1 Israel aleripa ulitane e̱' yélur ká̱ sir po kiè Sin ee̱ ta̱ imía̱ ñala̱ ki̱ e̱nae̱na we̱s Jehová tö iyë' ia̱rak es. Ie'pa demirak ká̱ kiè Refidim, ee̱ ie'pa e̱' tsé̱a̱t. Erë ee̱ di' kë̀ ta̱' ie'pa a̱ yè. 2 E' kue̱ki̱ ie'pa tö Moisés a̱ di' kié kësik wa. Ie'pa tö iché ie' a̱:

—¡Sa' a̱ di' mú yè!

Moisés iiu̱té:

—¿Ì kue̱ki̱ a' tö ye' a̱ di' kié kësik wa? ¿Iö́k a' tö Jehová wöñatkeke?

3 Ie'pa e̱rsine tai̱ë e' kue̱ki̱ ie'pa tö di' kiekerak kësik wa Moisés a̱. Ie'pa tö iché ie' a̱:

—¿Iö́k be' tö sa' ena sa' ala'r ena sa' iyiwak e' yë'lur Egipto a̱ ttèwa̱ e̱rsir wa?

4 Eta̱ Moisés kköché tai̱ë Jehová a̱ ta̱ ichéitö ia̱:

—¿We̱s ye' ie'pa i' wè̱mi? ¡Tsir eta̱ ie'pa ye' ttéwa̱ ák wa!

5 Jehová tö iiu̱té:

—Be' yú ie'pa wëttsë ke̱weie. A' kue̱blupa we̱lepa tsú̱miñak. Be' shko kéli wa be' tö di' kiè Nilo e' buk, e' tsú̱mi. 6 Be' yú Horeb ké̱bata* Horeb ké̱bata: Ká̱bata e' kiè ñies Sinaí ké̱bata. a̱. Ee̱ ye' be' paneke ák bërie tso' e' ska'. Mik be' tö ák e' ppé be' shko kéli wa, eta̱ di' dörattsa̱ tai̱ë ie'pa a̱ yè.

Eta̱ es Moisés tö iwakanewé̱ Israel aleripa kue̱blupa wörki̱. 7 Israel aleripa tö di' ki' kësik wa, e' kue̱ki̱ Moisés tö ká̱ e' kiè méka̱ Meribá.† Meribá: Hebreoie kiè e' wà kiane chè ñippè. Ñies ie'pa tö iyë', “Sa' kë̀ wa̱ iklöne tö Jehová tö sa' ki̱mèmi.” E' kue̱ki̱ Moisés tö ká̱ e' skà kiè méka̱ Masá.‡ Masá: Hebreoie kiè e' wà kiane chè s'ma'wè̱. Ee̱ ie'pa tö Jehová wöñatkë' e' kue̱ki̱.

8 Amalec aleripa debitu̱ ñippök Israel aleripa ta̱ Refidim. 9 Moisés tö iché Josué a̱:

—Be' tö se' wëpa we̱lepa shu̱shtö́ tsú̱mi ñippök Amalec aleripa ta̱. Bule ye' tso' ka̱bata wöbata ki̱ Skëköl shko kéli yaar.

10 Eta̱ Josué tö iwakanewé̱ we̱s Moisés tö iché ia̱ es ta̱ imíyal ñippök Amalec aleripa ta̱. E' dalewa Moisés ena Aarón ena Hur míyal ka̱bata wöbata ki̱. 11 Mik Moisés ulà kéka̱, eta̱ Israel aleripa e̱' alöke ibolökpa ki̱. Erë mik ie' ulà éwa, eta̱ Amalec aleripa e̱' alöke ie'pa ki̱. 12 Ie' ulà shtrinewa̱ tai̱ë, e' kue̱ki̱ ie'pa ák yulé ie' a̱ e̱' tkoie. Ñies Aarón ena Hur e'pa tö ie' ki̱mé iulà böt kökka̱ siwa̱' ki̱ a̱s kë̀ ishtrirwa̱. Es ie' ulà se̱'wé̱ ñië siwa̱' ki̱ dö̀ ka̱tuine ekkë. 13 Es Josué ena Israel aleripa e̱' aléka̱ Amalec aleripa ki̱ tabè wa.

14 Eta̱ Jehová tö iché Moisés a̱:

—A' ñippè i' e' pakè shtö́ka̱ yëkkuö ki̱ a̱s a' wakpa kë̀ é̱na ichö̀wa ke̱kraë. Ichö́ Josué a̱ tö ye' tö Amalec aleripa ulitane e̱we̱rawa yës.

15 Eta̱ Moisés tö ák dapa'wé̱ka̱ ka̱'ie et iyiwak ña'wo̱ie Jehová dalöioie. E' kiè méka̱itö “Jehová diché wa se' e̱' aléka̱.”§ Jehová diché wa se' e̱' aléka̱. Iwakpa ttö̀ wa Moisés tö ikié Jehová nisi, e' wà kiane chè Jehová dör ye' bandera. Wësua e' kiéitö es ie' ulà kéka̱ Jehová a̱ we̱s bandera kèka̱ es, e' wa ie'pa e̱' aléka̱ e' kue̱ki̱. 16 Ie' tö iché: