19
Paulo Efeso Nuꞌuna yai
Paisowa 19:1-10
1 Apolosi hola ma miyamiyana Kolinto Taonna yai. Na Paulo Eisiya Nuꞌuna ganahewana yai ya lau fote leu Efeso taonna. Amainiya tau famuli watanina haisa ya failobahidi, 2 be ya fatiꞌoidi, iyen,
Fuyanna ami kawawananaha mate, Yaluwa Tabuna ami abi, e hola?
Alinana sa bui, tiyen,
Higeꞌe! Yaluwa Tabuna mate somo? Hige wasana ai sibai.
3 Paulo ya fatiꞌoidi iyen,
Babasito somo - somohena ami abi?
Alinana sa bui tiyen,
Diyon ena babasito.
4 Paulo iyen,
Diyon ena babasito mate tau nuwabui, enehedi. Habahim Diyon, Isalaela dodogadi ya falibadi mate mulina yai, doga tau laoma ni bena sa kawawananahaꞌen - mate Yesu ai lisina.
5 Wasa te sa atahiyen, yo fede Guyau Yesu hesana yai sa babasito. 6 Paulo nimana ya tole lawen lisidi, yo fede Yaluwa Tabuna ya laoma lebedi. Alina hesa - hesa yai sa libaliba yo nuwatuhu somo Yaluwa ya feledi sa libalibaedi. 7 Tatau oulina doha safuhudohudoꞌi luwaga.
8 Paulo ya lau Diusi edi aba oiꞌoigogo lumana yai be amainiya nawalahi faihona ma nuwa adidilina dodoga maꞌena sa libaliba. Nuwadi bena sidohana ya abidi be sa laoma Yaubada lisina ya famala edi baꞌisa. 9 In moho, haisa sa nuwa poꞌi be ena liba hige ti lau watan yo “Guyau ena Edaꞌeda Fafamuli Watanina”* Safaluma Yesu sa kawawananahaꞌen mate, sa libaedi, tiyen, “Iti ‘Guyau ena Edaꞌeda’ dodogadi.” sa liba faheyaya dodoga matadi yai.
Yo fede, Paulo ya lau afuledi na tau kawawananaha ma afa haidana sa lau be doga hesa hesana Tailanusi ena aba lau faꞌata lumana yai, ya lau faꞌata lahai esega - esega yai. 10 Lau faꞌata ni sa laulawen ee–, boliman luwaga be Diusi yo Giliki salumadi Eisiya nuꞌuna yai sa miyamiya mate Yaubada ena liba sa atahiyen.
Sekewa Afa Nanatuna Faligigi Luwaga
Paisowa 19:11-20
11 Yaubada Paulo ya fapaisowa be noꞌo sa diꞌo wananaha, ya lau ginauli, 12 be yena muyahasa aba sausau e liꞌo dala Paulo tauna sa eliꞌina na sa lawedi tau asiꞌasiyebo sa faꞌeliꞌinadi haba sa loholoho yo yaluwa heyaheyayadi sa lau afuledi. 13 Diusi haisa fuya ouꞌouli sa lau sa adaꞌadau be yaluwa heyaheyayadi sa liba duidi mate hinaga sa anpate bena yaluwa heyaheyayadi sa liba duidi Guyau Yesu hesana yai. Yo fede yaluyaluwa ni sa falibadi tiyen,
Yesu hesana Paulo ya fapaisowa be ya lauguguya mate hesana yai, au kalamahano!
14 Diusi edi tau antalasam baꞌisana hudoꞌi hesana Sekewa nanatuna tatau faligigi luwaga laulau ni sa ginaginauli.
15 Fuya hesa yaluwa heyaheyayana hudoꞌi alinadi ya bui iyen,
Yesu yo Paulo hinaga E sibaidi. Na umi safaluma?
16 Yo fede doga yaluwa heyaheyayana lisina yai ni ya tulufidi be ya lei hafihafitidi. Ya antalainidi, be ma tau afaꞌafadi yo ma omaꞌomatadi ena luma sa gela afulen. 17 Wasa te Diusi yo Giliki, Efeso yai sa miyamiya, sa atahiyen mate mahudoꞌidi ꞌwasabu ya famohafudi be Guyau Yesu hesana sa faꞌatitiyen.
