tosaaŋa sewaŋa mewu.”

3 Kaeŋ iŋijoro Juudanoŋ kokaeŋ jero: “Eja poŋ iinoŋ kaparaŋ koma nonoo galeŋ meme qaa kotakota kokaeŋ jero: ‘Kogianoŋ oŋowo mende kawaati eeŋ, oŋo mono noo jaasewananoŋ mombo koubombaajoŋ amamaawu.’ 4 Kawaajoŋ giinoŋ konana wasina nonowo kawaati eeŋ, nononoŋ saanoŋ gomesaoŋ nenenana sewaŋa mewombaajoŋ kemboŋa. 5 Eja iikanoŋ qaa kokaeŋ ninijoro: ‘Kogianoŋ oŋowo mende kawaati eeŋ, oŋo mono noo jaasewananoŋ mombo koubombaajoŋ amamaawuya.’ Kawaajoŋ giinoŋ Benjamin aŋgoŋ kombagati eeŋ, nono mende kemboŋa.”

6 Juudanoŋ kaeŋ jero Israelnoŋ kokaeŋ jero: “Oŋo mono naambaajoŋ kogia moŋ laligojiwaa qaaya eja ii ijogi morotiwaajoŋ nii uulombo somata nonju?”

7 Kaeŋ jero kokaeŋ meleema jegi: “Eja iikanoŋ anana ano kanagesourunana ananaajoŋ tororo qiqisi kania kania nonoma kokaeŋ ninijoro, ‘Maŋgianoŋ jaawo laligoja me qaago? Daremuŋgia moŋ laligoja me qaago?’ Kaeŋ jerotiwaajoŋ qiqisiya ii nononoŋ oŋanondeeŋ jeŋ meleeniŋ. Iinoŋ kanageŋ konana wama kawutiwaajoŋ jenagati, ii mono walawala kambaŋ kanoŋ nomaeŋ mobonaga?”

8 Kaeŋ jegi Juudanoŋ maŋa Israel kokaeŋ ijoro: “Kawaajoŋ eja gbaworo ii mono noo boronanoŋ ama wasina motooŋ kemboŋa. Kaeŋ ana afaaŋgoŋ uulaŋawo gomesaoŋ kananoŋ keniŋ nono, gii ano embameraurunana anana mende komuŋ gororoŋgowoŋa. 9 Benjamimbaa laaligoyaa doweya iikawaa qaaya mono noo boronoŋ ero eleema kaŋ gomambaajoŋ jeŋ kotiijeŋ. Niinoŋ ii mende wama eleema koi kaŋ goo jaasewaŋganoŋ mende oomaŋati eeŋ, iikawaa iroŋanoŋ mono noo qananoŋ uro goo jaanoŋ bosima laligowe namonoŋ laaligona tegowaa. 10 Kambaŋ koriga ezelobezelo ama mende mambombonagati eeŋ, nononoŋ mono endu kema eleema koi kaniŋ ambeŋa woi koloonaga.”

11 Kaeŋ jero amagia Israelnoŋ kokaeŋ jero mogi: “Kaeŋ kolooji eeŋ, oŋo mono kokaeŋ ambu: Gomaŋ kokawaa toomoriaŋa awaa totooŋ tosia koi kaaŋa ii meŋ taru gesogianoŋ mouma kema eja ii kaleŋ mubu: Sele morimoriwaa kelega tosia, moroŋ apuya, daŋe riki, marasiŋ gere tokoya qata mor gipi, komoŋ, gou ano seu wakato iikawaa hoŋgia. 12 Silwa moneŋ walaga taru gesogiaa qaa oogianoŋ mougi meŋ kagiti, ii ano iikawaa so qaganoŋ toroqeŋ ama mindirigi jaŋgoyanoŋ somariiŋ 2:waa so kolooro ii meŋ eleema kema mubu. Tosianoŋ koposo ama ii gesogianoŋ aŋgi me nomaeŋ? 13 Kogia kaaŋagadeeŋ wama uulaŋawo waama eja iikanoŋ mombo eleema keŋgi. 14 Anutu ku-usuŋ kuuyaa Toyanoŋ mono eja iikawaa jaanoŋ kiaŋkoomuya oŋono iinoŋ daremuŋgia moŋ ano Benjamin ii oŋowo mirinoŋ koi eleema kawutiwaajoŋ wambelaawaa. Noo meraurunanoŋ komuntiwilaa ambuti eeŋ, niinoŋ mono eeŋ totooŋ laligomaŋa.”

