2
Jonás tté Jehová ta̱
1 Eta̱ Jonás tté Jehová dör ie' Këköl e' ta̱ nima shu̱a̱, 2 ta̱ ichéitö ia̱ i' es:
“A Jehová, ye' e̱riarke sia̱rë,
e' shu̱a̱ ye' tö be' a̱ ikié tö ye' tsa̱tkö́,
eta̱ be' tö ye' iu̱té.
Ye' tso'tke ká̱ dià ka̱ska' s'duulewa̱ ké̱ a̱,
ee̱ ye' be' a̱ ikié tö ye' ki̱mú,
eta̱ ye' ttö̀ ttsébö.
3 Be' ye' u̱yémi dayë a̱ i̱ski̱ë dayë diki̱a̱,
ye' ki̱tëulewa̱ dayë wa̱.
Dayë u̱rke tai̱ë e' patkébö, e' tka ye' ki̱kke̱.
4 Ye' ittsé tö ye' kë̀ ku̱'ia̱ be' wörki̱.
Ye' ibikeitsé tö ye' kë̀ dë'ia̱ne be' wé buaë e' a̱.
5 Dayë tai̱ë, e' shu̱a̱ ye' a̱nemi.
Ye' ki̱kke̱, ye' pamik, ye' diki̱a̱, e' dör dayë ë̀me.
Dayë a̱ itö'könu tso', e' mali̱tsé̱ka̱ ye' wökir mik tai̱ë dayë shu̱a̱.
6 Ye' a̱nemi dayë a̱ dö̀ i̱ski̱ë,
dö̀ wé̱ ka̱bata bitu̱keka̱ ee̱.
Ye' ittsé tö ye' wötënewa̱ da'a̱ ká̱ dià ka̱ska'.
Erë, a Jehová, be' dör ye' Këköl,
be' dör ye' yéttsa̱ne s'duö̀wa̱ ulà a̱ deka̱ne ttsë'ka.
7 A Jehová, mik ye' ittsé tö ye' duökewa̱tke,
eta̱ ye' be' a̱ ikié tö ye' tsa̱tkö́,
eta̱ ì kiéyö, e' ttsébö be' wé buaë e' a̱.
8 Wé̱pa tö íyi diököl dalöieke be' skéie,
e'pa kë̀ tö be' dalöieku̱'ia̱.
9 Erë ye' tö wëstela cheraë be' a̱ ke̱kraë,
iyiwak jcheraë ña'we̱raëyö be' a̱ be' dalöioie.
Ye' ttè mé be' a̱, e' wawe̱raëyö.
¡A Jehová, be' ë̀ a̱ sa' tsa̱tkërmi!”
10 E' ukuöki̱ ta̱ Jehová tö nima patké Jonás tuöktsa̱ ká̱ sí ki̱, ta̱ ituéttsa̱itö.