18 Habahim tau kawawananaha peidi sa laoma Paulo lisina yai be edi heyaheyaya sa liba famahatadi. 19 Tau ayaꞌayahan yo tau kalakalawan hahaisa edi ginauli bukadi sa abi gogondima, be sa gabu goludi dodoga matadi yai. Bukadi maisadi sa pei gogondi, mate, laꞌina doha siluba piꞌadi 50 tausan.† Lahai esega paisowana maisana gonogonowana doha siluba esega, na 50,000 “drachma” siluba piꞌadi maisana aho te mate miliyon fisa. 20 Laulaudi te lisidi yai, Guyau ena liba ya tadada heyaheyaya, ma gigibwalina.
Faibaiyaho ya Tubu Efeso yai
Paisowa 19:21-41
21 Efeso yai somo sa tubu na mulidi yai, Paulo ena nuwatuhu bena ya lau Yelusalem. Na hola ya bwaꞌi ya lau Masedoniya yo Akaiya Nuꞌudi yai, na ai mulina, haba ya lau Yelusalem. Yo iyen,
Ainiya, habahim E lau Loma E antaumanaidi.
22 Tau saguhina luwaga, Timoti yo Elasetusi ya fatamalidi, sa lau Masedoniya na in Eisiya nuꞌuna yai ya miya begana.‡ Tau sibasiba haisa, edi nuwatuhu bena haga Paulo Efeso Taonna yai (Eisiya Nuꞌuna yai) moho ya miyamiya. Hige i fafatau wasa nuꞌu hahaisa yai.
23 Fuyanna yai, faibayaho laꞌilaꞌi ya tubu mate, “Guyau ena Edaꞌeda” debana yai.§ Paulo ena fuya yai, Keliso ena tau famuli watanidi hesana sa tole “Guyau ena Edaꞌeda” e “Guyau ena Laulau” tau lau watanidi. 24 Siluba tau laulau ginauli hesana Dimetiyusi, yaubada bwalabwala waihinina hesana Atemesi,* Yaubada bwalabwala te, hesana luwaga. Hesa mate Loma edi hesa: “Daiyana,” na Giliki edi hesa: “Atemesi.” aba fafadebasaena dubuna tautauna mate lumadi kikiluka siluba yai ya ginaulidi be lisidi yai tau paisowa sa uneꞌuneidi be maisadi, moni laꞌilaꞌidi sa abiꞌabinidi. 25 Yo fede, maidadi salumadi nima paisowa hudohudoꞌidi lisidi yai doha iti adi paisowa ya yoga gogondi sa laoma be ya falibadi iyen,
Tatau! Paisowa yai te, ami sibai mate eda moni eda aba lobahina. 26 Dodoga boludi Efeso yo Eisiya Nuꞌuna yai, Paulo ya nuwa oidi be ya foya ponolidi mate haꞌa ami itadi yo ami atahiyedi, yo ya liba, iyen, “Dodoga nimadi yai yaubada sa laulau ginauli, hige yaubada wananahadi.”
27 Heyaya amainiya! Hige moni eda aba ginaulina moho Paulo i liba faheyaya. Yo hinaga yaubada waiwaihinna, Atemesi, aho te, sa fadebasae Eisiya nuꞌuna mahudoꞌina yo tanoꞌubu mahudoꞌina yai, ibege ena dubu ti faꞌatitiyen yo ena gigibwali haba ya gogoma.
28 Baiwa liba te sa atahiyen yo fede sa gafu pou be sa halahalabo tiyen,
“Efeso dodogada! Eda yaubada, Atemesi ya hasai wananaha!” Na ti yoga boda, “Efeso dodogada! Eda yaubada, Atemesi ya hasai wananaha!”
