Baraen Douk Jisas Krais Nakrip Jon-enyi
Banenyi Baraen Um Enenyenen Jisas Krais Neyabig Jon Um
1:1-8 Jon kabi nanabek yomnis um aria natik eneshenesh eshudok aria nowem enyudok baraen 7-poreis awiros um Iruhin ananish arpesh aria natuk Jisas Krais ananin nyeigur nyato iruhw.
1:9—3:22 Jon natik Jisas Krais natrugun abom aria ananin baraen nyanam eshesh sabaishi Kristen shape 7-poreirub warub iri.
4:1—8:1 Jon natik iruhw heven aria natik Jisas Krais nani ananin Yaken Iruhin, hani sabaishi enselahos aria natik Jisas nakweshih 7-poreis kendelis gris douk soweshik apudok shup douk shadareshap iri.
8:2—11:19 Jon natik 7-poreish enselahos atin atin shasuhw aruruh aria shahaprisharuh
12:1—13:18 Satan ta nini Iruhin ananish sabaishi enselahos shurpak aria shuhiyahan nugruki agundok atap
14:1—15:8 Jon natik Jisas natogur kabi douk nugaen sipsip um aria nani bishatin enselahos shabo eshudok arpesh douk shakon agabus abom Iruhin iri
16:1-21 Jon natik enesh kupaishi 7-poreish enselahos. Eshesh atin atin shasuhw marus.
17:1—19:21 Iruhin ta nuwanamesh yoweishi inahos eshudok arpesh shape wabur Babilon shenekesh iri, aria Krais ta nutogur kabi douk arman netem shigorihwinyi hos um aria nunaki.
20:1-15 Satan ta nunuweshik nupeik namudok agudok gagari nuwag gabuh gani atap iri nuwag aria Iruhin ta nunek skelimaguk ihishmorim arpesh ba iyoh
21:1-27 Namuburi wabur Jerusalem
22:1-6 Worubibar abar bani shuruwepigos rowos douk ta arpesh shishoh aria shupe wosik abom ihih nyumneh iri.
22:7-21 Jisas Krais ananin nyatuh iri baraen douk nahwar sabaishi arpesh um shunakumori anan.
1
Baraen Jon Nenyem Nyakri Um Okwudok Buk Iri
1 Seiwok enyudok baraen um Jisas Krais nyanabeshuk. Aria douk abudok nyutob enyen nyatogur yopugunum. Iruhin douk nakon enyudok baraen Jisas um nukrip shenek Iruhin ananin mour iri um nuyabigesh um shanabeshuk iri eshudok eneshenesh hurukatin um shutogur. Anan douk neyabigap namudok. Anan neshopoki ananin ensel nyanakumori eik Jon douk yenek Iruhin ananin mour iri aria nyakripe enyudok baraen. 2 Aria eik yatik eshudok ihishmorim eneshenesh jurug aria eik yawereh enyudok baraen yakripep yopugunum. Enyudok baraen douk Iruhin ananin nyani enyudok adurin baraen Jisas Krais nakripepenyi. 3 Enyudok baraen nyetem okwudok buk iri douk nyakrium eshudok douk ta shutograri iri. Aria ihishmorim arpesh douk shutarih enyudok baraen debeg um kupaishi shumneken iri, eshesh wosik shanadudareh. Aria eshudok douk shumneken aria shusuhwen dodog shugipeshen iri eshesh shopunek douk shanadudareh. Um maresh? Abudok nyutob um eshudok ihishmorim shutogurum douk banaki hurukatin.
Baraen Jon Nenyem Nyunam Iruhin Ananish Arpesh Shape 7-poreirub Warub Iri
4-5 O ipak Iruhin ananishi arpesh pape arbudok 7-poreirub warub douk bape shokugi nahobig Esia iri. Eik Jon yenekumepogu apudok shup ipak. Eik yakri Iruhin douk seiwok nape, aria kweipon shopunek ta nupe arigaha hugiguk iri nyumnah hutograri nutaurumep meyoh. Aria anan nutaurumep pupe dodogowip aria ipakiruh aparuh hur wosik. Aria shopunek, yakri eshudok 7-poreish yopishi mishish1:4-5 Enesh shakri eshudok 7-poreish yopishi mishish douk shakri um Iruhin ananin Mishin.douk shape hurukatin um Iruhin ananin debeinyi wagitur iri shuni Jisas Krais shopunek shutaurumep meyoh aria ipakiruh aparuh hur wosik. Jisas Krais douk neyotu dodogowin atun nagipesh ananin baraen wosik iri nakripep ihinymorim Iruhin ananin adurin atinyi yopinyi abom baraen. Aria sagomatin Iruhin narik nohur anan nakutukuk wonugwehw aria watak nakitak nape. Aria anan douk abom nape debeini um ihim-morim debeimi king douk hape agundok atap iri.
Anan douk urkum manawashamap aria ananibor owishibor botourak babuh aria bokweshihap aria mape wosik um eneshenesh apakish yoweishi inahos. 6 Aria douk anan nenekap mape debeipi um sabaishi arpesh kabi douk king-omi um. Aria shopunek, anan nenekap mape pris kabi amam seiwok hape henek ofa um eneshenesh eshudok hako Iruhin iri um. Aria apak munek mour um Iruhin douk Jisas Krais nenek lotuman iri. Aria anan shopunek douk ananin Yain. Aria eik yakri debeinyi nyeigur nyuni ihinyumorim dodog abom shupeum anan atun ihih nyumneh! Adur atin.
