Yëkkuö kit Pablo tö Filemón a̱
Filemón
Pablo tö yëkkuö i' kit mik ie' bak Roma s'wöto wé a̱ eta̱. E' ké̱wö ska' ta̱ ie' tö yëkkuö kit Éfeso ena Filipos ena Colosas wakpa a̱. Ie' tö yëkkuö i' kit iklé eköl kiè Filemón e' a̱. Ie' se̱rke Colosas ee̱. Ie' tö kanè méso kë̀ patue̱ta̱' ese to̱'ttsa̱ eköl e' kiè Onésimo. E' ukuöki̱ ta̱ Onésimo tö ie' íyi blëlur ta̱ ibakshkarmi. E' ké̱wö ska' ta̱ akblökwakpa ttekelur. E' kue̱ki̱ Onésimo bakshkarmi dö̀ Roma. Ee̱ Pablo tso' wötëulewa̱ Jesús tté buaë pakè kue̱ki̱. Pablo tö Onésimo a̱ Jesús tté buaë paké ta̱ ie̱rblé Jesús mik. E' kue̱ki̱ ie' shkakmine iwökir Filemón ska' ie' a̱ kët kët chökne.
E' kue̱ki̱ Pablo tö yëkkuö i' kit Filemón a̱ a̱s ie' kë̀ ulurka̱ Onésimo ki̱. Pablo tö iché Filemón a̱ tö Jesús é̱na ie' dalëne tai̱ë ena ì sulu nuí̱ tso' ie' ki̱ e' olo'ya'itö ta̱ iki'wa̱ buaë. Es ñies ie' ka̱wöta̱ Onésimo ki̱ inuì̱ olo'yök ta̱ ikiökwa̱ we̱s iyami e̱kka es.
S'kiè Onésimo griegoie e' wà kiane chè kanenamé buaë. Erë yëkkuö i' tö ichè tö ka̱m Onésimo tö Jesús tté klö'ù̱ eta̱ ie' kë̀ dör kanenamé buaë. Es Pablo tso' ichök tö Jesús batamik Onésimo dö̀mi we̱s ikiè wà kiane chè es.
1
Shke̱'wè̱
1 A Filemón, ye' dör Pablo tso' wötëule Cristo Jesús tté pakè kue̱ki̱, e' tso' yëkkuö i' shtök be' a̱. Ye' ena s'yami Timoteo, e'pa tö be' shke̱'wé̱mi. Be' dalër tai̱ë sa' é̱na, ñies be' tso' kaneblök Cristo a̱ we̱s sa' es. 2 Ñies sa' tö s'yamipa kiè Apia ena Arquipo, e'pa shke̱'wé̱mi. Arquipo dör Jesucristo tté buaë e' tsa̱tkökwak buaë we̱s sa' es. Ñies Skëkëpa Jesús icha erule daparke be' u a̱, e'pa ko̱s shke̱'wé̱mi sa' tö. 3 Skëköl dör S'yë́ ena Skëkëpa Jesucristo, a̱s e'pa e̱r buaë chö̀ ena se̱ne bë̀rë mù a' a̱.
Pablo tö wëstela ché S'yë́ a̱ Filemón ki̱
4-5 Ye' tö be' tté ttsé tö be' e̱rblöke buaë Skëkëpa Jesús mik, ñies s'batse'r male̱pa ko̱s dalër be' é̱na. E' kue̱ki̱ mik ye' ttöke Skëköl ta̱, eta̱ ke̱kraë wëstela chekeyö be' dalërmik. 6 Ttè mik se' e̱rblöke e' a̱ be' e̱' tkö́wa̱ buaë s'yamipa ta̱ ñita̱. Ye' tso' ikiök Skëköl a̱ tö e' wa ì buaë ko̱s wè̱misö Cristo dalërmik, e' a̱r be' é̱na. 7 A yami, s'batse'r male̱pa ko̱s e̱r pableke be' tö buaë, ie'pa dalër tai̱ë be' é̱na. E' tö ye' ttsë'we̱ke buaë, ttsëskua ye' e̱r deka̱ne.