29 Taon dodogadi, bobohalahala ya laꞌi wananaha be Masedoniya dodogadi luwaga, Geiyesi yo Alisitaku, iti Paulo afa haidana, sa solu weꞌaweꞌa lawedi aba oigogo laꞌilaꞌina yai. 30 Paulo ya fanuha bena ya lau baiwa matadi yai ya libaliba, na tau kawawananaha sa laugagayoꞌen. 31 Eisiya babadadi haisa, Paulo afa haidana, hinaga liba sa fatamali. Sa anꞌetai bena tabu i lau aba fafaꞌoigogo laꞌilaꞌi yai. 32 Dodoga sa faꞌoigogoma mate, nuwadi sa ponopono; haisa ginauli hesa sa halahalaboꞌen, na haisa somo hesa. Somo ana halulu sa lau niya mate, dodoga boludi hige ti sibai.
33 Diusi dodogadi sa andudu balabala be Alesandiya sa lawen baiwa nuwanuwadi yai. Na haisa baiwa ganahewana yai, sa yoga lau lisina, sa fatalaha bena somo ya laulau te ya liba famahata.
Habahim, Alesandiya nimana ya lau hitin bena gagali sa fatautau be haba ya falibadi mate somo ya laulau te, hige Diusi dodogadi adi gilu. 34 Fuyanna sa nuwatuhu lobahi in Diusi dogana mate mahudoꞌidi sa halahalabo gogo tiyen,
Efeso dodogada! Eda yaubada, Atemesi ya hasai wananaha!
Doha mate sa laulau bodai ee–, awa luwaga sa ofi.
35 Efeso edi taon kalakina, ya lau biliyedi be gagali sa fatautau. Na iyen,
Efeso taonna tataumiu! Doga mahudoꞌina tanoꞌubu yai sa sibai mate Atemesi ena dubu yo umeꞌehu fafatabuna galewa yai ya beꞌuma, ita te itaꞌita watanidi.† Umeꞌehu ya beꞌuma te, itaꞌitana nuwana doha oitau. Ginauli te, galewa yai sa beꞌubeꞌu, hesadi kwatukwatu lulu. 36 Mahudoꞌimiu mate ami sibai mate ginaulidi te, wananaha. Au famakano! Tabu au nuwa feula! 37 Tatau ami foyahidima amaiteꞌi mate hige eda dubu yai ti angafu, e eda yaubada waiwaihinna ti liba fafaheyaya. 38 Aba lau fatala soꞌesoꞌedi, yo tau fafadudulai sa miyamiya, be ibe Dimetiyusi yo falena tau paisowa edi fatala pili sai hesa lisina yai, gonowana sa fadudulai. 39 Yena liba haisa sa otaꞌota, mate hinaga ai aba lau fatala haba sa fadudulaidi. 40 Somo aho te ya tubu, mate hige aniyona. Yena ami bobohalahala, ai halana haba sa fagilumiu be sa falau fatalamiu. Haba somo ami libaen?
41 Ya libaliba ofi, mulina yai, oigogo ya gudu.
*19:9 Safaluma Yesu sa kawawananahaꞌen mate, sa libaedi, tiyen, “Iti ‘Guyau ena Edaꞌeda’ dodogadi.”
†19:19 Lahai esega paisowana maisana gonogonowana doha siluba esega, na 50,000 “drachma” siluba piꞌadi maisana aho te mate miliyon fisa.
‡19:22 Tau sibasiba haisa, edi nuwatuhu bena haga Paulo Efeso Taonna yai (Eisiya Nuꞌuna yai) moho ya miyamiya. Hige i fafatau wasa nuꞌu hahaisa yai.
§19:23 Paulo ena fuya yai, Keliso ena tau famuli watanidi hesana sa tole “Guyau ena Edaꞌeda” e “Guyau ena Laulau” tau lau watanidi.
*19:24 Yaubada bwalabwala te, hesana luwaga. Hesa mate Loma edi hesa: “Daiyana,” na Giliki edi hesa: “Atemesi.”
†19:35 Umeꞌehu ya beꞌuma te, itaꞌitana nuwana doha oitau. Ginauli te, galewa yai sa beꞌubeꞌu, hesadi kwatukwatu lulu.