1 Nawai bran shii bohkhophothek shii phi pha chiih-è riichaithek shii nuii pha nowkhlei yi bo, chiih-è zab lumuii shii wie rek pha saro yi bo. 2 Hanyie shii de buii ayao yi rabo, jishii liijiing nane zab rog dung ne rai bo, chiih-è zab shii idang ziig mieng è doh yi bo. 3 Gethek de luang jia shii ne bi-ìe, anuii pha rek chiih-è khinrindun. Gethek de awie pha chid pha nane zab awie pha ichuathek shii sangmiie ne rai, pha ji shii khiao rek. Gethek de makhak-riing nane siakjo shii sieng ne rai; chiih-è gaithek è gathek shii khiijai chiih-è gethek è de ithek khiijai. 4 Jishii gethek ragia pha Hamangkhung-aphuii ro bushun nane miie ji dong mage shii, 5 ai è gethek shii ragia rek phi. Jishii hì ne gethek è nyie wie rek pha ji è asi ro, jishii hanyie è awai Ragung So è sud ne gethek shii iwo giak nane iwo chai phi. Chiih-è awai ro bushun ji è gethek shii ragia rek phi. 6 Hamangkhung-aphuii è gethek ro ragia Isu Masi ji pha chiang è gethek shii Ragung So leyphrid thoi phi, 7 ji-è airo bushun è gethek de Hamangkhung-aphuii rog shii khriig rai mua ne gethek luthong pha idang pha chai shii mua ruii phro. 8 Hì ne zai yao.

Gu nathek shii hì pha miyao è wie chuh phi pha yang ro, ji-è hanyiethek ne Hamangkhung-aphuii shii migi rek pho ne, nyie yi wie blia shii rek pha nyie yi wie nane zab è kho pha ji shii isiie rek mua ro. 9 Jishii bi-ìe pha khnaingthek, phiang blangthek ro sasab, guithek, chiih-è Iphey chiang mak rek pha ji de thoh muii bo. Jithek pha ne blia adunmey pha nane ibid oi pha ji ro. 10 Hanyiethek che pha rek pho shii nyichiieng phriie bo, chiih-è chiihphado ji è muna rek pha nyie oi sha phro. 11 Nathek ne thieg è-rek pha bran ne awiedang ro, chiih-è ithek layog è ne ithek ne asi rone doh yi.

12  3:12: Blk 20:4; Iphi 6:21,22; Khol 4:7,8; 2Thi 4:12Gu è Arthemas nane Thychikhus nathek hà thoh shii, Nikhopholis hà gu hà wuii yie pha na ne bajo bidiang bo, nyieliieshii gune hakhangshak shii thiisa hà rai pha phakjong ro. 13  3:13: Blk 18:24; 1Khor 16:12Nathek ne Ipheypho Zenas nane Apholos isa ro luachiug pha ji ne jao yie pha nawaithek ne bajo bidiang bo, chiih-è ithek nyie chid pha ji shii zab riig bo. 14 Gethek bran de nyie wie ji shii ishak phi pha dab chid, ji-è izai chid pha ji phi mua; ithek ne thaluii pha chai asieng chid phro.

15 Hanyie yie gurog shii um pho zab è nathek shii salamthek thoh ge ro. Gathek ro salamthek de migi pha gathek ijak shii phi bo.

Hamangkhung-aphuii ro bushun ne nathek zab shii um bo.