Luta
Dededena
Luta Dedena ena Aba Fatubuna.
Buka te, Luta dedena. Fuyanna guliyam laꞌilaꞌi Isalaela yai, dodoga haisa, Betelehem sa lau afulen, be sa sai Mowabi, paꞌana mahula amainiya. Sa miyamiya amainiya ee–, nanatuna luwaga Mowabi wawahinidi sa faidi. Naomi lahuna yo nanatuna luwaga sa peꞌi. Guliyam laꞌilaꞌi ya ofi ya aulaha, be ya fuyo ena nuꞌu. Lawana hesa ya miya Mowabi nuꞌuna yai, na hesa, hesana Luta, maꞌena sa lau Betelehem. Fuyanna yai, Isalaela yo Mowabi dodogadi sa fawaiyunu. Fuyanna sa lau Betelehem, Luta mate taꞌowawa, in moho, hige ti ꞌwaiyoꞌoꞌen. Diusi edi laulau hesa mate, yena taumoho lahuna ya peꞌi afulen, hwabuhwabuna haba sa ita watan komakomani, na ana hwahwayasa haba, edi hwabu sa fai. Bowasi Luta ya fai, be natuna ya yosi hesana sa tole: Desi. Na Desi natuna hesa Deiwidi, Isalaela edi Kin. Liba Fasunuma Dogana Yesu mate Deiwidi ana ulutubu. Yesu mate Betelehem yai sa yosi.
1
Elimileka maꞌana Boga sa lau Mowabi Nuꞌuna
Luta 1:1-4
1-2 Beyabeyana, Isalaela hola hige edi kin mate, tau fafadudulai edi fuya ita watanidi yai, nuꞌuna mate guliyam laꞌilaꞌi. Yo fede, taumoho hesa hesana Elimileka, in Sulu Efalata mate Betelehem yai sa miyamiya Diudeya Nuꞌuna ganahewana yai. Ma lahuna Naomi yo nanatudi luwaga, Malon yo Kiliyon, sa aulaha sa lau sa miya Mowabi Nuꞌuna yai. Fuyana amainiya sa miyamiya, 3 Elimileka ya peꞌi. Lahuna Naomi ma nanatuna luwaga ya peꞌi afuledi. 4 Yo fede, Mowabi wawahindi Opa yo Luta sa faidi. Bolima safuhudohudoꞌi sa ofi, mulina yai, 5 Malon yo Kiliyon hinaga sa peꞌi. Yo fede, Naomi hige lahuna yo nanatuna.
Naomi maꞌena Luta sa Fuyo Betelehem
Luta 1:6-22
6 Boliman fisa sa ofi, mulina yai Naomi ya atahiyen mate, Guyau haꞌa ena dodoga ena loholoho ya feledi, be sa mahula. Yo fede, ya nonoha na, ma afa lawana Mowabi Nuꞌuna sa lau afulen. 7 Sa fatubu, sa aulaha sa lau Diudeya na edaꞌedana yai 8 ya libalau lebedi, iye,
Au fuyo, be afa tinamiu ma afa haidamiu au miya! Haba Guyau ya loholoho lisimiu yai, doha ami loholoho lisigu yai yo tau peꞌi lisidi yai hinaga. 9-10 Haba Guyau ya saguhimiu be emi nahi ya famahatadi, na ami nahi fuyo, be emi luma ami fatubu bodaidi.
Habahim, Naomi ya falafudi, na sa fatubu sa tan. Sa libalau, tiyen,
Higeꞌe! Haba ꞌe lau watanim, be te lau haidam lisidi.
11 Naomi alinadi ya fafiyo iyen,
Nanatugu, au fuyo! Paꞌana somo be ami lau watanigu? Ami nuwatuhui bena haba E fanatu fuyo, be nanatugu tatau, na haba ami faidi? 12 Au fuyo emi nuꞌu! Paꞌana yau mate E tinalaꞌi, be hige gonowana ya nahi fuyo. E nuwatuhui, egu fuya ya ofi. Na ibe iꞌipa te E nahi, na nanatugu tatau, 13 Haba tabu au nahi na ami bagibagiyedi ee–, sa hewali? Nanatugu, higeꞌe! Ami sibai mate hige gonowana. Yaubada ya taꞌai mulimuliyegu, be nuwagu ya heyayaꞌemiu.
14 Yo fede, hinaga sa tan fuyo. Habahim, Opa lawana ya falafu, be ya fuyo, na Luta ya toha didini.
15 Be Naomi ya libalau lisina iyen,
Luta, falem nahi ya fuyo afa efana yo ena yaubada lisidi. Maꞌem au fuyo emi nuꞌu.
16 Luta iye,
Tabu u fatamali fafuyogu!
Wa lau somo: yau maꞌem,
yo somo yai wa miya: yau maꞌem,
Haidam: haidagu, Em Yaubada: egu Yaubada.
17 Ai somo wa peꞌi: haba ainiya E peꞌi hinaga,
yo haba ainiya sa boꞌusaigu.
Haba Yaubada ya kaumananaegu,
yena somo E ginauli faheyaya.
Ibe hige somo hesa i hinelida.
Na peꞌi moho haba ya hinelida.
18 Yo fede, Naomi ya nuwatuhui mate Luta ya dudu wananaha, be hige somo hesa i libaen.
19 Sa lau ee–, sa mahano Betelehem yai. Dodoga mahudoꞌidi nuwadi sa amna, na wawahin sa fatiꞌo fuyoꞌidi, tiyen
Itete moꞌisa, Naomi?
20 Naomi, alinadi ya fafuyo, iyen,
Tabu au atahigu Naomi,
Au atahigu Kalapi,
paꞌana Yaubada ya fanuwa heyayagu.* Naomi aniyona mate nuwa amna, na Hebelu libana Mara aniyona mate: Nuwa heyaya o Kalapi iti Isalaela alinadi yai.
21 Amateꞌi E aulaha mate, egu ginauli boludi.
Na Yaubada ya fafuyoguma te, hige egu ginauli.
Tabu au atahigu Naomi,
paꞌana Yaubada, Tau Gigibwali,
ya kaumananaegu na heyaheyaya ya felegu.
22 Itete sidohana Naomi ma lawana Luta, Mowabi Nuꞌuna yai, sa fuyoma. Fuyanna sa mahano mate, mahula ya fatubu Betelehem yai. Kalahe hudoꞌi hesana bali, nenena doha laisi, ena fuya anaho.
*1:20 Naomi aniyona mate nuwa amna, na Hebelu libana Mara aniyona mate: Nuwa heyaya o Kalapi iti Isalaela alinadi yai.