27
Tɑbu kowobun sɔmɑ
1 Wee Isireli be bɑ sinɑ bokon sɔmburu mɔ̀. Bɑ sɑ̃ɑwɑ yɛnu yɛ̃robu kɑ tɑbu kowobu nɔrɔm nɔrɔm kɑ wunɔm wunɔm wirugibu. Berɑ bɑ rɑ tɑbu kowobun wuunu kpɑre be bɑ rɑ n sɔmburu nɑɑmɔ suru kɑ suru, wɔ̃ɔ sɔɔ. Wuuru bɑɑtere tɑ sɑ̃ɑwɑ tɔmbu nɔrɔbun subɑ yɛndɑ nnɛ (24.000). 2-15 Wuu nin bɑɑtere tɑ ten wirugii mɔ.
Suru gbiikoo sɔɔ, Yɑsobeɑmu, Sɑbudiɛlin bii, Perɛsin bweseru sɔɔ, wiyɑ u wuu gbiikii ten tɑbu sinɑmbu kpɑrɑ.
Suru yiruse sɔɔ, Dodɑi, Akosigiiwɑ u wuuru yiruse kpɑrɑ. Mɑ Mikoloti u sɑ̃ɑ win yiruse.
Suru itɑse sɔɔ, Bɛnɑyɑ, yɑ̃ku kowo Yehoyɑdɑn biiwɑ u wuuru itɑse kpɑrɑ. U sɑ̃ɑwɑ tɑbu durɔ wɔrugɔbɑ tɛnɑn turo. Wiyɑ u mɑɑ sɑ̃ɑ ben wirugii. Win bii Amisɑbɑdiwɑ u nùn kɔsire kuɑ u wuu te kpɑrɑ.
Suru nnɛse sɔɔ, Asɑɛli, Yoɑbun mɔɔwɑ u wuuru nnɛse kpɑrɑ. Yen biruwɑ win bii Sebɑdiɑ u nùn kɔsire kuɑ.
Suru nɔɔbuse sɔɔ, Sɑmɛhutu Yisirɑgiiwɑ u wuuru nɔɔbuse kpɑrɑ.
Suru nɔɔbɑ tiɑse sɔɔ, Yirɑ, Ikɛsin bii, Tekoɑgiiwɑ u wuuru nɔɔbɑ tiɑse kpɑrɑ.
Suru nɔɔbɑ yiruse sɔɔ, Helɛsi Pɑlonigii, Efɑrɑimun bwese kɛrɑ sɔɔ, wiyɑ u wuuru nɔɔbɑ yiruse kpɑrɑ.
Suru nɔɔbɑ itɑse sɔɔ, Sibekɑi Husɑgii, Serɑkin bwese kɛrɑ sɔɔ, wiyɑ u wuuru nɔɔbɑ itɑse kpɑrɑ.
Suru nɔɔbɑ nnɛse sɔɔ, Abiesɛɛ Anɑtɔtugii, Bɛnyɑmɛɛn bwese kɛrɑ sɔɔ, wiyɑ u wuuru nɔɔbɑ nnɛse kpɑrɑ.
Suru wɔkuruse sɔɔ, Mɑrɑi Nɛtofɑgii, Serɑkin bwese kɛrɑ sɔɔ, wiyɑ u wuuru wɔkuruse kpɑrɑ.
Suru wɔkurɑ tiɑse sɔɔ, Bɛnɑyɑ Pirɑtonigii, Efɑrɑimun bwese kɛrɑ sɔɔ, wiyɑ u wuuru wɔkurɑ tiɑse kpɑrɑ.
Suru wɔkurɑ yiruse sɔɔ, Hɛlidɑi Nɛtofɑgii, Otiniɛlin bwese kɛrɑ sɔɔ, wiyɑ u wuuru wɔkurɑ yiruse kpɑrɑ.
Bwese kɛrin wirugibu
16 Wee be bɑ sɑ̃ɑ Isirelibɑn bwese kɛrin wirugibu.
Rubɛnin bwese kɛrɑ sɔɔ, Ɛliesɛɛ, Sikirin biiwɑ u sɑ̃ɑ wirugii.
Simɛɔn bwese kɛrɑ sɔɔ, Sefɑtiɑ, Mɑɑkɑn biiwɑ u sɑ̃ɑ wirugii.
17 Lefin bwese kɛrɑ sɔɔ, Hɑsɑbiɑ, Kemuɛlin biiwɑ u sɑ̃ɑ wirugii.
Aronin bibun bweseru sɔɔ, Sɑdɔkuwɑ u sɑ̃ɑ wirugii.
18 Yudɑn bwese kɛrɑ sɔɔ, Elihu, Dɑfidin mɛro bisibu sɔɔ, wiyɑ u sɑ̃ɑ wirugii.
Isɑkɑrin bwese kɛrɑ sɔɔ, Omiri, Mikɑɛlin biiwɑ u sɑ̃ɑ wirugii.
19 Sɑbulonin bwese kɛrɑ sɔɔ, Yisimɑyɑ, Abudiɑsin biiwɑ u sɑ̃ɑ wirugii.
Nɛfitɑlin bwese kɛrɑ sɔɔ, Yerimɔti, Asiriɛlin biiwɑ u sɑ̃ɑ wirugii.