7 Ipak tik! Anan ta nini orug nunaki. Aria ihishmorim arpesh shuni eshudok douk seiwok shan nagok iri ta shutrun esheshis nabes. Aria ihismorim debeisi awirosish arpesh douk shape agundok atap iri ta shurepan abom. Adur atin eshudok ta shutogur namudok atin. Adur atin.
8 Aria debeini dodogowini abom Iruhin douk seiwok nape, aria douk shopunek nape, aria kweipon ta nunaki iri nakri namudok, “Seiwok baugos um ihishmorim eneshenesh eshudok watak enesh shupe uwe aria eik yarig yape. Aria kweipon shopunek, abudok nyutob ihishmorim eshudok shunak shutuhuk um eik ta ipe.”
Jon Natik Krais Douk Iruhin Nagraehan Neshopokan Nanaki Iri
9 Eik ipakin ashuken Jon douk yani ipak munoprom Jisas atun iri. Eik douk yani ipak memnek eriger aria meyotu dodogowip um musah enenyenen amaen douk ta nyutogrumap iri. Aria douk shopunek, eik ta ini ipak um muwish agundok Iruhin nape Debeini um ananish arpesh um. Eik douk yakripesh Iruhin ananin baraen nyani enyudok adurin atinyi baraen um Jisas. Douk namudok aria eshesh shasuhwe sharawe shanaki sheyosop yapeik enyudok unai nyeigurinyum Patmos iri. 10 Anah nyumnah douk apak apa mape munek lotu um Debeini ahi, Iruhin ananin Mishin nyatogrume dodogowin atin aria nyeyabige eshudok yatrish kabi yabo yomnis yatrish um. Aria yemnek anah debeihi mah agabiwe um kabi douk shahapur oruhw um. 11 Aria enyudok arpen nyeyagwrehi iri nyakripe nyakri, “Nyak wem eshudok douk ta nyutrish iri anap shup aria nyukeshop punak um Iruhin ananish arpesh shape arbudok 7-poreirub warub iri. Nyeiguhwirub um warub douk arbudok. Efesus, Smerna, Pergamum, Taiataira, Sardis buni Filadelfia iri Laodisia.”
12 Aria eik yatanam um itik enyudok douk nyakripe enyudok baraen iri aria yatik 7-poreish eshudok shenekesh gol iri shatao. Eshesh douk shenekesh um showem lamhos shetem um. 13 Aria anan arman neyotu orokohun um eshudok 7-poreish shenekesh gol iri. Anan nor anah rouhi rupah habuh heyawiamokuk ananiruh yeriweruh aria nawashak anat let douk shenekat gol iri um ananin mishin. Anan douk kabi Anudok Arman douk natogur adurinyi arpen iri um. 14 Aria ananig barag douk gatogur shigorihwig abom kabi ehirub douk batogur sipsip iri o kabi shigorihwisi ais um. Aria ananis nabes satrugun kabi douk debeihi nyih hanu aria bogaragun um. 15 Aria ananiruh yeriweruh hatrugun abom kabi enyudok brasin kapa iri um douk shashainyeh debeihi nyih aria nyatrugun um. Aria ananih mah heyagwreh debeg kabi worub batogur banaki um. 16 Anan nasuhw 7-poreyiyu unib um ananin yopunyi rogur, aria anat wanohwiti bainat douk wanohwit eresit wobuwobur iri tatograri ananit nokwat. Aria ananig yamag bogagrag abom kabi wah hatao nyumnah iri hatrugun um.
17 Douk yatrun aria yanak yabuh yakus hurukatin um ananiruh yeriweruh kabi anan nagok iri arman um. Aria anan nowem ananin yopunyi rogur eik aria nakripe nakri, “Nyak mare nyunogugur, uwok! Eik douk seiwok baugos um ihishmorim eneshenesh eshudok watak enesh shupe uwe aria eik yarig yape. Aria kweipon shopunek abudok nyutob ihishmorim eshudok shunak shutuhuk um, eik ta ipe. 18 Eik douk madae igok iri uwe, uwok. Eik yape iri! Seiwok yagok aria douk yape, aria shopunek ta ipe ihih nyumneh. Aria eik douk yarao debeinyi big aria dodog um ipe debeiwe iri um agundok arpesh shugok um. Um ikri eshesh shunak um yoweiburi wabur o shunak um yopuburi.
19 Douk namudok aria nyak wem eshudok iganigadae nyatrish iri shuni eshudok douk shape shatogur agundok atap iri shuni eshudok douk ta kweipon shugiguk shutograri iri nyakip shup. 20 Aria baugenyum baraen riguk nyanabeshuk um oudok 7-poreiyu unib douk nyatik yasuhwo eikin yopunyi rogur iri douk namudok. Oudok unib douk wagraeh um 7-poreish enselahos douk shape sheyoh Iruhin ananish arpesh shape arbudok 7-poreirub warub iri. Aria baugenyum baraen um eshudok 7-poreish shenekesh gol iri um shuwem lamhos um douk nyakrium Iruhin ananish arpesh douk shape arbudok 7-poreirub warub iri.”