19
Iruhin Ananish Arpesh Shanadudareh Um Agundok Babilon Bananukuk Um
1 Douk enyudok nyanakuk aria yemnek enen arpen nyeyagwrehi debeihi mah kabi douk sabaishi arpesh shape sheneyagwreh iruhw heven iri um nyakri,
“Apak mutuk Iruhin ananin nyeigur nyuto iruhw!
Apakin Iruhin anan atun narap matanamori mape wosik.
Aria agundok anan dodogowin natrugun abom um douk
nape abom um anan atun.
2 Anan neneken um arpesh iri baraen um
nasuhw esheshig durdurig kwotog um douk yopug wosik abom aria adurig atug!
Aria okwudok armatok douk kwani kupaimi shenek wehrur um
kwenek sabaishi arpesh shape agundok atap iri
shakutukuk yopihi aih aria shagipesh okwokwih yoweihi aih.
Douk namudok aria Iruhin nenek kwotumok nakri okwok yoweikwi.
Aria shopunek, okwok kwabo eshudok arpesh douk
shenek ananin mour iri shagok aria douk
anan douk nawanamok enyudok yoweinyi poe.
Okwudok armatok douk shakri wobuwobren baraen um
abrudok wabur Babilon.”
3 Aria sabaishi shape iruhw heven iri shape shahwar debeg shakri,
“Apak mutuk Iruhin ananin nyeigur nyuto iruhw!
Aria ogwusudok nyugwus douk sakih ehudok nyih douk hanu
abrudok debeiburi wabur iri ta sukih suto ihih nyumneh!”
4 Aria amudok 24-poreim debeimi armam hani eshudok nubatish dodogowishi douk mishish shoresh iri shabuh shoduk ohrubus aria shenek lotu um Iruhin douk nape ananin debeinyi wagitur iri aria shahwar shakri,
“Adur atin, apak mutuk Iruhin ananin nyeigur nyuto iruhw!”
5 Aria eik yemnek anah mah agundok enyudok debeinyi wagitur nyakus um. Aria enyudok arpen nyeyagwrehi iri nyakri,
“Ipak ihishmorim penek Iruhin ananin mour iri puni
ipak nyeiguhw shatoumep iri,19:5Putik futnot nyape Revelesen 11:18 iri.
puni nyeiguhw wokepari douk punogugur um Iruhin penek lotuman
aria pusuhw ananin baraen pugipeshen iri
putuk ananin nyeigur nyuto iruhw!”
Nugaen Sipsip Ta Nyurao Enyenyik Irohukwik Aria Ta Shunek Debeguni Worigun
6 Aria eik yemnek enen arpen nyeyagwrehi debeihi mah kabi douk sabaishi arpesh shape sheyagwrehi um. Ahah douk kabi worub batogur beyagwreh um aria kabi utag pogarog debeg um. Aria eik yemnek hakri,
“Apak mutuk Iruhin ananin nyeigur nyuto iruhw!
Apakin Debeini douk anan atun Dodogowini Iruhin abom.
Anan douk nape debeini um ihishmorim arpesh shani
eneshenesh eshudok!
7 Anan douk dodogowini arman abom.
Aria douk apak ta aparuh yopuruh
aria munadudareh-uman aria mutuk ananin nyeigur nyuto iruhw!
Nyumnah douk hanaki um Nugaen Sipsip nyurao enyenyik irohukwik.19:7 Putik futnot nyape Revelesen 11:18 iri.
Baugenyum baraen um Nugaen Sipsip enyenyik irohukwik douk nyakrium Krais ananish arpesh.’
Okwok douk kwenek garibog kwape um eshesh biyesh shunaraum um.
8 Okwok douk shokok anah yopihi hatrugun abom iri
shigorihwihi rupah kwohur.”
Ehudok rupeh ihih douk shakri wobuwobren baraen um ehudok yopihi abom aih douk Iruhin ananish arpesh shape shenekeh iri. 9 Aria enyudok ensel nyakripe nyakri, “Nyak wem enyudok baraen. Baraen enyudok.
‘Eshudok arpesh douk Iruhin nahwaresh um shunaki um
agundok debeguni worigun douk shenekagun um
Nugaen Sipsip nyurao okwok iri um,
douk eshesh wosik shanadudareh.’ ”
Aria enyudok ensel wata shopunek nyakripe nyakri, “Enyudok Iruhin ananin baraen douk adurin abom atin.”
10 Aria eik yabuh yoduk ohrubus hurukatin um enyenyiruh yeriweruh um yakri inek lotuman. Aria enyen nyakripe nyakri,
“Nyak mare nyunek lotu um eik, uwok.
Nyak nyunek lotu um Iruhin atun.
Eik yani nyak wani eshesh Kristen,
apak ihishmorim douk munek Iruhin ananin mour iri atup.
Ipak douk pasuhw enyudok baraen Jisas nakripepen pagipeshen iri.
