16
Yesu ya Obiyo Fuyo
Maleko 16:1-8
(Matiu 28:1-8; Luka 24:1-12; Diyon 20:1-10)
1 Sabati lahaina* Diusi ganahewana yai, lahai sa makai doha ite: 6 p.m. lahai hesa yai edi dei ya fatubu ya lau ee–, bobon 6 p.m. yai ya ofi. mulina, Maliya Magadala, Salome yo Maliya Diyemsi tinana maꞌi panepanedi sa unedi. Bena bobonna haba sa lau Yesu silanna sa famaꞌi. 2 Bobonna, nuꞌu ya ifi tatatali na sa aulaha sa lau boꞌusa. 3-4 Edaꞌeda yai sa laulau na ibodi sa fatiꞌo fuyoꞌidi, tiyen,
Sai haba umeꞌehu boꞌusa hafohafona yai ni ya fatapipili?
Sa tamahiti mate boꞌusa guduna umeꞌehu laꞌilaꞌi haꞌa sa fatapipili. 5 Sa luhulau boꞌusa yai mate taumoho hewahewalina ena leli kafukafuna tefa siba yai ya taꞌataꞌai. Yo fede aluwadi sa potifahi.
6 Na iyen,
Tabu au ꞌwasabu. Yesu Nasaleta, In sa tutu fapatu, ami yoꞌoyoꞌoi. Haꞌa ya obiyo fuyo! In hige amaiteꞌi. Edi aba tolena haꞌa ami ita. 7 Au lau be ana hewahewali Pita ma haidana au falibadi auwen, “In haba ya bwaꞌi Galili. Ainiya haba ami ita, doha haꞌa ya falibamiu.”
8 Wawahin wa sa tauhiti na ma tabutabubudi sa gela sa lau boꞌusa ganamulina. Hige sai somo ti faliba paꞌana sa ꞌwasabu.
Yesu ya Taumahata Maliya Magadala Lisina yai
Maleko 16:9-11
(Matiu 28:9-10; Diyon 20:11-18)
9 Sandei hwalahwalalana Yesu peꞌi yai ya obiyo fuyo na ya taumahata bwaꞌi Maliya Magadala lisina yai. In, logena, yaluwa heyaheyayadi faligigi-luwaga ganahewana yai ya liba duidi. 10 Salumadi ma afa haidana sa logo yo sa tantan mate, enehedi ya liba iyen,
11 Yesu ya mwahuli fuyo! Yau E ita!
In moho hige ti kawawananahaꞌen.
Yesu ya Taumahata Dodoga Luwaga Lisidi yai
Maleko 16:12-13
(Luka 24:13-35)
12 Mulina yai Yesu ya taumahata dodoga luwaga lisidi yai fuyana sa laulau nuꞌu hesa. Nenena ya sedi be hige ti ita lobahi. 13 Sa fuyo be haidadi sa falibadi. In moho hige ti kawawananahaꞌedi.
Yesu ya Taumahata Ana Hewahewali Lisidi yai
Maleko 16:14-18
(Matiu 28:16-20; Luka 24:36-49; Diyon 20:19-23, Acts 1:6-8)
14 Ofiꞌofina yai Yesu ya taumahata ana hewahewali safuhudohudoꞌi esega lisidi yai fuyanna sa kalakalahe. Ya sagasagaliyedi paꞌana sa nuwa poꞌi yo salumadi Yesu sa ita ya obiyo fuyo mate hige ti kawawananahaꞌedi.
15 Ya libalau lisidi iyen,
Au lau tanoꞌubu mahudoꞌina yai wasa loholoho te, dodoga ai lisidi au duwai.
16 Sai ya kawawananaha be sa fababasito haba ya mwahuli, In moho, sai hige i kawawananaha haba ena heyaya debana yai sa fagilu. 17 Tau kawawananaha haba noꞌo ginaulidi sa lau ginauli. Dimoni haba ai hesagu sa liba duidi yo alina hesa - hesa yai haba sa libaliba.
18 Yena weso ai nimadi sa abidi yo anꞌanlewa sa nomdi ibege ti peꞌi yo sa abilau tau asiꞌasiyebo ai lisidi haba sa loholoho. (Paisowa 28:3-5)
Yesu ya Hasai Galewa
Maleko 16:19-20
(Luka 24:50-53; Paisowa1:9-11)
19 Guyau Yesu ya libaliba ofi mulina yai, sa hasaen Galewa be Yaubada sibana yai ya taꞌai. 20 Habahim ana hewahewali sa lau sa lauguguya nuꞌu ouꞌouli yai. Na Yaubada ya saguhidi be ena liba ya fawananaha fafaꞌilala lisidi yai.
Maleko Bukana Ofiꞌofina Libadi Haisa
Maleko 16:9-10
[ Wawahin sa lau be liba tupotupona Pita ma afa haidana sa falibadi. Muli yai Yesu ana hewahewali ya fatamalidi sa lau, tefa saisai yai yo tefa leuleu yai be wasa tabuna yo miya lofalofana yo mwahuli otaꞌotafahina wasana sa falibadi.† Uliꞌuli haisa, lausoisoi luwaga te (9 yo 10) sa uli hinaga, na lausoisoi 9–20 sa tole hinaga.]