10
Koniliyesi Tautau ya Ita
Paisowa 10:1-8
1 Doga hesa hesana Koniliyesi mate Sesaliya taonna yai ya miyamiya. In mate hiyala tau lau kulukuluwenna na ena tau hiyala pelena hesana “Itali Ledimenti.”* Ledimenti esega ganahewana yai mate tau hiyala ouꞌoulidi 600. 2 In mate Yaubada tau fafaꞌatitiyenna hesa yo in maꞌana boga mahudoꞌidi Yaubada sa fafadebasae. Yo hinaga Diusi dodogadi tau fagogo gesagesa ya saguhi komakomanidi yo fuya ouꞌouli ya laulauꞌuꞌula lau Yaubada lisina. 3 Fuya hesa lahai laꞌi doha 3 koloki, tautau hesa ya ita. Yaubada ena anelu ya ita wananahai, ya laoma lisina be ya faliba iyen,
Koniliyesi!† Eno suwai mate sa eno na sa eno suwai. Tautau sa ita mate begana doha sa eno suwai, in moho sa tuhutuhuli na tautau sa ita. (Paisowa 2:17)
4 Koniliyesi ma ꞌwasabuna anelu ni ya kinokinoi lauwen na iyen,
Baꞌisa, sidohana?
Anelu, Koniliyesi alinana ya bui iyen,
Em lauꞌuꞌula yo em faisagusagu tau gogo gesagesa lisidi yai mate ya famala em ainauya aba fafanuwa hiti Yaubada lisina yai.
5 Doꞌata te, tatau haisa u fatamalidi ti lau Diyopa be taumoho hesana Saimon, hesana hesa Pita, ti foyahiyama. 6 Ena falihesa ena luma gabogabo sadaina yai maꞌena sa miyamiya. Saimonna mate in suisui ꞌwapidi tau abiꞌabi nonohaidi. Saimonna mate in suisui ꞌwapidi tau abiꞌabi nonohaidi. ‡ Liba tefana ite: “Laulau somo bena wa ginauli haba ya falibamiu” Kin Diyemsi Bukana yai sa uli yo sa uli hinaga Suau Bukana yai. Buka boludi hige amainiya ti uli.
7 Anelu ya libaliba ofi mulina yai ya lau na Koniliyesi ena tau lau fayofayo luwaga yo ena tau hiyala hesa ya yogaidi. Ena tau hiyala ni Yaubada ya tabataba ohuwen yo Koniliyesi enehena ya paisowa. 8 Somo ya tubu ni edi ya liba. Habahim ya fatamalidi sa lau Diyopa.
Pita, Tautau ya Ita
Paisowa 10:9-16
9 Bobonna lahai laꞌi yai, Diyopa sa hanahanauꞌi. Pita mate in amainiya na ya hasai luma hewana bena ya lauꞌuꞌula. 10-11 Ya guliyam be ya fanuha bena somo ana ya an. Kalahe hola sa abiꞌabi nonohai na tautau ya ita. Galewa ya tasoꞌe ya ita na ginauli hesa nenena doha kaleko laꞌilaꞌi duduna fati sa fadalolo lidiyeyama. 12 Ganahewana yai mate suisui fafaꞌahedi fati, ginauli kamokamodaladi yo kanekanenedi yo ataiꞌa yekoyekodi hinaga. (Aba Fatubu 1)
13 Alina hesa ya libalau lisina iyen,
Pita, U obiyo u wunui be am u an!
14 Na Pita alinana ya bui iyen,
Guyau, hige gonowana! Somo dabudabu hige ya anꞌandi.§ Buka yai te ginauli dabudabudi sa uli lidiyen ya famala Isalaela edi laugagayo be tabu ti kalahe gaibu. (Lewitikusi peina 11)
15 Alina wa ya liba boda lau Pita lisina iyen,
Somo Yaubada ya faloholoho te an. Tabu u kawa dabudabuwen!
