3
Jisas Douk Nyeigur Nyato Iruhw Abom Nyeshagrakuk Moses
1 O eikish arpesh douk pape Iruhin ananip iri, ipak douk Iruhin nagraehep aria nahwarep um ta puni ananish arpesh puto um iruhw heven. Douk eik yakri ipak urkwip gamo purum Jisas. Anan douk Iruhin nagraehan aria neshopokan nanaki nakripep enyudok adurinyi baraen douk apak masuhwen magipeshen aria makripeshen iri. Anan douk natogur debeini pris abom aria nape orokohun um apak mani Iruhin. Nape aria nenek mour nataurumap um munak hurukatin um Iruhin. 2 Anan douk Iruhin nagraehan aria nenek enyudok yopinyi mour. Neneken kabi seiwok Moses nenek Iruhin ananin yopinyi mour abudok nyutob nape debeini um ihishmorim Iruhin ananish arpesh obi nyutob. 3 Jisas anan douk nyeigur nyato iruhw abom neshagrakuk Moses kabi arpesh shatik anat urupat aria shatuk naruk urupat iri ananin nyeigur nyato iruhw um. 4 Ihig urusag douk adur arpesh sharukog. Aria nenek ihishmori eshudok iri douk Iruhin. 5 Moses anan douk nenek Iruhin ananin mour neneken yopinyi abom. Anan nasuhw Iruhin ananin baraen aria nape debeini um ihishmorim Iruhin ananish arpesh nataurumesh. Nataurumesh aria neyagwreh baraen um enyudok mugu kweipon Iruhin ta nuneken nyutograri iri. 6 Aria Krais, anan douk Iruhin ananin nuganin. Anan douk nenek Iruhin ananin yopinyi mour aria nape debeini um Iruhin ananish arpesh nataurumesh. Aria ta apak mupe dodog mupe mutrugun um kweipon murao Iruhin ananish yopishi eshudok eneshenesh um, apak adur abom Iruhin ananishi arpesh.
Shakonuk Agabus Jisas Iri Ta Mare Shuwish Shuni Iruhin Shupe Shurao Uhwin, Uwok
7 Ipak douk pape Iruhin ananishi arpesh namudok aria punek yopihi aih kabi Iruhin ananin Mishin nyakrium. Nyakri namudok,
“Douk, ta eik Iruhin ikri ikripep enen baraen um,
8-9 ipak mare pukenyuk agabus
kabi seiwok ipakish popehesh yamehesh shenekesh um, uwok.
Eik douk yakri um itaurumesh,
aria eshesh shakri uwok um shumneke.
Namudok aria sheneke juwehosiwe atuwe.
Abudok nyutob shape wehigunum arpesh iri urah uwok enesh um uwe obi nyutob,
eshesh douk shape shokwiraeh eik um eneshenesh shenekesh iri yoweishi inahos.
Shape agundok wehigunum aria shatik sabainyi dodogowinyi mour douk yape yeneken um 40-poreish kwarahos iri.
Eik douk yakri um itaurumesh,
aria shakri uwok um shumneke.
Shape shokwiraeh eik um eneshenesh shenekesh iri yoweishi inahos.
10 Douk namudok aria eik juwehosiwe abom um eshudok arpesh.
Aria douk yakri, ‘Eshudok arpesh douk shagipeshuk kupainyi baraen.
Namudok aria eshesh madae shudukem ehudok aih eik yakriyeh iri uwe, uwok.’
11 Sheneke juwehosiwe namudok aria yakri um iruhw abom
yakri adur um, eshesh ta mare shuwish um agundok douk
esheship urkwip pur wosik aria shupe wosik um.”3:11Enyudok baraen douk nyakrium seiwok eshesh Israel madae shuwish shurao uhwin Kenan uwe. Aria douk, Iruhin nakri ananish arpesh ta murao uhwin um mupe wosik douk agundok atap muni gani iruhw heven shopunek.
Apak Mare Musuwokuk Iruhin Ananin Baraen Kabi Eshesh Israel Um, Uwok
12 Namudok aria eikish arpesh, ipak douk gamo pumnek. Ta enen nyukri urkum mur um eneshenesh yoweishi inahos aria nyukutukuk bilip um nyukon agab anudok Iruhin douk nape ihih nyumneh iri, aria namudok ta uwok. 13 Aria douk yakri. Douk, nyutob watak bape um ipak pugipesh ananin baraen um. Eik douk yakri ihih nyumneh um ipak punagapeshum piyotu dodogowip pusuhw ananin baraen dodog pugipeshen. Punekesh namudok aria ta mare enen arpen enyenyin mishin nyikitak um nyunek enesh yoweishi inahos, uwok. Ta eshudok yoweishi inahos shunek rohwumen aria enyudok arpen nyukonuk agab abom Iruhin.
14 Apak miyotu dodog masuhw Jisas ananin baraen mugipeshen kabi riguk makri adurin atin masuhwen magipeshen um. Musuwen dodog arigaha mugok um, apak ta muni Krais munoprom mupe atugun. 15 Baraen nyetem Iruhin ananik Buk iri douk iganigadae yakripepen. Nyakri namudok,
“Douk ta eik Iruhin ikri ikripep enen baraen um,
ipak mare pusuwokuk enyudok baraen
kabi seiwok ipakish popehesh yamehesh shenekesh um, uwok.”
16 Ipak pakri seiwok douk meishi arpesh shemnek Iruhin ananin baraen aria shasuwoken-ukuk shakon agabus? Eshudok arpesh douk eshudok ihishmorim Moses narikumeshi aria shakutukuk debeigi nahobig Isip shanaki iri. 17 Aria shopunek yakri iyorigep. Ipak pakri meishi arpesh abom shape shenek yoweishi inahos um 40-poreish kwarahos aria shenek Iruhin juwehosin atun abom? Anan douk juwehosin atun um eshudok douk shape shenek yoweishi inahos aria shagok shakusuk wehigunum arpesh uwok um. 18 Aria shopunek yakri iyorigep. Ipak pakri Iruhin nakri um adur iruhw nakri adur atin um meishi arpesh ta mare shunak shuwish shuni anan shupe shurao uhwin? Anan douk nakri um eshudok douk shasuwokan-ukuk um ananin baraen iri. 19 Namudok aria apak madukemesh. Eshesh douk mare ta shunak shuwish shuni Iruhin shupe shurao uhwin uwe, uwok. Um maresh? Eshesh douk madae shusuhw ananin baraen wosik shugipeshen uwe, uwok.
3:113:11 Enyudok baraen douk nyakrium seiwok eshesh Israel madae shuwish shurao uhwin Kenan uwe. Aria douk, Iruhin nakri ananish arpesh ta murao uhwin um mupe wosik douk agundok atap muni gani iruhw heven shopunek.