1 Ali yek yatiku enen nebenyi mahin nyape ulah uli nyatukemaguk yous nyaitak nyape nyaltowi. Enyen 10-poleiluh chuwoluh hlakihen ali 7-poleip bogolep peilen. Ali 10-poleig yopugwi hatog douk nebemi atum hogwemaluli gwotemu otuhw ati ahludak chuwoluh. Ali enen yowenyi yeul nyetemu enyudak mahin enyenyip bogolep. Bawogenyumu balan umu enyudak yeul douk chenek tok bilas umu God. 2 Enyudak mahin douk nyape kobi enen nebenyi wanohwinyi mahin douk chohwalen umu lepat uli. Ali enyenyigas ayas sape kobi enen nebenyi wanohwinyi mahin chohwalen umu bea uli. Ali enyenyitu yokwatu kobi douk enyudak nebenyi wanohwinyi mahin douk nyonohwalomu laion uli enyenyitamu. Ali enyudak idul nyoken enyenyin pawa uli namba nyanu enyenyin nebenyi yopinyi sia enyudak nebenyi mahin. Enyen nyokenyech umu nyupe nebenyumali chunatimaguk elpech douk seiwak enyen nyape nebenyumechi uli. 3 Ali anam enyudak mahin enyenyim boglom, takweibi alab bapenyum kobi douk chan nyagak umu. Wakuli enyen douk wo nyugak e, wak. Abab wata bawib. Douk namudak ali chanatimaguk elpech chape apudak atap uli loguh hwonechlukech umu enyudak mahin ali chagipechen. 4 Ali enyudak idul douk nyoken enyenyin namba enyudak mahin. Douk namudak ali chanatimaguk elpech chenek lotumu enyudak idul. Ali echech chenek lotumu enyudak mahin chopuk chakli, “Elpen douk wak enen dodogowin kobi douk enyudak mahin umu e, wak. Nyanubu enyen atin douk dodogowin. Ali deke omuni dodogowin umu nyunen chulpak?”

5 Ali God nakli wosik nape natulin meyoh enyudak mahin umu enyen nyupe nebenyumali wolobaichi elpech umu 42-poleib aub. Abudak 42-poleib aub douk alagun atimu 3-poleich chuknich ali enen tukanin yohwleguh. Ali enyen nyape nyegawleh enenyi enen nyanubu yowenyi balan ali nyape nyatuk enyenyin yeul nyakih. 6 Ali enyen nyenek stat nyape nyenek tok bilas umu God. Enyen nyenek tok bilas umu ananin yeul nyanu ananibul wabul blanu echudak elpech douk chape iluh heven uli. 7 Ali God neken strong ali enyen nyanu God ananich elpech chalpak ali enyen nyach nyohiyahech. Ali enyen nyalau nebenyi namba umu nyupe king umu chunatimaguk elpech chape nyanatimaguk kantri uli. Chunu sunatimaguk nebesi awilosich, chunu chunatimaguk cheyagwleh ihen silisilin tokples uli, chunu chunatimaguk ihaluh silisililuh yegechi-weluhich elpech. 8 Ali chunatimaguk elpech douk chape apudak atap uli eke chunek lotumu enyudak mahin. Chanatimaguk echudak elpech douk seiwak God wata nunek apudak atap e, ali anan wo nuwemu echechiguh yeguh hwutemu okwudak buk douk echudak elpech eke chupe kalbu eheh nyumneh uli echechiguh yeguh hwutemeyokwi. Okwudak buk douk enyudak Nugan Sipsip douk seiwak chan nyagak uli enyenyik. 9 Ali nameitu ipak aligas sapenyipali, imas pugamu pumnek enyudak balan! 10 Echebuk elpech douk God nukli wosik umu kipaichi chuhwech chuwechikech chulawech umu kalabus uli, echech imas chunamu kalabus. Ali echebuk douk God nukli wosik umu kipaichi chukwumech bainatog uli, echech eke chukwumech bainatog ali chech chugak. Aduligu atugu, enyudak kwali eke nyutoglu. Namudak ali ipak God ananipu elpech imas pusuh ananin balan dadag pugipechen ali piyotu dodogowipu atipu ababuk nyultab enyudakmali hevi nyutoglo-mepamu.

11 Wakuli yek yatiku enen kipainyi wanalin mahin alagun. Enyen douk nyapeli gani atap bobigaluli nyaitak nyape nyaltowi. Enyen biyoluh chuwoluh kobi douk hlatoglu nugan sipsip uli hlakih boglominyumu. Ali enyen nyeyagwleh kobi douk idulguh hweyagwleh umu. 12 Ali enyen nyakwu enyudak nyalikili mahin enyenyin namba uli pawa umu nyupe nebenyimu chunatimaguk elpech. Ali chopuk umu nyupe dodogowin atin ali nyunek apudak atap punu chunatimaguk elpech chunek lotumu enyudak nyalik uli mahin douk takweibi alab bape anam enyenyim boglom kobi douk chan nyagak ulimu. Wakuli enyen wo nyugak e, wak. Abab wata bawib. 13 Enyudak nyagikuk uli mahin nyenek enen moul douk God atunu neneken uli agundak nabesich umu chanatimaguk elpech. Enyen nyeneken uli douk enyudak. Enyen nyenek nyih hatukemaguk iluh heven hagluki apudak atap. 14 Ali God nakli wosik ali enyen nyenek wolobainyi God atunu neneken uli moul agundak nabesin umu enyudak nyalik uli mahin. Douk enyen nyenek namudak ali enyen nyape nyenek loh umu chanatimaguk elpech chape apudak atap uli. Ali enyen nyape dodogowin atin ali nyaklipech umu chunek enyudak nyalik uli mahin enyenyil abolil ali chupe chutuk enyenyin yeul nyukih. Enyen douk seiwak chan chakwumen bainat wakuli enyen wo nyugak uli e. Enyen wata nyape. 15 Ali God nakli wosik ali enyudak nyagikuk uli mahin nyehepich enyenyip yap pawich enyudak nyalik uli mahin enyenyil abolil douk echech chenekal uli ali nyolukwen yapis. Enyen nyenekal namudak umu liyagwleh ali lunek echebuk elpech douk chakli wak umu chunek lotumal uli chugak. 16 Ali enyen nyanubu dodogowin atin umu nyakli chunatimaguk elpech, yeguh hwakihechi,* Putik futnot Rev 11:18. chunu yeguh wakechi, chunu chonokwalmu wolobaichi echudak uli, chunu chanohwagagun umu echudak uli, chunu chape chakamomu kipaichi chenemech moul meyoh uli, chunu chape fri ulimu chulau anagu mag gupe echechigas wahegas o echechich anich loguh. 17 Enyen nyenek namudak umu meinyi elpen douk kobi nyulau agudak mag o enyudak namba uli, enyen eke kobi nyutal echudak o nyunek salimech umu kipaichi chutalich, wak. Enyudak namba o mag douk nyakli woblen balan umu enyudak mahin enyenyin yeul.

18 Apak imas mulau savemu mudukemu bawogenyumu balan umu enyudak namba. Enyebuk elpen douk nyunubu nyudukemech uli enyen imas nyudukemu bawogenyumu balan umu enyudak namba. Umu moneken, enyudak namba douk nyaklimu ananu alman ananin yeul. Ali enyudak namba douk 666.