16
1 Ye bɑ kɑ kpɑkoro te tunumɑ, yerɑ bɑ tu doke ten ɑyerɔ kuu bekurugiru sɔɔ te Dɑfidi u kuɑ ten sɔ̃. Yen biruwɑ u Yinni Gusunɔ yɑ̃ku dɔ̃ɔ mwɑɑrɑruginu kɑ siɑrɑbun yɑ̃kunu kuɑ. 2 Ye Dɑfidi u yɑ̃ku ni kuɑ u kpɑ, yerɑ u win tɔmbu Isirelibɑ domɑru kuɑ kɑ Yinni Gusunɔn yĩsiru. 3 Mɑ u be kpuro dĩɑnu bɔnu kuɑ, tɔn kurɔbu kɑ tɔn durɔbu. U bɑɑwure pɛ̃ɛ kɑ yɑɑ wɔ̃ɔrɑ wɛ̃ kɑ sere mɑɑ kirɑ te bɑ kuɑ kɑ resɛm gbebɑ.
Lefibɑ bɑ Yinni Gusunɔ
siɑrɑmɔ kɑ womusu
(I mɑɑ mɛɛrio Womu 105:1-15; 96; 106:1,47-48)
4 Mɑ Dɑfidi u Lefi ben gɑbu sɔmɑ wɛ̃ woodɑn kpɑkoro ten sɔ̃, kpɑ bu kɑ Gusunɔ be Isirelibɑn Yinni sɑ̃. Kpɑ bu nùn siɑrɑ, kpɑ bu nùn bɛɛrɛ wɛ̃. 5 Asɑfuwɑ u sɑ̃ɑ ben wirugii. Mɑ Sɑkɑri u sɑ̃ɑ win yiruse. Mɑ Yeyɛli kɑ Semirɑmɔtu kɑ Yehiɛli kɑ Mɑtitiɑ kɑ Eliɑbu kɑ Bɛnɑyɑ kɑ Obɛdi Edɔmu kɑ sere Yeyɛli bɑ guunu kɑ mɔrɔkunu soomɔ. Mɑ Asɑfu u mɑɑ sɛkɛtirɛnu soomɔ. 6 Mɑ yɑ̃ku kowo beni, Bɛnɑyɑ kɑ Yɑsiɛli bɑ kɔbi soomɔ tɑ̃ɑ tɑ̃ɑ Yinni Gusunɔn woodɑn kpɑkoro ten wuswɑɑɔ. 7 Tɔ̃ɔ terɑ Dɑfidi u derɑ Asɑfu kɑ wigibu bɑ Yinni Gusunɔ tɔmɑm toruɑ. Bɑ nɛɛ,
8 i Yinni Gusunɔ siɑro, kpɑ i nùn sɑ̃,
kpɑ i bwesenu nɔɔsiɑ sɔm bɑkɑ ni u kuɑ.
9 I nùn tɔmɔ.
I nùn siɑro kɑ womusu,
kpɑ i win sɔm mɑɑmɑɑkiginun gɑri kpɑrɑ.
10 I yɛ̃ɛrio win yĩsi dɛɛrɑrun sɔ̃,
kpɑ i nuku dobu ko
bɛɛ bèn gɔ̃ru gɑ nùn kɑsu.
11 I gɔsiro Yinni Gusunɔ Dɑm kpurogiin mi,
kpɑ i nùn kɑsu bɑɑdommɑ.
12-13 Bɛɛ Isirelibɑ, Yɑkɔbu Gusunɔn sɔm kowon bweseru,
bɛɛ be u gɔsɑ,
i yɑɑyo sɔm mɑɑmɑɑkigii ni u kuɑ
kɑ gɑri yi u bɛɛ sɔ̃ɔwɑ.
14 Gusunɔwɑ u sɑ̃ɑ bɛsɛn Yinni.
Wiyɑ u koo hɑnduniɑ kpuro siri.
15-16 I ɑrukɑwɑni ye yɑɑyo bɑɑdommɑ
ye u kɑ Aburɑhɑmu bɔkuɑ
kɑ mɑɑ nɔɔ mwɛɛ te u Isɑki kuɑ.
17 U kɑ ye Isirelibɑ, Yɑkɔbun bweseru bɔkuɑwɑ
yɑ n sɑ̃ɑ woodɑ sere kɑ bɑɑdommɑɔ.
18 U nɛɛ, u koo bu Kɑnɑnin tem wɛ̃
bu tubi di.
19 N deemɑ sɑnɑm mɛ,
Isirelibɑ bɑ ǹ dɑbi,
mɑ bɑ sɑ̃ɑ sɔbu tem mɛ sɔɔ.
20 Bɑ rɑ n dɑɑmɔwɑ bwese tukunun mi
kɑ wuu tukusɔ.
21 Adɑmɑ u ǹ dere goo u bu dɑm dɔre.
U mɑɑ sinɑmbu sɛɛyɑsiɑ ben sɔ̃.
22 U nɛɛ, i ku nɛn tɔn be nɑ gɔsɑ bɑbɑ.
I ku mɑɑ nɛn sɔmɔbu kɔ̃sɑ kuɑ.
23 Yen sɔ̃, bɛɛ hɑnduniɑgibu,
i Yinni Gusunɔ tɔmɔ.
I win fɑɑbɑn gɑri kpɑro tɔ̃ɔ bɑɑtere.
24 I win yiikon girimɑ kɑ win sɔm mɑɑmɑɑkiginu kpɑro
bwesenun suunu sɔɔ.
25 Domi Yinni Gusunɔ u kpɑ̃.
Wiyɑ n weenɛ bu siɑrɑ.
