1 E' ukuöki̱ ta̱ Jehová tö Moisés a̱ iché:

—Be' yúne Egipto blú ska'. Ye' tö ie' ena ikue̱blupa e̱r téwa̱ darërëë a̱s ie'pa tö isa̱ù̱ tö ye' diché tai̱ë, e' wa ì kë̀ o̱r yi a̱ ese wè̱ ye' tö tai̱ë. 2 Ye' tö ie'pa e̱r téwa̱ darërëë a̱s be' tö ipakö̀ be' ala'r a̱ ena be' talapa a̱ tö we̱s egiptowak we'ikéyö ñies we̱s ì kë̀ o̱r yi a̱ ese wé̱yö tai̱ë ie'pa wörki̱. Es a' ulitane wa̱ ijche̱r tö ye' dör Jehová.

3 Eta̱ Moisés ena Aarón míyal Egipto blú ska' eta̱ ichéitö ia̱:

—Jehová dör hebreowak Këköl, e' tö ichè i' es: “¿Mik be' tö ye' ttö̀ dalöse̱we̱mirö? Ye' ichapa ö́mi a̱s imi' ye' ki̱kökka̱. 4 Kë̀ be' tö ie'pa èmi bule, e' ta̱ ditski patkeraëyö a' ká̱ ki̱. 5 Ditski tö a' ká̱ wà ierawa̱ tai̱ë, kë̀ a̱ íyök ulat wëneia̱. A' daliwö bata méa̱t mò wösi tö e' ko̱s katerawa̱itö yës. Ñies kal ulitane katerawa̱itö se̱raa̱. 6 Ñies ditski dörawa̱ tai̱ë be' u ko̱s a̱ ena be' kue̱blupa u a̱ ena egiptowak ko̱s u a̱. ¡Íyi i'se kë̀ su̱ule a' yë́pa bak ká̱ ia̱ia̱ë e'pa wa̱ ie'pa tsá̱ dë'bitu̱ ká̱ i' ki̱ dö̀ ikkë ta̱!”

Moisés tté o̱ne ta̱ ie' e̱' wötrée ta̱ imía̱. 7 E' bet ta̱ Egipto blú kue̱blupa tö iché iblú a̱:

—¿Mik ta̱ wëm e' kë̀ tö se' we'ikèia̱? A blu', ie'pa ö́mi ie'pa Këköl dör Jehová, e' ki̱kökka̱. A blu', ¿be' kë̀ wa̱ isu̱ne tö se' ká̱ sulunewa̱tke se̱raa̱?

8 Eta̱ Egipto blú tö Moisés ena Aarón tsu̱k patkéne eta̱ ichéitö ia̱:

—A' yúshka Jehová dör a' Këköl, e' ki̱kökka̱. Erë ke̱weie a' tö ye' a̱ ichö́ tö ¿a' wé̱nepa ë̀ mi'ke?

9 Moisés tö iu̱té:

—Sa' ka̱wöta̱ shkökmi se̱kka̱. Sa' ka̱wö tai̱ë tkö'u̱ke Jehová a̱. E' kue̱ki̱ sa' ala'r ena sa' këkëpa, e'pa ko̱s ka̱wöta̱ shkökmi. Ñies sa' obeja ko̱s ena sa' baka ko̱s e' mi'ke sa' wa̱.

10 Eta̱ Egipto blú tö iché ia̱:

—¡Iwënewa̱ wösha̱k tö a' e̱rbiköke suluë ye' ki̱! ¿I̱ma a' e̱rbikö̀ tö Jehová tö a' ki̱mèmi a̱s ye' tö a' ö̀mi a' alakölpaë ena a' ala'rë? 11 Kë̀ iwamblërpa es. A' wëpa kibineo̱ne esepa ë̀ yú Jehová ki̱kökka̱ es a' ki̱ ikiane e' kue̱ki̱.

Eta̱ Egipto blú tö ie'pa tsu̱kmi ké ie' yöki̱. 12 Erë Jehová tö iché Moisés a̱:

—Be' ulà kö́ka̱ Egipto ki̱ a̱s ditski bitu̱ Egipto ko̱s wà iökka̱ ñies dalikua bata méa̱t mò wösi tö e' ko̱s katökwa.