15 Kaeŋ iŋijoro kaleŋ iwoi ii meŋ silwa moneŋ meŋ kagiti, iikawaa so qaganoŋ toroqeŋ ama mindirigi jaŋgoyanoŋ somariiŋ 2:waa so kolooro. Ii meŋ Benjamin motooŋ wama waama uulaŋawo Iijipt kema Joosefwaa jaanoŋ keugi. 16 Keugi Joosefnoŋ Benjamin ii yoŋoo batugianoŋ iima iikanondeeŋ miriaa galeŋa kokaeŋ jeŋ kotoŋ muro: “Gii mono eja koi uŋuama neenaa mirinoŋ kema oŋoona rabu. Ragi kema oro moŋ qeŋ ooŋ weembaa neneya mozozoŋgona yoŋonoŋ saanoŋ niwo motooŋ nene newoŋa.” 17 Joosefwaa miriaa galeŋanoŋ jeŋ kotoŋ murotiwaa so eja ii uŋuano Joosefwaa mirianoŋ keŋgi.

18 Uŋuano Joosefwaa mirianoŋ kema jeneŋgia ororo toroko moma kokaeŋ romoŋgoŋ batugianoŋ jegi: “Wala kaniŋ monenana meleema taru gesonananoŋ mougi meŋ keniŋi, iikawaajoŋ yoŋonoŋ mono nunuama kaŋ koi nonooŋgi rajoŋ. Yoŋonoŋ mono qelanjiŋ nunuŋ ureeŋ haamo ama nonoma nonooŋgi weleŋqeqeuruta omaya kolooniŋ doŋgiurunana kalugoŋ aŋgoŋ koma oŋombubo.” 19 Kaeŋ jeŋ nama Joosefwaa miriwaa galeŋa iwaanoŋ uma keŋgi miri naguyanoŋ nano iwaajoŋ qaa kokaeŋ jegi: 20 “Oo somatanana, nono kambaŋ mutuya nene sewaŋa mewombaajoŋ koi kaniŋ. 21 Kaŋ nene sewaŋa meŋ mombo eleema kema kananoŋ miri moŋnoŋ kema ewombaajoŋ rama taru gesonanaa kasia isama monenana totonananoŋ ii kore gesonana aŋa aŋa qaa oogianoŋ nene qaganoŋ raro iiniŋ. Kawaajoŋ moneŋ ii kete mombo meleema meŋ kajoŋ. 22 Silwa moneŋ ii moronoŋ taru gesonananoŋ meleema mombo anoti, ii nono mende mojoŋ. Nononoŋ ii ano silwa moneŋ tosaaŋa ii qaganoŋ torokuuŋ nene sewaŋa mombo mewombaajoŋ gesonananoŋ mouma meŋ kajoŋ.”

23 Kaeŋ jegi miri galeŋanoŋ kokaeŋ jero: “Majakaka mende mobu. Oŋoaŋgiaa ano maŋgiaa Anutugianoŋ mono mombaa uuta kuuro silwa moneŋ ii taru gesogianoŋ mouro mokoloogi. Niinoŋ oŋoonoŋ silwa moneŋ ii medaborowe. Kawaajoŋ keegia mende moma mono uubonjoŋ rabu.” Kaeŋ jeŋ Simeon wama yoŋoonoŋ kari.