16 Ma faihona doha ite habahim ginauli te sa fafuyo hasaen galewa.
Pita yo Wasa Tau Lawenna
Paisowa 10:17-22
17 Tautau ni aniyona somo mate Pita hola ya fafadosi na Koniliyesi ana hewahewali haꞌa ya fatamalidi mate Saimon ena luma sa yoꞌoyoꞌoi be sa lobahi. Amainiya sa obiꞌobiyo edaꞌeda hafohafona yai. 18 Sa yoga lau be sa fatiꞌo tiyen,
Ami taumana hesa hesana Saimon Pita amaiteꞌi?
19 Pita tautau ni aniyona hola ya fafadosi yo fede Yaluwa iyen,
U ataꞌatahi! Tatau faihona sa laulau yoꞌoim haꞌa sa mahanoma ite. 20 U obiyo be u feula lidi u itadi. Tabu u nuwa ladu na ma afa haidam au lau paꞌana yau E fatamalidima.
21 Yo fede Pita ya leta lidi be ya falibadi iyen,
Aee–! Ami yoꞌoyoꞌoigu. Yau logegu ite. Sidohana be ami laoma?
22 Alinana sa bui tiyen,
Hiyala tau lau kulukuluwenna hesana Koniliyesi ya fatamalimai. Diusi mahudoꞌidi sa liba faloholoho tiyen, “Koniliyesi mate Yaubada tau fafaꞌatitiyenna yo tau laulau dudulai hesa.” Yaubada ena anelu tabuna ya libalau lisina bena te lau ena luma be somo wa libaen haba ya atahi.
23 Habahim, Pita ya falibadi sa lau luma ganahewana be sa famala ana taumana.
Pita Koniliyesi ena Luma yai
Paisowa 10:23-33
Bobonna ma hwalahwalalana, ma afa haidadi Diyopa tau kawawananaha hahaisa sa aulaha sa lau. 24 Lahai fafaluwagana yai sa mahano lau Siseliya. Koniliyesi ma afa efana yo afa haidana safalumadi ya yogaidi mate Pita sa bagibagiyen amainiya. 25 Pita bena ya luhulau, na yo fede Koniliyesi maꞌena sa failobahi. Koniliyesi ya hoba lidi ahena yai be ya fadebasae.
26 In moho Pita ya abi famwaito na iyen,
U obiyo! Yau doga gaibu yo ita gonogonowada.
27 Pita yo Koniliyesi sa laulau libaliba ee–, sa luhulau luma ganahewana na amainiya mate dodoga boludi haꞌa sa faꞌoigogo, ya itadi. 28 Ya libalau lisidi iyen,
Haꞌa ami siba fuyoimiu mate ai Diusi ema andabu yo sigu yawasi laugagayodi yai ya libaen mate tabu umi, nuꞌu hahaisa dodogamiu, yo ai, ta faꞌilu. In moho Yaubada ya faꞌitagu mate tabu laugagayo ni lisidi yai, doga ya ita faheyaya. 29 Na fuyana wa fatamalidima agu halulu mate hige ya waiyoꞌo. Bena E fatiꞌoimiu, “Somo lisina yai be sa laufigu?”
30 Koniliyesi iyen,
Lahai faihona haꞌa sa ofi mulidi yai na maihala doha 3 koloki maimailafi mate E laulauꞌuꞌula egu luma yai te. Yo fede taumoho hudoꞌi ena leli namanamalina nuwanuwagu yai ya obiyo, 31 na iyen, “Koniliyesi! Yaubada em lauꞌuꞌula haꞌa ya atahi yo tau fagogo gesagesa wa saguhidi hinaga ya itadi. 32 Dodoga hahaisa u fatamalidi ti lau be taumoho hudoꞌi hesana Saimon Pita ana halulu Diyopa nuꞌuna yai. In mate taumana na ena falihesa lisina yai ya miyamiya yo in logena suisui ꞌwapidi tau abiꞌabi nonohaidi. Saimon ena luma mate gabogabo sadaina yai.”
33 Yo fede E fatamalidi sa laowa am halulu na ya loholoho be wa laoma. Aho te mahudoꞌimai ꞌe faꞌoigogoma Yaubada matana yai ꞌe bagibagiyem be ginauli mahudoꞌina Guyau haꞌa ya falibam ema wa liba ꞌe atahi.
