1 Chiihphado guiichiieng pha hamangkhliie è awairo thu-ung thud mage. Gu è dadiang yi sohnyiak hà chiih pha doh, chiih-è ji shii bajo jam ihiung pha ziuwad phi.* 9:1: Jam ihiung: Bajo jam ihiung pha sohnyiak hà sakhathong shii iidohè pha lago aphi sapho shii thiisa hà phatheg hà chab muii ro. 2  9:2: Igo 19:28 Dadiang è bajo jam ihiung shii hong, chiih-è mukham yi boh bai fu pha ji è khia pha duiine, mukham yi jihà kham; hasiang ichuang nane hasam ne bajo jam ihiung pha mukham ji è igiia rey dun. 3  9:3: Mul 10:12-15 Muroma yi mukham è sohnyiak lakhung shii chiih, chiih-è ithek shii ne ragungphiethek shii um muii pha ò ichua pha blu phi. 4  9:4: Ezkh 9:4 Ithek shii ne saingthek, dinne hingmuiithek dinne nyie misiengthek shii de amua yi rabo ne yao; ithek ne bran hanyie shii Hamangkhung-aphuii ro nab pha cheb yi ithek khrugthek lakhung shii oi pho shii ne diig rek bie bo. 5 Muromathek ne ji pha bran shii a-ua yi, jishii habie guii ithek shii diig phi yi. Ithek shii diig rek ne riie pha jine ragungphie è thak pha duiine riie pha ji ro. 6  9:6: Job 3:21; Jeri 8:3 Ji pha habie guii shii ithek ne rad ne iy pha sow ruii, jishii adoh ruii phro; ithek ne iy pha yang ruii phro, jishii iy pha jine ithek è khey maruii phro.

7  9:7: Jol 2:4 Muromathek ne suthuiithek yi mak shii saro pha duiine doh ro; ithek ro khrugthek shii ne san pha ragothek um pha mia, chiih-è ithek ro miziathek ne tharohthamang ro miziathek mia. 8  9:8: Jol 1:6 Ithek ro khaziang ne ho-amuiithek ro khaziang duiine mia, ithek ro shinying ne bargithek shinying mia ro. 9  9:9: Jol 2:5 Ithek ro lubuthothek ne shiie pha khugthek è chiieg pha duiine doh, chiih-è gow yi ithek ro iyigthek è bajo sthuh gariie yi mak shii rone ran pha duiine ro. 10 Ithek shii inyuithek um chiih-è ragungphie ro iyig duiine ro, chiih-è hìne ithek ro inyuithek rog shii ithek shii ne branthek shii habie guii diig phi pha blu um ro. 11 Ithek lakhung shii saja khoh pha ne jia um ro, hanyie jine bajo jam ihiung pha ilkhi hamangkhliie ro. Airo ibeng Hebriu shii ne Abadon; Grekh ibeng shii ne Apholion (Miyaosiu ne Srobrophothek ro).

12 Igobi pha bajo diig ne jong sha ro; ji pha iidoh shii bajo diigthek nyi ne wuii ba ruii ro.

13  9:13: Mul 30:1-3 Chiihphado riigchiieng pha hamangkhliie è awairo thu-ung thud mage. Gu è goh yi Hamangkhung-aphuii ibi shii riu pha san sraibao ijiuthek wi è ro pha yoi. 14 Goh è riigchiieng pha hamangkhliie shii yao, “Hanyie hamangkhliiethek wi shii Euphrathes khoboh shii phang muii pha ji shii thoh phi bo!” 15 Hamangkhliiethek wi shii ne sey ge; chiih-è ji pha ishak shii ji pha inai shii ji pha habie shii ji pha idam shii zab pha uomrang tharohthamang shii ua pha sarojong. 16 Inpho pha siphahithek khama um pha jine gu shii yao: hìne wieng nyi million ro. 17 Gu ibang shii gu ithek ro sthuhthek nane ithek ro inphothek shii doh: Ithek shii ne bai duiine ishaig khugthek um, iphi igong lubao duiine, chiih-è ijoi barud duiine ro. Sthuhthek khrug ne bargithek khrug duiine ro, chiih-è ithek ro semthek è ne bai, miikham, nane barud khia khlei. 18 Uomrang pha tharohthamang re-è jiarang shii ne awie pha muathek uom ji è bai, miikham, nane barud ne sthuhthek semthek è khia khlei ne ua muii. 19 Chiih-è sthuhthek ro blu ne ithek semthek shii nane ithek inyuithek shii de um. Ithek ro inyui khrugthek um pha phamthek duiine ro, chiih-è ithek è ithek shii khoh srane branthek shii diig phi.

20  9:20: Chng 115:4-7; 135:15-17; Dan 5:23 Khey pha tharohthamang, zab hanyie shii ji pha awie pha muathek è a-ua ba pho ne, ithek awaithek è rab pha ji è akhid ro. Ithek ne Ibuiithek shii sia pha ne agak ro, chiih-è san, luman, lubao, nane hing, hanyie yi ariig mua, ayoi mua, dinne alua mua pha jangbangthek shii misiasia pha de agak ro. 21 Ithek ne awaithek ro sgohthek re-è, awaithek ro jadu re-è, awie pha siulao re-è, dinne awaithek ro mugo lubu akhid ro.