2
Bajobo giawo
1 Ji-è gethek shii ne ruang afen yi pha ji pha chiang shii gethek è yoijong pha izai shii chuh è khoh chid. 2 Gethek blangthek shii hamangkhliiethek è miyaogam phi pha jine zai shii doh yi, chiih-è hanyie è arekgieng, anuii pho ithek shii ne lago mua ro. 3 Gethek è Bajobo giawo shii isiie arek arone khi-è-rek ne, yoh ne khia magey phlei? Ithong awai igobi giawo hì yao bi, chiih-è hanyie è aishii hì yoi gathek ne izai rone khagi rek phi. 4 Ji pha ishak shii buangthek nane wiengthek pha zab ichuathek rek pha ji è chiih-è awai è yang pha Ragung So pha lasen ji thang pha ji è Hamangkhung-aphuii awai ro khagi shii de lao phi.
Hanyie jia è gathek shii giawo hà noh phi
5 Hamangkhung-aphuii è hamangkhliiethek shii gethek è nyie yao ramuii pha sohjambling ji shii iwo sohjambling thog ramuii pha ji shii kho pha aphi ro. 6 2:6: Chng 8:4-6Ji pha chiang shii, jigi shii yao pha duiine:
“Hamangkhung-aphuii wo, bran ne nyie ga, na ne ithek shii now bo;
Ai ne bran bie ro, na ne ithek shii gayiig chid habey?
7 Na è aishii ne ìujia ishak pha hamangkhliiethek è ìu rab;
na ne aishii ilab nane biisiie rog shii rago khak phi;* 2:7: Bajo jigizey ne dog: Na è ithek shii ne khophothek rab zab na è rab pha ji (riig Chng 8:6).
8 chiih-è aishii ne zab manathek shii bohkhophothek rab phi.”
Hì è yao jine Hamangkhung-aphuii è aishii “Zab manathek shii bohkhophothek rab phi” Ji pha miyao è ne zab ne sang è lua ro, jimagunde Gethek ne thuh de bran ne zab manathek shii bohkhopho pha adoh ba ro. 9 Jishii Isu shii doh. Hanyie shii ai de ìujia ishak hamangkhliiethek è ìu rab ro, ji è Hamangkhung-aphuii ro bushun è ai ne zab chiang iy dun. Airo iy pha diig chiang ji è ai ne thuh rago rog pha biisiie nane ilab mua pha aishii doh muii ro. 10 Bajo aniphiing shii noh srane airo biisiie ji thang pha diig ji è Isu ne isiie rab chid. Hì pha blia rek pha ne Hamangkhung-aphuii shii rangsua um bie ro, nyieliieshii ai ne rab pha nane zab shii ruii ro. Ithek shii giawo hà noh pha ne Isu jia bie ro.
11 Ai ne branthek shii awaithek layogthek è sud phi, chiih-è nyimanyi ai nane hanyie shii igang rabjong pho ne ò Aphuii ro. Ji è Isu ne ithek shii awai ro haliingpho rone ho pha ji shii ne awo ruii phro. 12 2:12: Chng 22:22 Ai è Hamangkhung-aphuii shii yao,
“Gune gui khuiinothek shii na è nyie rekjong phi pha ji yao phi pha ro;
Gu ne na shii ithek ro male shii chiong phi pha ro.”
13 2:13: Aij 8:17 (LXX); Aij 8:18 Ai è de yao, “Gune guiro migi Hamangkhung-aphuii shii ruii pha ro.” Chiih-è ai è de yao, “Ichiih shii gu ne Hamangkhung-aphuii è phi pha aniphiing rog shii ro.”
14 Ai è ithek shii aniphiing rone ho phane, ibey nane ifai bran ro, Isu awai de ithek duiine rey dun ne ithek tharohthamang ziig ji shii thang. Ai è ji rek pha jine nyieliieshii airo iy pha ji è hanyie shii iy pha blu um pha ibuii shii ai ne srobro rek mua pha ji rek, 15 nyieliieshii iy pha ji è rum ne hanyie yi awaithek ro chai khiaothek rek pha ji è ichad phi. 16 2:16: Aij 41:8-9 Hì ne sang ai è nong phi pha jine hamangkhliiethek asi ro. Ji phachiang ai è, Abraham riingthek shii ne nong phi. 17 Hì pha miyaosiu è airo Hamangkhung-aphuii blia shii branthek ro layogthek ne khung mua phi pha ithek ro migithek nane bushunthek pha kho Phabi rey pha zab pha lumuii shii airo khuiinothek duiine rey dun. 18 Chiih-è thuh ai ne hanyie chuajan ithek shii nong mua phi, nyieliieshii ai awai de chuajan nane diig rekjong.