24 Kari motooŋ uŋuama Joosefwaa mirinoŋ ugi kanagia soŋgbambutiwaajoŋ apu oŋono ano doŋgigia loloo gbojoja nenegia uŋuagiro. 25 Yoŋonoŋ weembaa neneya Joosefwaa mirinoŋ motooŋ newutiwaa qaaya mogi. Kawaajoŋ Joosefnoŋ weeŋ biiwianoŋ mirianoŋ koubaatiwaajoŋ mamboma kaleŋ iwoigia ii asuganoŋ areŋgoŋ ragi. 26 Ragi Joosefnoŋ mirinoŋ karo kaleŋ iwoigia meŋ kaŋ mirianoŋ ugiti, ii muŋ batanoŋ simiŋ kuma namonoŋ usugogi. 27 Usugoŋ waagi joloŋgia iŋijoŋ nomaeŋ laligojuti, qisiŋ oŋoma kokaeŋ iŋijoro: “Maŋgia eja waŋaajoŋ nijogiti, iinoŋ nomaeŋ laligoja? Toroqeŋ jaawo laligoja me qaago?”

28 Kaeŋ jero kokaeŋ meleeŋgi: “Goo weleŋqeqega, nonoo amanananoŋ saanoŋ laligoja. Mono toroqeŋ jaawo laligoja.” Kaeŋ meleema goda qeŋ muŋ simiŋ kuma namonoŋ usugogi.

29 Kaeŋ aŋgi jaaya uuro kema karo koga Benjamin, iyaŋaa nemuŋaa meria ii iima kokaeŋ qisiŋ oŋono: “Kogia konogaajoŋ nijogiti, iinoŋ koi kolooja me nomaeŋ?” Qisiŋ oŋoma toroqeŋ kokaeŋ ijoro: “Merana, Anutunoŋ mono kiaŋkoomu gono laligowa.”

30 Kaeŋ ijoŋ koga iima wosoya pororogoro jaaya kaliliŋgoro saamambaajoŋ moma iikanondeeŋ alanzaŋ eleema oŋomesaoŋ uulaŋawo miri uuta oloŋa moŋnoŋ uma aŋodeeŋ rama saaro. 31 Saadaboroŋ jaauŋa soŋgbama miri uuta oloŋa ii mesaoŋ kaŋ tororo mokosiŋgoŋ nama iyaŋa galeŋ koma aoŋ nembanene kombutiwaajoŋ jero. 32 Iijipt yoŋonoŋ Hibruu ejemba yoŋowo motooŋ nene newombaajoŋ mogi arokuukuuyawo koloojiwaajoŋ ii amamaaŋkeju. Kawaajoŋ Joosefwaa neneya ii iyaŋa koma mugi raro daremuŋuruta yoŋoo ii iyaŋa koma oŋoŋgi ragi Iijipt ejemba iwo nene newombaajoŋ kaŋ ragiti, iyoŋoo nenegia ii iyaŋa koŋgi ragi. 33 Joosefnoŋ jero daremuŋuruta ii koloogitiwaa so areŋgoŋ oŋoŋgi mutuyanoŋ jaaqeqeyanoŋ raro bejugianoŋ konoganoŋ raro Joosefnoŋ jaasewaŋ qeŋ oŋoma raro. Kaeŋ rama iyaŋgia aima kotoŋ aoŋ waliŋgoŋ ragi.

34 Kaeŋ ragi Joosefnoŋ jero iyaŋaa nene duŋnoŋa nene tosaaŋa mendeema meŋ kaŋ koma oŋoŋgi koga Benjamimbaajoŋ ambeŋa 5:waa so toroqeŋ koŋgi nero. Kaeŋ neŋ Joosefwo jejelombaŋ ama afaaŋkota apu kotiga neŋ korisoro qaganoŋ ragi. Kiaŋ.