2
Masi ro jum nane bohthek
1 Nathek ro chai shii Masi è nathek shii gang rab phi, chiih-è airo miie è nathek shii liijiing rek phi. Nathek ne Ragung* 2:1: Nathek ne Ragung rog shii òsia um ro; dinne Ragung è nathek shii ò sia hà noh phi ro. rog shii ò rek bo, chiih-è nathek ne nawaithek chung bushun nane zo rai bo. 2 Chiihphado, gu nathek shii khung, ò nowthek, ò miie shii thang rai, chiih-è ragung nane khani shii ò rek ne gu shii zab sang yi pha rab mage bo. 3 Nyigodog rek pha munyua miiyang nane buii chid pha ji arek rabo, jimagunde nawaithek chung jum rek rai bo, idang nawaithek shii è ne gai wie ba rone now bo. 4 Chiih-è nawai shii asi bie pha, nawaithek chung nyu rai pha ji shii riig bo. 5 Nathek shii nyie ziig um pha ji ne Masi Isu shii um pha jia ji ro:
6 Ai ne idang Hamangkhung-aphuii shii ziig um,
Jishii ai ne Hamangkhung-aphuii rog shii ò rek pha bangchiie anow† 2:6: noh din yi; dinne dun ruii, thogruii. ro.
7 Ji pha chiang shii awai ro thaluii yang ne awai
shii nyie um pha ji zab thoh muii chiih-è khiao pha ziig yie.
Ai ne tharothamang duiine re srane
chiih-è tharothamang duiine dong khlei
8 Ai ne jum chiih-è iy bsa thog dang pha— nuii pha lumuii shii lua
chiih-è bai hà iy bsa thog dang pha de nuii pha lumuii shii lua
9 Ji pha chiang shii Hamangkhung-aphuii bajo giu ithua lakhung shii aishii hòi phi
chiih-è gai è boh ibeng aishii phi muii.
10 2:10,11: Aij 45:23 (LXX) Chiih-è ji è Isu beng shii
hamangkhung shii um pha ji, sohjambling shii um pha ji,
chiih-è sohniak pha ji shii ne ai lagiungthek shii niing ‡ 2:10: sohjambling luii: hamangkhung shii um pha ji, soh shii um pha ji. ruii phro.
11 Chiih-è Hamangkhung-aphuii pha Aphuii ro biisiie pha,
Isu Masi Ithong rone zab ne hong ne yao ruii phro.
Sohjambling shii muchuangthek duiine khlieng bo
12 Ji-è chiihphado, bushun ijakthek, gu nathek rog um shii nathek è gu shii idang nuii phi, thuh gu nathek è ruang shii nathek gu shii nuii phi pha ji ne muna mugak ba ro. Nawaithek ro giawo ji zab rek pha rum ne sam pha rog shii rek bo, 13 nyieliieshii Hamangkhung-aphuii ne idang nathek shii blia rek ne chiih-è yang rab ne awairo blia shii nuii yi pha rab phi ro.
14 Phosro nane akhnaing pha zab rek bo, 15 2:15: Iphy 32:5 ji è nathek ne hanyie yi awie pha sohjambling nane layog bran shii rai pha ji è, ichiig oi pha nane igang Hamangkhung-aphuii ro isiie ani rey bo. Nathek è chai pha mua ithek shii phi pha duiine, nathek ne hamang hà dadiangthek chuang pha duiine ithek lakhung shii khlieng chid. 16 Ji-è nathek rek arone, Masi pha Inai shii nathek shii wiangwe rek pha chiang um ruii phro, nyieliieshii hì è ne zab gu miwiang nane blia ne adobo arey rone doh yi phro.
17 Yangne guro chai ifai sun phi pha duiine khlem phi shii nathek ro migi yi Hamangkhung-aphuii shii phi bo. Ji-è ji ne ji arone, guro lised ne guro lubo ne nathek zab rog shii thang. 18 Ji duiine, nathek ne lised bo chiih-è nathek ro lubo ne gu rog shii thang bo.
Thimothi nane Ephaphrodithus
19 Hì yi Ithong è yang arone, gu ne luthong Thimothi shii khthiie gu ne nathek hà thoh mua, ji è gu ne nathek chiang pha mua è lububo rek. 20 Ai ne jia ro hanyie è gu muthanthek shii thang chiih-è hanyie yi izai nathek chiang shii gayiig phi. 21 Zab ne awaithek ro phua shii samdiig bie ne, Isu Masi chiang rog shii asi ro. 22 Chiih-è ai ne awairo blia ne igong shii nyie khi-èrek ne khagi rek pha ji nathek nawaithek ne thieg, nyie khi-èrek ne ai nane gune, dufuii nane awai aphuii duiine mua chiang shii ò blia rek. 23 Ji-è gu ne thieg nyie khi-èrek ne zabthek ne gu chiang thog ruii ne aishii ne nathek hà khthiie thoh ge pha gu ne luthong ro. 24 Gu gui ne nathek shii khthiie wuii mua ruii phro ne gu ne Ithong shii migi rek.
25 Gu è nowjong gathek ro ikhuii Ephaphrodithus shii nathek hà thoh ge phane mugak ro, hanyie yi blia rek ne gu chiang shii ragung pha mak rek ne hanyie yi nathek ro muapho duiine gu shii nong phi ne blia rek phi ro. 26 Ai ne nathek zab shii bajo riig yang chiih-è bajo samdiig rek nyieliieshii ai ne rad muii rone nathek ne yoijong.
27 Zai ai ne rad ne achiih iy pha rek ro. Jishii Hamangkhung-aphuii aishii bushun rek, chiih-è aishii asi bie pha jimagunde gu shii de rek phi, chiih-è dinne muna duhug shii de ragia rek phi. 28 Chiihphado, gu ne aishii nathek hà thoh ge pha zab muna yangmuii ro, ji è nathek ne dinne aishii riig mage shii lised ruii phro, chiih-è gui ro duhug ne jongdun ro. 29 Chiihphado, Ithong shii khuiino duiine, lubo rog, aishii choi bo. Ai duiine rek pha zab bran shii ilab doh yi bo. 30 Nyieliieshii ai ne nawaithek è aphi mua pha nong ji gu shii phi pha, awai chai shii Masi ro blia chiang è achiih iy pha jiriak rek.