Luda yã takada kũ Bisã yão 1 YUHANA 4

Nininↄ dↄ̃kↄ̃nɛnaa

1 Ma gbɛ̃ yenyĩdenↄ, àsun nini sĩnda pínki náani kɛro. À nininↄ tàasi ká à gwa, tó ò bò Luda kĩnaamɛ, zaakũ annabi ɛ́kɛnↄ dasi kũ̀ andunia gũn. 2 Yã kũ ani tó à Luda Nini dↄ̃n dí: Nini kũ à pì Yesu Kirisi sù bisãsiri ũ bò Luda kĩnaamɛ. 3 Nini kũ àdi zɛ kũ Yesuo lɛro dí bo Luda kĩnaaro. Kirisi ibɛrɛ kũ a mà àtɛn sun gwe. À kú andunia gũn kↄ̀.

4 Ma nɛ́ yenyĩdenↄ, Luda gbɛ̃nↄn á ũ, a zĩ̀i blè annabi ɛ́kɛ pìnↄa, zaakũ gbɛ̃ kũ à kú á gũn zↄ̃kↄ̃ de gbɛ̃ kũ à kú andunia gũnla. 5 Andunia gbɛ̃nↄmɛ ń ũ. Abire yãin òdi yã o andunia ágban, akũ andunia gbɛ̃nↄ dì ń yã ma. 6 Luda gbɛ̃nↄn ó ũ. Gbɛ̃ kũ à Luda dↄ̃ dì ó yã ma, gbɛ̃ kũ à de Luda pↄ́ ũro dì ó yã maro. Àkũ mɛ́ à tò ó Nini yãpurade dↄ̃kↄ̃nɛ kũ nini ɛ́kɛo.

Ludamɛ yenyĩde ũ

7 Ma gbɛ̃ yenyĩdenↄ, ògↄ̃ yekↄ̃i, zaakũ yenyĩ dì bo Luda kĩnaamɛ. Gbɛ̃ kũ à yenyĩ pì vĩ bi Luda nɛ́mɛ, à Luda dↄ̃. 8 Gbɛ̃ kũ à yenyĩ vĩro Luda dↄ̃ro, zaakũ Ludamɛ yenyĩde ũ. 9 Lákũ Luda a yenyĩ mↄ̀wɛrɛ gupuraa nàn dí: À a Nɛ́ mɛ̀n do légelege zĩ̀ andunia gũn, de ò wɛ̃̀ndi le kũ a gbãnao. 10 Yenyĩ pìin dí: Adi kɛ ókↄ̃nↄ mɛ́ ó ye Ludairo, Luda mɛ́ à yewái, akũ à a Nɛ́ zĩ̀ ó durunnanↄ kútɛkɛbↄ ũ. 11 Ma gbɛ̃ yenyĩdenↄ, lákũ Luda yewái lɛ nà, séde ògↄ̃ yekↄ̃i. 12 Gbɛ̃ke dí wɛ́ kɛ pla kũ Ludao zikiro, ama tó ó yekↄ̃i, Luda kú ó gũn, akũ a yenyĩ pì papana ó gũn.

13 Ó dↄ̃ kũ ó kú a gũn akũsↄ̃ à kú ó gũn, kũ à a Nini kpàwá yãi. 14 O è, a sèedadenↄn ó ũ, kũ De Luda a Nɛ́ zĩ̀ andunia Surabari ũ. 15 Gbɛ̃ kũ à ò gupuran kũ Yesu bi Luda Nɛ́mɛ, Luda kú a gũn, akũsↄ̃ à kú Luda gũn. 16 Ó Luda yenawái dↄ̃, akũ ó a náani vĩ.

Ludamɛ yenyĩde ũ. Gbɛ̃ kũ àdigↄ̃ yenyĩ vĩ kú Luda gũn, akũ Luda kú a gũn. 17 Pↄ́ kũ à tò yenyĩ pì papana ó gũnn dí: Ó swɛ̃̀ nigↄ̃ ditɛna yãkpatɛkɛgↄrↄ zĩmɛ. Zaakũ lákũ Kirisi de nà, ókↄ̃nↄ se, lɛn ó de lɛ andunia dí gũn. 18 Yenyĩ pìi dìgↄ̃ vĩna vĩro. Yenyĩ swáswa dì pɛ́ vĩnaa, zaakũ vĩna bi wɛ́tãmma yãmɛ. Vĩnade yenyĩ dìgↄ̃ swáswaro.

19 Ókↄ̃nↄ, ó yenyĩ vĩ, kũ Luda gĩnakɛ à yewái yãimɛ. 20 Tó gbɛ̃ pì á ye Ludai, akũ à zã̀ a Yesude dakei, ɛ́kɛdemɛ. Zaakũ gbɛ̃ kũ à ye a Yesude dake kũ à a èeiro, ani fↄ̃ àgↄ̃ ye Luda kũ adi a eroi yá? 21 Yã kũ à dìtɛwɛrɛn dí: Gbɛ̃ kũ à ye Ludai, séde àgↄ̃ ye a Yesude dakei.