Sikeigna Na Letasi Nigna
Jon
Na Titiono Eigna Na Letasi Iaani
Imanea ke risoa na letasi iaani ke boi vele aua na ahagna, keana mara puhidia na komi tinoni kiloau i hau kena velea a Jon, na mane vaovarongo nigna a Jisas, ke risoa. Imanea ke risoa mua na Rorongo ke Toke nigna Jon ma na buka Tate Au.
Jon ke risoa na letasi iaani tadia na komi tinoni kiloau eigna ke magnahaghinira kedana talu mono haidu toetoke duagna a God ma a Dathegna, Jisas Krais. Jon ke velera gi kedana magnahaghinia na eiagna iangeni, imarea kedana leghua na komi vetula nigna a God mena veidothovighi.
Jon ke magnahaghinira mua na komi tinoni kiloau eigna kedana boi leghua na komi velepuhi piapilau. Kekeha mara na velepuhi piapilau kena vaututunia na komi fata kati tangomana na tangoliagna kori maramagna ke dika. Ma na vunegna iangeni imarea kena velea a Jisas boi na pukuni tinoni kori tono ke vaghagna na tonoda igita. Kori letasi iaani a Jon ke velea na komi velepuhi piapilau vaghagna iangeni ke tangomana na vadiadikalagna nidia na vaututuni arahai kena leghura. Mi manea ke tateli aua toetoke a Jisas ke havi mai kori maramagna kori tonogna na tinoni.
Na komi fata ke nagho kori letasi iaani:
God ke raraha mi ighita katida leghua na puhigna a Krais (1:1-2:29)
Na puhida ke tateli aua ighita ara dathegna a God ba ara dathegna a Satan (3:1-24)
Na puhi bali ghithathara mara na velepuhi piapilau (4:1-6)
Na dotho ke mai tagna a God (4:7-21)
Jisas na hangana bali hatia na havi ke teo na govugna (5:1-21)
1
A Jisas Na Haghore Ke Tatelia Aua Na Havi Ke Tutuni
1 Inau ku risoa atu itamiu eigna na Haghore ke hera na komi tinoni na havi ke tutuni. Imanea ke kidi mono ghohi kori turughugna na komi fata gougovu. Keana ikeagaieni, ighami kiti rongovia miti dorovia kori matamami miti tangolia imanea kori limamami. 2 A God ke tatelia imanea ke hera na komi tinoni na havi ke tutuni. Ighami kiti dorovia kori matamami miti titionoa na hava ke tutuni eigna imanea. Ighami kiti titionoa imanea keda talu mono hahali, mi kori turughugna mai imanea ke mono duagna a God a Mama, kari ikeagaieni a God ke tatelia imanea vanighami. 3 Ighami kiti titionoa vanighamu na mane kiti dorovia miti rongovia eigna ighamu kotida sikei duamami. Mi ighita gougovu kati sikei duadia a Tamada ma Jisas Krais a Dathegna. 4 Inau ku risoa na letasi iaani vanighamu eigna katida pukuni totogo.
God Ke Talutavogha Na Paluhada
5 God ke raraha puala me teo sa puni itagna. Na rorongo iangeni kiti rongovia tagna a Krais miti titionoa vanighamu ikeagaieni. 6 Gi katida velea ighita kati mono duagna a God, keana ighita kati talu mono mua kori puni, ighita kati piapilau vamua mati boi leghua na haghoregna a God ke tutuni. 7 Gi katida mono kori raraha vaghagna a God ke mono kori raraha, na nida na mono haidu ke toke. Ma na ghaughabuagna a Jisas, a Dathegna a God, ke vararahaghita tagna na komi koakoa.
8 Gi ighita katida velea ighita kati bosi eia na komi fata ke dika, ighita kati pilaunighita gheheda ma na tutuni ke boi mono itada. 9 Keana, gi katida titiono aua na komi paluhada tagna a God, imanea keda talutavogha na paluhada, mi manea keda vararahaghita tagna na komi fata ke dika kati eia. Imanea keda eia iangeni eigna ke eia hahalia na hava ke taluhaghorea ghohi me eia na komi fata ke jino. 10 Gi katida velea kati boi koakoa, ighita kati velea a God ke piapilau eigna a God ke velea ighita gougovu kati koakoa. Gi katida velea iangeni, nigna na haghore a God e boi mono kori havida.