Pita ena Libaliba ya Fatubu
Paisowa 10:34-43
34 Pita ya liba fatubu na iyen,
Aho te E sibai mate Yaubada hige doga laꞌi i ita fasae e i ita fakiu. Wananaha! Ita mahudoꞌida mate gonogonowada.
35 Safalumadi edi laulau sa dudulai yo Yaubada sa fafadebasae mate enehena. Fali alina hinaga maꞌeda gonogonowada. 36 Yaubada nuwa esega wasana loholohona ya fatamali lawen Isalaela dodogadi lisidi be Yesu Keliso ya libalibaen, haꞌa ami sibai. In mahudoꞌidi edi Guyau! 37 Somo sa laulau Diudeya Nuꞌuna mahudoꞌina yai mate haꞌa ami sibaidi. Ya fatubu Galili yai fuyanna Diyon, babasito wasana ya libaen, mulina yai. 38 Yaubada, sidohana Nasaleta dogana, Yesu ena fafamohafuna Yaluwa Tabuna yo gigibwali lisidi yai haꞌa ami sibai. Yaubada mate maꞌena na ya lau nuꞌu ouꞌouli yai be loholoho ya lau ginauli yo safalumadi Diyabolo ya fafaheyayadi, mahudoꞌidi ya faloholohodi. 39 Ginauli mahudoꞌidi ya ginaulidi Diusi dodogadi edi nuꞌu yai yo Yelusalem nuꞌudi yai ni, haꞌa matamai yai ꞌe itadi. Habahim sa wunui be oyagi yai sa tutu fapatu.* Oyagi yai aniyona mate kolosi yai. 40 In moho lahai fafa faihonana yai, Yaubada ya famwahuli fuyoi na ya fataumahata, 41 be safalumamai Yaubada haꞌa ya fasinabomai ꞌe ita na hige doga mahudoꞌina i ita. Ai logena maꞌemai ꞌe kalahe yo ꞌe nom gogo ena mwahuli fuyo lahaina mulina yai. 42 Ya liba adidili lisimai yai bena wasa loholohona ꞌe lauguguyaꞌen dodoga ai lisidi yo bena ꞌe liba famahata mate, In logena, Yaubada ya fasinabo bena peꞌipeꞌidi yo mwahumwahulidi tau fakasadi. 43 Peloweta mahudoꞌidi haꞌa wasana sa liba famahata tiyen, “Safalumadi sa kawawananahaꞌen haba edi heyaheyaya ya nuwa afuledi, Yesu hesana gigibwalina yai.”
Yaluwa Tabuna ya Lidima Taꞌowawa Dodogadi Lisidi
Paisowa 10:44-48
44 Pita hola ma libalibana na saluma ena wasa sa atahiyen mate Yaluwa Tabuna ya lidima hewadi yai. 45 Tau kawawananaha mwagisadi dududi ꞌwapidi tomotomodi maꞌedi Pita Diyopa yai sa laoma mate sa noꞌo paꞌana Yaubada ena ainauya, Yaluwa Tabuna ya fatamaliyama taꞌowawa dodogadi lisidi yai hinaga. 46-47 Sa atahi mate alina hesa - hesa yai sa libaliba yo Yaubada sa fafadebasae. Yo fede Pita iyen,
Yaluwa Tabuna dodoga ni ya famohafudi gonogonowana doha ita. Babasito hoꞌowa yai hige gonowana sai i gududi.
48 Yo fede ya falibadi bena Yesu Keliso ai hesana sa babasito be Pita sa anꞌetai bena lahai fisa maꞌedi hola sa miya.
*10:1 Ledimenti esega ganahewana yai mate tau hiyala ouꞌoulidi 600.
†10:3 Eno suwai mate sa eno na sa eno suwai. Tautau sa ita mate begana doha sa eno suwai, in moho sa tuhutuhuli na tautau sa ita.
‡10:6 Liba tefana ite: “Laulau somo bena wa ginauli haba ya falibamiu” Kin Diyemsi Bukana yai sa uli yo sa uli hinaga Suau Bukana yai. Buka boludi hige amainiya ti uli.
§10:14 Buka yai te ginauli dabudabudi sa uli lidiyen ya famala Isalaela edi laugagayo be tabu ti kalahe gaibu.
*10:39 Oyagi yai aniyona mate kolosi yai.