1 Filisitibɑ bɑ Isirelibɑ tɑbu wɔri. Mɑ Isirelibɑn tɑbu kowobu bɑ duki suɑ. Filisiti be, bɑ bu nɑɑ girɑ bɑ go go Giliboɑn guurɔ. 2 Bɑ mɑɑ Sɔɔlun tii kɑ win bibu itɑ Yonɑtɑm kɑ Abinɑdɑbu kɑ Mɑɑkisuɑ nɑɑmwɛ. Mɑ bɑ bii be go. 3 Sɑnnɔ ge, gɑ Sɔɔlu swĩɛ. Tɛn towobu bɑ nùn sɛ̃ɛnu twee bɑ mɛɛrɑ kuɑ gem gem. 4 Yerɑ u win tɑbu yɑ̃ɑ sɔɔwo sɔ̃ɔwɑ u nɛɛ, u win tɑkobi womɔ u nùn ye sɔku kpɑ bɑngo sɑrirugii be, bu ku rɑɑ nùn sɔku bu yɑɑ kɑsiki.

Adɑmɑ durɔ wi, u yinɑ u ko mɛ, domi bɛrum nùn mwɑ gem gem. Mɑ Sɔɔlu u tɑkobi ye mwɑ u kɑ tii sɔkɑ u kibɑrisi u tɑɑre. 5 Ye win tɑbu yɑ̃ɑ sɔɔwo wi, u wɑ mɑ u gu, yerɑ u mɑɑ win tɑkobi suɑ u tii sɔkɑ nge mɛ Sɔɔlu u kuɑ. Mɑ bɑ gu yɑm tem mi.

6 Nge mɛyɑ Sɔɔlu u kɑ gu kɑ win bibu itɑ be, kɑ win tɑbu yɑ̃ɑ sɔɔwo kɑ sere mɑɑ win tɑbu kowobu kpuro sɑnnu. 7 Ye Isireli be bɑ wɑ̃ɑ Yisirɛɛlin wɔwɑɔ bɑ nuɑ mɑ ben tɑbu kowobɑ duki suɑ, Sɔɔlu kɑ win bii tɔn durɔbu bɑ mɑɑ gu, yerɑ bɑ ben wusu deri bɑ duki suɑ. Mɑ Filisitibɑ bɑ nɑ bɑ sinɑ wuu si sɔɔ.

8 Ye n kuɑ sisiru Filisitibɑ bɑ nɑ bɑ goo nin yɑ̃nu potirimɔ. Yerɑ bɑ Sɔɔlu kɑ win bibu itɑn gonu wɑ Giliboɑn guurɔ. 9 Mɑ bɑ Sɔɔlun wiru burɑ bɑ win tɑbu yɑ̃nu kpuro potirɑ. Yerɑ bɑ sɔmɔbu gɔrɑ bu yen lɑbɑɑri kpɑrɑ ben bũu diɑɔ kɑ ben tɔmbun mi, ben tem sɔɔ kpuro. 10 Yerɑ bɑ win tɑbu yɑ̃nu suɑ bɑ doke ben bũu dirɔ. Mɑ bɑ win wiru suɑ bɑ bwɛ̃ ben bũu wi bɑ mɔ̀ Dɑgonin dirɔ.

11 Sɑnɑm mɛ Yɑbɛsi ye yɑ wɑ̃ɑ Gɑlɑdin temɔ, yen tɔmbu bɑ nuɑ ye Filisitibɑ bɑ Sɔɔlu kuɑ, 12 yerɑ be bɑ sɑ̃ɑ tɑbu durɔ wɔrugɔbɑ bɑ seewɑ bɑ Sɔɔlu kɑ win bibun goo ni suɑ bɑ kɑ dɑ Yɑbɛsiɔ. Mɑ bɑ ben kukunu sikuɑ dɑ̃ru gɑrun nuurɔ Yɑbɛsi mi. Mɑ bɑ nɔɔ bɔkuɑ sɔ̃ɔ nɔɔbɑ yiru.

13 Sɔɔlu u guwɑ yèn sɔ̃ u Yinni Gusunɔ tɔnu kɑm kom kuɑ, u ǹ win woodɑbɑ mɛm nɔɔwɛ. U bikiɑru dɑwɑ be bɑ rɑ gɔribu sokun mi. 14 U ǹ Yinni Gusunɔ bikie. Mɑ Yinni Gusunɔ u derɑ u gu. Mɑ u win bɑndu suɑ u Isɑin bii, Dɑfidi wɛ̃.