Enyen douk enyudok atin baraen nyohur
amam profet amamiruh aparuh
aria hakripesh Iruhin nakripam-enyi baraen.”
Arman Netem Shigorihwinyi Hos Iri Anan Douk Krais
11 Aria ogwudok orug douk gweshiguk iruhw heven iri tukarog gwanak gweyatuk tukwotukwan aria eik yatigu enen shigorihwinyi hos nyeyotu numun heven. Aria anudok arman netem enyudok hos iri douk nanahwar namudok. Anan neyotu dodogowin atun nagipesh ananin baraen wosik aria neyagwreh adurin atinyi baraen iri. Aria douk anan nasuhw arpeshig kwotog nenekog wosik atin. Aria anan nenek wanohw um, anan apa nagipesh ananih yopihi abom aih atin. 12 Ananis nabes sape kabi nyih hanu jurareh iri um. Aria anan nowem um sabaigwi yopugwi hatog douk king-omi atum hogwem iri um ananig barag. Aria shopunek, enen nyeigur nyetem ananihw yegenyihw. Kupaishi mare shudukem um baugenyum baraen um enyudok nyeigur uwe, uwok. Anan atun nadukemen. 13 Aria ahudok rouhi rupah anan nohur iri douk shosegruh owishibor aria owishibor atubor bakrupoh. Aria eshesh shahwaran enyudok nyeigur shakri, “Iruhin Ananin Baraen.” 14 Aria eshudok ami douk shape iruhw heven iri shenek yopihi abom shigorihwihi rupeh aria shetem esheshish shigorihwishi hwosahos aria shape shagipeshan. 15 Aria anat wanohwit bainat tatograri anudok arman ananit nokwat. Aria anan ta nukwu atudok bainat um nubo sabaishi arpesh douk shape sabaigosi nahobigos iri. Aria anan ta nusuhw anam butum douk shenekam ain iri aria nupe debeini um ihishmorim arpesh. Aria anan ta nushish wainip shurkwip agudok debeigari tenk douk shenekag utabor iri. Enyudok douk shakri wobuwobren baraen um agundok Dodogowini abom Iruhin nabo ihishmorim eshudok shabuhuk iri juwehosin abom um. 16 Aria enen baraen nyetem anudok arman ananin mib nyani ananih rupah. Enyudok baraen douk nyakri namudok,
“Debeini um ihim-morim king aria shopunek Debeini um ihim-morim debeimi.”
17 Aria eik yatigu enen ensel nyeyotuwi nyumnahin aun aria nyahwarugu debeg ogwuhudok ihiguhw-umorim armiguhw douk hwanadudareh hwanak iruhw iri nyakri, “Ipak ihiguhw-morim punakumori Iruhin nenekagun iri debeguni worigun! 18 Ipak punaki puwok amudok king-omi huni amudok douk hape debeimi um amam soldia iri huni amudok dodogowimi armam amamiruh yegeshiweruh. Aria shopunek, puwok hwosahos shuni amudok douk hetem hwosahos iri, huni ihishmorim arpesh. Eshudok douk shape shakamum kupaishi shenekumesh mour meyoh iri, shuni eshudok douk shape wosik iri, shuni ihishmorim nyeiguhw shato-umesh iri,19:18 Putik futnot nyape Revelesen 11:18 iri.shuni nyeiguhw wokeshi esheshiruh yegeshiweruh!”
19 Aria eik yatik um enyudok debeinyi mahin nyani amudok agundok atapim king hani esheshim soldia shanak sheyotu atugun. Eshesh shanak sheyotu um shuni anudok arman douk netem enyudok hos iri nini ananim soldia shurpak. 20 Aria eshesh shasuhw enyudok debeinyi mahin nyani anudok nenek rohwumesh iri profet showeshikesh. Anudok profet douk nenek enenyenen Iruhin atun neneken iri mour agundok enyudok mahin nyape um. Riguk anudok profet douk nenek sabainyi mour kabi Iruhin atun neneken iri um aria nenek rohw um eshudok arpesh douk sharao enyudok mahin enyenyin kak aria shenek lotu um enyenyir aborir iri. Aria enyudok mahin nyani anudok profet eshesh mishish wata shoresh aria showashesh shagrukuk agudok nuwag douk nyih hanuwi amudok utom douk shahwaram salfa iri hanu um. 21 Aria anudok arman douk netem hos iri nabo enyudok mahin nyani anudok profet esheshim soldia hagok hatuh. Anan makwumam atudok bainat douk tatograri ananit nokwat iri. Douk amam hagok aria ihiguhw-umorim armiguhw hwanaki hwape hwawok amamiruh yegeshiweruh aria ogwoguh dugaroguh abom wosik atin.
19:519:5 Putik futnot nyape Revelesen 11:18 iri.
19:719:7 Putik futnot nyape Revelesen 11:18 iri.
19:1819:18 Putik futnot nyape Revelesen 11:18 iri.