1 Wɔ̃ɔ kpɔɔn sɑɑ yè sɔɔ sinɑmbu bɑ rɑ tɑbu yɑri, yerɑ Yoɑbu kɑ win tɑbu kowo dɑmgii be u kpɑre bɑ dɑ bɑ Amɔnibɑn tem wɔri bɑ kɔsukɑ. Mɑ bɑ Rɑbɑ tɑrusi bɑ mwɑ. N deemɑ sɑɑ ye sɔɔ, Dɑfidi u wɑ̃ɑwɑ win yɛnuɔ Yerusɑlɛmuɔ.

2 Yen biruwɑ Dɑfidi u wuu gen sunɔn furɔ wurɑguu mwɑ. Gen bunum mu sɑ̃ɑwɑ kilo tɛnɑ kɑ nnɛ. Mɑ bɑ gu kpee gobiginu gore. Mɑ bɑ gu suɑ bɑ Dɑfidi dokeɑ wirɔ. Yen dɔmɑ te, dukiɑ bɑkɑ Dɑfidi u gurɑ wuu gen min di u kɑ doonɑ. 3 Mɑ u gen tɔmbu yoo sɔmɑ koosiɑ. Ben gɑbɑ dɑ̃ɑ bɔɔrimɔ kɑ sii, gɑbu kɑ gbɛ̃ɛ, gɑbɑ kpenu dɑ̃kumɔ, mɑ gɑbɑ tem gbemɔ kɑ dɑ̃kunu. Nge mɛyɑ u mɑɑ Amɔnibɑn wusu kpuron tɔmbu yoo sɔmɑ koosiɑ. Yen biru, Dɑfidi u gɔsirɑmɑ Yerusɑlɛmuɔ kɑ win tɑbu kowobu.

4 Yenibɑn biru Isirelibɑ bɑ kɑ Filisitibɑ tɑbu kuɑ Gesɛɛɔ. Sɑɑ ye sɔɔrɑ Sibekɑi, Husɑgii u Sipɑi, Rɑfɑn bweserun turo go. Mɑ u Filisiti be sekuru doke. 5 Yen biru tɑbu mɑɑ seewɑ Isirelibɑ kɑ Filisitibɑn suunu sɔɔ. Yerɑ Ɛlikɑnɑni Yɑirin bii, u Lɑsimi, Goliɑti, Gɑtigiin wɔnɔ go. Lɑsimi win yɑɑsɑn buru tɑ bɔɔruwɑ nge weson beku tɛ̃ketiru. 6 Isirelibɑ bɑ mɑɑ kɑ Filisitibɑ tɑbu kuɑ Gɑti mi. Miyɑ tɑbu kowo goo wɑ̃ɑ u gunu too. Niki binu nɔɔbɑ tiɑ tiɑwɑ u mɔ nɔmɑɔ kɑ nɑɑsɔ. Mɑ ni kpuro nu kuɑ yɛndɑ nnɛ. Win tii u sɑ̃ɑwɑ Rɑfɑn bweserugii. 7 U Isirelibɑ nɔɔ kuurɑ, mɑ Yonɑtɑm, Dɑfidin mɔɔ, Simɛɑn bii, u nùn go.

8 Tɔn be kpuro bɑ sɑ̃ɑwɑ Rɑfɑn bweseru. Dɑfidi kɑ win tɑbu kowobɑ bɑ bu go Gɑtiɔ.