Pablo tö Onésimo tté ché Filemón a̱
8-9 E' kue̱ki̱ ye' tö be' a̱ ikiè e̱r bua' wa tö ì kiekeyö be' a̱, e' wà ú̱. Cristo tö ye' a̱ ka̱wö mé be' kök iu̱k. Erë se' ñì dalër tai̱ë, e' kue̱ki̱ ye' tö be' a̱ ikieke e̱r bua' wa. Ye' dör Pablo këkëpatke tso' wötëulewa̱ Cristo Jesús tté pakè kue̱ki̱ e'. 10 Ye' be' a̱ ikiè tö Onésimo sa̱ú̱ne e̱r bua' wa. Ie' e̱rblé Jesús mik ye' ttö̀ wa í̱e̱ wé̱ ye' tso' wötëule ee̱. E' kue̱ki̱ ie' dör we̱s ye' alà es.
11 Kuaë ta̱ ie' bak be' wa̱ to̱ulettsa̱ be' kanè mésoie kë̀ dör ìie bua' be' a̱, erë i̱'ñe ta̱ ie' dör buaë be' a̱ ñies ye' a̱. 12 Ie' dalër tai̱ë ye' é̱na, erë ye' tö ie' patkémine be' a̱. 13 Ye' a̱ ta̱ imú e̱' tsù̱a̱t ye' ta̱ ye' ki̱moie be' skéie ye' tso'ia̱ wötëulewa̱ Jesús tté buaë pakè kue̱ki̱ e' dalewa. 14 Erë kë̀ ye' é̱na ì wa̱k ka̱m be' tö iké̱wö mù e' yöki̱. Ye' ki̱ ikiane tö ì we̱ke be' tö, e' ù̱bö be' wák e̱r wa, kë̀ dör tö ye' tö be' ké iu̱k e' kue̱ki̱. 15 Isalema ie' minea̱ be' yöki̱ ekuölö ë̀ a̱s idöne tso' be' ta̱ ke̱kraë. 16 Erë ie' dene e' kë̀ dör kanè mésoie ë̀, ie' dene be' yamiie Jesús ttè wa dalër tai̱ë be' é̱na, e' dör buaë shu̱te̱ kanè méso ëse tsa̱ta̱. Ie' dalër tai̱ë ye' é̱na, erë ie' dör be' kanè méso, ñies ie' dör we̱s be' ël es Jesús wa. E' kue̱ki̱ be' ké idalëritsök, ye' tö idalëritseke e' tsa̱ta̱.
17 Be' tö ye' klö'wé̱ be' yamiie Jesús mik e̱rblè e' wa, e' ta̱ ie' klö'ú̱ we̱s ye' wák es. 18 Ie' tö ilè sulu wamblë' ö be' tö ie' ña'we̱ke ilè kue̱ki̱, eta̱ ye' ña'ú̱ iskéie. 19 Ye' dör Pablo tso' yëkkuö i' shtök ye' wák ulà wa, e' wák tö ie' nuì̱ patue̱raë. Kë̀ ye' é̱na ichak, erë kë̀ be' é̱na ichökwa tö ye' ttö̀ wa be' tö Jesús tté klöo̱', e' kue̱ki̱ be' wa̱ nuì̱ ta̱'ia̱ ye' a̱. 20 A yami, be' we'ikèyö, be' mú e̱r buaë chö̀ ye' a̱ Skëkëpa Jesús dalërmik. Ye' e̱r pablö́ Cristo batamik.
21 Ye' wa̱ ijche̱r buaë tö be' tö ye' iu̱teraë, e' kue̱ki̱ ye' tso' yëkkuö i' shtök be' a̱. Ye' é̱na ia̱ne buaë tö ì kiéyö be' a̱, e' tsa̱ta̱ be' tö iwe̱raë. 22 Ñies Skëköl mú tö ka̱wö mè ye' a̱ a' pakoie we̱s a' tso' ie' a̱ ikiök es. E' kue̱ki̱ u yulö́ ye' a̱.
Pablo e̱' chéa̱t
23 Epafras tö be' shke̱'wé̱mi. Ie' tso' wötëule ye' ta̱ Cristo Jesús tté pakè kue̱ki̱. 24 Ñies Marcos, Aristarco, Demas ena Lucas, e'pa kaneblöke Skëköl a̱ ye' ta̱, e'pa tö be' shke̱'wé̱mi ñies. 25 A̱s Skëkëpa Jesucristo e̱r buaë chö̀ be' a̱.