U bũnu kpuro nɑnum kere.
26 Bwese tukunun bũnu nu sɑ̃ɑwɑ kɑm dirum.
Adɑmɑ Yinni Gusunɔwɑ u wɔllu kuɑ.
27 Yiiko kɑ girimɑ yɑ wɑ̃ɑ win wuswɑɑɔ.
Mɑ dɑm kɑ nuku dobu wɑ̃ɑ win wɑ̃ɑ yerɔ.
28 Bɛɛ bwesenu kpuro,
i Yinni Gusunɔ yiiko kɑ bɛɛrɛ wɛ̃ɛyɔ.
29 I Yinni Gusunɔn yĩsiru yiiko wɛ̃ɛyɔ.
I kɑ nùn kɛ̃nu dɑɑwo win sɑ̃ɑ yerɔ.
Kpɑ i yiirɑ win wuswɑɑɔ
i nùn sɑ̃ win dɛɛrɑrun sɔ̃.
30 Bɛɛ hɑnduniɑgibu kpuro,
i diirio win wuswɑɑɔ.
Tem mu dɑm mɔ,
mu ǹ bɑ̃ɑrimɔ.
31 Wɔllu, ɑ yɛ̃ɛrio,
kpɑ tem mu nuku dobu ko.
I bwesenu kpuro sɔ̃ɔwɔ
mɑ Yinni Gusunɔ u bɑndu dii.
32 Nim wɔ̃ku gu kuuki koowo,
kɑ ye yɑ wɑ̃ɑ ge sɔɔ.
Ye yɑ wɑ̃ɑ gen berɑ mi giɑ kpuro,
yu nuku dobu koowo.
33 Dɑ̃nu, i nuku dobun kuuki koowo
Yinni Gusunɔn wuswɑɑɔ.
Domi u wee u hɑnduniɑgibu siri.
34 I Yinni Gusunɔ siɑro win tɔn geerun sɔ̃.
Win kĩru tɑ ǹ nɔru mɔ.
35 I nùn nɔɔgiru sueyo i nɛɛ,
Gusunɔ bɛsɛn Fɑɑbɑ kowo, ɑ sun fɑɑbɑ koowo.
A sun wɔro bwese tukunun nɔmɑn di,
kpɑ ɑ sun mɛnnɑ.
Sɑɑ yerɑ sɑ ko nun tɔmɑ
sɑ n wunɛn yĩsi dɛɛrɑru soku,
kpɑ sɑ n yɛ̃ɛrimɔ, sɑ n mɔ̀,
36 Gusunɔ, Isirelibɑn Yinni,
wunɑ bɑ ko n siɑrɑmɔ sere kɑ bɑɑdommɑɔ.
Mɑ tɔmbu kpuro bɑ nɛɛ, ɑmi! I Yinni Gusunɔ siɑro.
37 Yen biru Dɑfidi u Asɑfu kɑ wigibu yiire bɑ n wɑ̃ɑ Yinni Gusunɔn woodɑn kpɑkoro ten mi, bɑ n sɔmburu mɔ̀ bɑɑdommɑ. 38 Mɑ u Obɛdi Edɔmu kɑ Hosɑ kɑ begibu gɔsɑ. Ben geerɑ sɑ̃ɑwɑ tɔmbu wɑtɑ kɑ nɔɔbɑ itɑ (68). Obɛdi Edɔmu, Yedutum bii, kɑ Hosɑ bɑ sɑ̃ɑwɑ kɔnnɔ kɔ̃sobu.
39 Mɑ Dɑfidi u yɑ̃ku kowo Sɑdɔku kɑ wigibu yiire bu sɔmburu ko gunguru wɔllɔ Gɑbɑoniɔ, mi bɑ rɑ Yinni Gusunɔ yɑ̃kuru kue, 40 bɑ n dɑ nùn yɑ̃ku dɔ̃ɔ mwɑɑrɑruginu kue bɑɑdommɑ yɑ̃ku yerɔ, bururu kɑ yokɑ, kpɑ bu mɑɑ ko kpuro ye yɑ wɑ̃ɑ woodɑ sɔɔ ye u Isirelibɑ wɛ̃. 41 Be sɔɔrɑ Hemɑni kɑ Yedutum kɑ sere be bɑ gɔsɑ bɑ ben yĩsɑ siɑ siɑ mi, bu kɑ Yinni Gusunɔ sɑ̃ bɑ wɑ̃ɑ. Domi wi, Yinni Gusunɔn tɔn geeru tɑ rɑ n wɑ̃ɑwɑ sere kɑ bɑɑdommɑɔ. 42 Hemɑni kɑ Yedutum, berɑ bɑ rɑ kɔbi kɑ sɛkɛtirɛnu kɑ sere mɑɑ yɑ̃ɑ ni nu tien wunɑnɔsu ko, ni bɑ rɑ kɑ womusu ko bɑ̀ n Yinni Gusunɔ sɑ̃ɑmɔ. Yedutum bibɑ bɑ mɑɑ sɑ̃ɑ kɔnnɔn kɔ̃sobu.
43 Yen biru, tɔmbu kpuro bɑ gɔsirɑ bɑ wurɑ ben yɛnusɔ. Mɑ Dɑfidi u mɑɑ dɑ win yɛnuɔ u kɑ win yɛnugibu domɑru kuɑ.
Nɔɔ mwɛɛ te Gusunɔ u Dɑfidi
kɑ win bibun bweseru kuɑ
(I mɑɑ mɛɛrio Sɑmuɛli II, 7:1-17)