13 Eta̱ Moisés tö ishko kéli kéka̱ Egipto ki̱ eta̱ Jehová tö siwa̱' patkébitu̱ diwö tskirke e' kke̱ Egipto ko̱s ki̱ ñië nañeë. Bule es bla'mi ta̱ siwa̱' wa̱ ditski debitu̱. 14 Ditski tö Egipto ká̱ ko̱s e' wà iéwa̱ tai̱ë. Ekkë kë̀ su̱ule yi wa̱ ká̱ ia̱ia̱ë es kë̀ yi tö isue̱paia̱ne. 15 Es ditski dapaneka̱ ká̱ ko̱s ekkë ki̱. Kë̀ a̱ íyök ulat ta̱'ia̱. Dalì kuá ena kalwö e' ko̱s bata méa̱t mò wösi tö e' katélur ditski tö yës. Egipto ko̱s a̱ ka̱kö ko̱s kal kö̀ ko̱s e' kë̀ a̱te̱ia̱ yës.

16 E' bet ta̱ Egipto blú tö Moisés ena Aarón e'pa tsu̱k patké ta̱ iché ia̱:

—Ye' e̱' wamblé sulu a' Këköl dör Jehová e' ki̱ ñies a' ki̱. 17 Ye' kköchö̀ a' a̱ i̱'ñe ë̀ tö a' tö e' olo'yö́ ye' ki̱. Ikiö́ a' Këköl dör Jehová e' a̱ ye' ki̱ tö ditski ë̀ trë'ú̱lur ye' ki̱ a̱s kë̀ sa' duö̀lur.

18 Moisés e̱' yéttsa̱ Egipto blú u a̱ ta̱ bet ikiéitö Jehová a̱. 19 Eta̱ Jehová tö siwa̱' e' wötréene tsi̱kka darërë e' wa̱ ditski mítse̱r a̱nene dayë kiè Dayë Mat, e' ki̱. Eta̱ ditski kë̀ a̱te̱ yës Egipto. 20 Erë Jehová tö Egipto blú e̱r sulu téwa̱ne darërëë. Ie' kë̀ wa̱ Israel aleripa a̱ ka̱wö mène a̱s imi'rak.

21 Eta̱ Jehová tö Moisés a̱ iché:

—Be' ulà kö́ka̱ siwa̱' ki̱ a̱s ká̱ ttserwa̱ ttsettseë shu̱te̱ë.

22 Eta̱ Moisés ulà kéka̱ eta̱ ká̱ ttsenewa̱ mía̱ ttsettseë Egipto ká̱ wa'ñe ki̱ döka̱ ká̱ mañat. 23 Kë̀ yi wa̱ iyami se̱rke tsi̱net e' su̱ne yës. Kë̀ yi a̱ e̱' yënuktsa̱ wé̱ itkër ee̱ döka̱ ká̱ mañat. Erë Israel aleripa u a̱, ee̱ je' ká̱ olo tso' dalölö.

24 Eta̱ Egipto blú tö Moisés tsu̱k patké ta̱ iché ia̱:

—A' yúshka Jehová ki̱kökka̱. A' ala'r ko̱s tsú̱mi. Erë a' obeja ena a' baka e' ko̱s múa̱t.

25 Eta̱ Moisés tö iiu̱té:

—Au. Be' ka̱wöta̱ ka̱wö muk sa' a̱ sa' iyiwak tsu̱kmi ña'wè̱ sa' Këköl dör Jehová e' a̱ idalöioie. 26 E' kí̱ie ta̱ sa' icha ko̱s, e' michoë sa' wakpa wa̱. Sa' iyiwak shu̱shteke sa' tö ña'wè̱ sa' Këköl Jehová a̱ iki̱koka̱ie. Ka̱m sa' dö̀mi ee̱ eta̱ kë̀ sa' wa̱ ijche̱r iyiwak isie ëtö kiane sa' ki̱ ña'wè̱ Jehová a̱. E' kue̱ki̱ kë̀ sa' tö sa' iyiwak mepaa̱t yës.

27 Eta̱ Jehová tö Egipto blú e̱r sulu téwa̱ darërëë. E' kue̱ki̱ ie' kë̀ wa̱ ka̱wö mène Israel aleripa a̱ a̱s imi'rak. 28 E' kí̱ie ta̱ Egipto blú tö iché Moisés a̱:

—Be' e̱' yö́ttsa̱ í̱e̱. Be' e̱' kkö'nú ye' yöki̱. Be' dene ye' sa̱u̱k, e' ta̱ be' duörawa̱.

29 Eta̱ Moisés tö iiu̱té:

—Buaë bö iché es. Kë̀ ye' dë'ia̱ne be' sa̱u̱k.