20 Efɑrɑimun bibun bweseru sɔɔ, Hosee, Asɑsiɑn biiwɑ u sɑ̃ɑ wirugii.
Mɑnɑsen bwese kɛrɑn sukumgibu sɔɔ, be bɑ wɑ̃ɑ sɔ̃ɔ duu yeru giɑ, Yoɛli, Pedɑyɑn biiwɑ u sɑ̃ɑ wirugii.
21 Mɑnɑsen bwese kɛrɑn sukumgibu sɔɔ, be bɑ mɑɑ wɑ̃ɑ sɔ̃ɔ yɑri yeru giɑ, Gɑlɑdin temɔ, Ido, Sɑkɑrin biiwɑ u sɑ̃ɑ wirugii.
Bɛnyɑmɛɛn bwese kɛrɑ sɔɔ, Yɑɑsiɛli, Abunɛɛn biiwɑ u sɑ̃ɑ wirugii.
22 Dɑnun bwese kɛrɑ sɔɔ, Asɑrɛli, Yerohɑmun biiwɑ u sɑ̃ɑ wirugii.
Tɔn beni kpurowɑ bɑ sɑ̃ɑ Isirelibɑn bwese kɛrin wirugibu.
23 Dɑfidi u ǹ Isirelibɑ gɑrɑ be bɑ wɔ̃ɔ yɛndu mɔ kɑ be bɑ ǹ turɑ mɛ, yèn sɔ̃ Yinni Gusunɔ u nɔɔ mwɛɛru kuɑ mɑ u koo Isirelibɑ dɑbiɑsiɑ nge wɔllun kperi. 24 Yoɑbu, Seruyɑn biiwɑ u rɑɑ Isirelibɑ gɑribu toruɑ, mɑ yɑ Yinni Gusunɔ mɔru kuɑ. Yen sɔ̃nɑ u ǹ ye kurɑsie. Adɑmɑ bɑ ǹ tɔn be bɑ gɑrɑ min geeru yoruɑ sinɑ boko Dɑfidin wɑ̃ɑrun fɑɑgin tireru sɔɔ.
Dɑfidin sɔm kowobu gɑbu
25 Asimɑfɛti, Abudiɛlin biiwɑ u rɑ sinɑ bokon ɑrumɑni bere.
Yonɑtɑm, Osiɑsin biiwɑ u rɑ mɑɑ gbeɑn dĩɑnu bere, wuu mɑrosuginu kɑ bɑru kpɑɑnuginu, kɑ sere kɔ̃su yenuginu.
26 Ɛsiri, Kelubun bii wiyɑ u sɑ̃ɑ be bɑ gbeɑn sɔmɑ mɔ̀n wirugii.
27 Simɛi, Rɑmɑgii, wiyɑ u sɑ̃ɑ resɛm gbɑɑ sɔm kowobun wirugii.
Sɑbidi Sefɑmugii, wiyɑ u sɑ̃ɑ mi bɑ rɑ tɑm bere kpuron wirugii.
28 Bɑɑli Hɑnɑni, Gedɛɛgii, wiyɑ u rɑ dɑ̃ɑ ye bɑ mɔ̀ olifi kɑ sikɑmɔre ye yɑ wɑ̃ɑ wɔwɑ ye bɑ mɔ̀ Sefɑlɑɔn wunɑnɔsu ko.
Yoɑsi, wiyɑ u mɑɑ sɑ̃ɑ gum beru yenun wirugii.
29 Sitɑrɑi Sɑronigii, wiyɑ u rɑ kɛtɛ yi bɑ kpɑrɑmɔ Sɑroniɔn wunɑnɔsu ko.
Sɑfɑti, Adilɑin bii, wiyɑ u rɑ mɑɑ kɛtɛ yi bɑ kpɑrɑmɔ wɔwi sɔɔn wunɑnɔsu ko.
30 Obili, Isimɛɛli, wiyɑ u rɑ yooyoo si bɑ mɔn wunɑnɔsu ko.
Yesidiɑ Mɛronɔtugii, wiyɑ u rɑ mɑɑ kɛtɛku ninu ni bɑ mɔn wunɑnɔsu ko.
31 Yɑsisi Hɑgɑrenigii, wiyɑ u rɑ yɑ̃ɑ ni bɑ mɔn wunɑnɔsu ko.
Beni kpurowɑ bɑ sinɑ boko Dɑfidin ɑrumɑnin wunɑnɔsu mɔ̀.
Sinɑ bokon gerunɑsibu
32 Yonɑtɑm, Dɑfidin dusiwɑ u sɑ̃ɑ win bwisi kɛ̃ɔ. Yonɑtɑm wi, u bwisi kɑ yɛ̃ru mɔ too. Yehiɛli, Hɑkumɔnin bii wiyɑ u sɑ̃ɑ sinɑ bokon bibun keu koosio. 33 Ahitofɛli u mɑɑ sɑ̃ɑwɑ sinɑ bokon bwisi kɛ̃ɔ. Usɑi Aɑkigii, wiyɑ u sɑ̃ɑ sinɑ bokon bɔ̃ɔ kpɑɑsi. 34 Ahitofɛlin biru, Yehoyɑdɑ, Bɛnɑyɑn bii kɑ Abiɑtɑɑ, beyɑ bɑ mɑɑ kuɑ win bwisi kɛ̃ɔbu. Mɑ Yoɑbu u sɑ̃ɑ win tɑbu sunɔ.