19
Ilaidiya ya Gela Lau Sainai Tuꞌana
1 Kin 19:1-9
1 Ahaba ya mahano luma yai, Ilaidiya ginauli mahudoꞌina ya ginauli wasadi Desabela ena ya dede. Habahim ena ya liba komakoman, sidohana Baineti yai Baꞌala edi peloweta mahudoꞌina ena wunuwunuidi. 2 Be Desabela wasa tau lawenna ya dui ya lau Ilaidiya lisina, iyen,
Bobon maihala doha ite yau haba E wunuim doha peloweta wa wunuidi. Yena yau hige ya ginauli, yaubada hahaisa haba sa fakamkamnagu yo hinaga sa wunuigu.
3 Ilaidiya ya ꞌwasabu be ya gela ya lau Belesiba, mwahulina debana yai. Diuda Nuꞌuna yai ya mahano be amainiya ena tau paisowa ya lau afulen.
4 Na lahai esega ya lawen ee–, ya mahano nuꞌu pitapitalina yai, yo fede, ya lau oyagi kiukiu hesana uyaꞌuya ubuna yai ya taꞌai, na ya anꞌeta bena ya peꞌi. Iyen,
Guyau, Yau aꞌai! Egu mwahuli u abifahi aho te, paꞌana yau doha afa wahagu hige ai loholoho.
5 Yo fede ya eno lidi.
Ma esega na anelu ya abiꞌona, na ya faliba iyen,
U obiyo be u anꞌan.
6 Ya mainene taꞌiꞌili na kuluna sadaina yai fwalawa tegategana maniꞌo yai sa gabu yo ile ma hoꞌowana sa otaꞌota ya itadi. Yo fede ya anꞌan yo hoꞌowa ana ya nom na ya eno fuyo.
7 Habahim Guyau ena anelu ya fuyoma ya abiꞌona fuyoi na ya faliba iyen,
U obiyo be fwalawa am hesa u an. Em adau te ya lofa.
8 Yo fede ya obiyo ya anꞌan yo hoꞌowa ana ya nom. Ya adidili be lahai 40 yo iꞌipa 40 ya lawen ee–, ya mahano Sainai Tuꞌana yai. Tuꞌana mate Yaubada ena tuꞌa. 9 Maihonana ya lau duyufi yai ya eno.
Guyau Ya Tau mahata Ilaidiya Lisina Yai
1 Kin 19:9-18
Habahim Guyau ya faliba iyen,
Ilaidiya, somo amaiteꞌi wa ginaginauli?
10 Ilaidiya Guyau alinana ya bui iyen,
Gigibwali Yaubadana, fuya ouꞌouli um moho em E paisowa. Isalaela dodogadi em yali otaꞌota fahina sa ꞌwaiyoꞌoꞌen, em antalasam katakatandi sa dem fahifahidi yo em peloweta sa wunuidi. Yau ibogu moho, na aho te bena sa wunuigu hinaga.
11 Yo fede Guyau iyen,
U lau u obiyo ai matagu paꞌana haba E bayawa.
Ilaidiya ya obiꞌobiyo na Guyau ya bayawa, yo fede hwayahwayau adiꞌadidilina ya towa lau oya yai be ya lubi dailidi yo umeꞌehu ya lubi gisigisidi. In moho Guyau hige hwayahwayau ganahewana yai. Hwayahwayau mulina yai mate mwanuꞌunuꞌu, na Guyau hige mwanuꞌunuꞌu ganahewana yai hinaga.
12 Mwanuꞌunuꞌu mulina yai, oyagi alaꞌalana, in moho Guyau hinaga hige oyagi alaꞌalana ganahewana yai. Oyagi alaꞌalana mulina yai, faꞌatu fenafena daudaumwalina, 13 Ilaidiya ya atahi. Yo fede ana luhuluhu ya solu hitiꞌi be nenena ya fakou, na ya lau duyufi aba luhuluhu launa yai ya obiyo.
Habahim alina hesa ya atahi iyen,
Ilaidiya, somo amaiteꞌi wa abiꞌabiꞌi?
14 Ilaidiya iyen,
Gigibwali Yaubadana, fuya ouꞌouli um moho em E paipaisowa. In moho Isalaela dodogadi em yali otaꞌota fahina sa ꞌwaiyoꞌoꞌen yo em antalasam katakatandi sa dem fahifahidi na em peloweta baineti yai sa wunuidi. Yau ibogu moho na aho te hinaga bena sa wunuigu!
15 Guyau ya faliba iyen,
U fuyo em aba laoma yai be u lau nuꞌuna pitapitalina hesa Damaseko sadaina yai. Yena wa mahano, oliwe masina u abi be u fagoi Hasaela ai boluboluna. Haba ya famala Siliya edi kin.
16 Yo Nimsi natuna, Dehu boluboluna yai hinaga u fagoi. Haba ya famala Isalaela edi kin, yo Safata natuna Ilaisa, Abela Mehola dogana ai boluboluna hinaga u fagoi. Haba ya lau fadamahim, in peloweta.
17 Yena sai hesa Hasaela lebena yai ya gela, Dehu haba ya wunui, na salumadi Dehu lebena yai sa gela, Ilaisa haba ya wunuidi. 18 Na Isalaela ouꞌoulidi 7,000, - salumadi hige ti laulauꞌuꞌula lau Baꞌala lisina e oitaudi haisa lisidi.
Guyau Ilaisa ya Fagabi
1 Kin 19:19-21
19 Ilaidiya amainiya ya lau Safata natuna, Ilaisa ya lobahi, gabu laꞌilaꞌina yai tanohi ya giyagiyali. Gabuna yai mate tatau safuhudohudoꞌi luwaga, taumoho esega - esega ena bulumakau luwaga gabu yai sa paipaisowa. Bulumakau ofiꞌofidi luwaga maꞌedi Ilaisa sa mulimulita. Ilaidiya ya lau lebena be ana luhuluhu ya pei lawen Ilaisa dabayalona yai.* Fuyana luhuluhu ya pei lawen dabayalona yai, aniyona mate in ya famala Ilaidiya ena tau paisowa. 20 Yo fede ena bulumakau ya lau afuledi na Ilaisa ya tafo watan na iyen,
Hola ya lau tinagu yo tamagu ya falafudi yo ya lau aiyoniyedi habahim E lau watanim.
Ilaidiya ya libalau Ilaisa lisina, iye,
U fuyo, in moho somo E ginauli lebem yai, mate u nuwanuwatuhui.
21 Habahim Ilaidiya ya lau, na Ilaisa ana bulumakau ya abidi be ya wunuidi. Aba giyagiyali oyagina yai, oyagi ya yufi be bulumakau amainiya ya gabudi be dodoga ya feledi sa andi.
Habahim Ilaidiya ya famuli watan be ya famala ena tau paisowa.
*19:19 Fuyana luhuluhu ya pei lawen dabayalona yai, aniyona mate in ya famala Ilaidiya ena tau paisowa.