Luda yã takada kũ Bisã yão 1 KINANƆ 4

Sulemanu ìbanↄ

1 Kína Sulemanumɛ Isaraila buri sĩnda pínki kína ũ. 2 A bùsu don'arɛdenↄ tↄ́n dí: Zadↄki nɛ́ Azariamɛ sa'oriki ũ. 3 Sisa nɛ́nↄ Ɛliↄrɛfi kũ Ahiaoomɛ a takadakɛ̃rinↄ ũ. Ailudi nɛ́ Yosafatamɛ yãzĩbaarukɛ̃ri ũ. 4 Yoyada nɛ́ Bɛnayamɛ a zĩ̀kari don'arɛde ũ. Zadↄki kũ Abiataoomɛ sa'orinↄ ũ. 5 Natã nɛ́ Azariamɛ a gu don'arɛdenↄ gbɛ̃ zↄ̃kↄ̃ ũ. Sa'ori Zabudu, Natã nɛ́mɛ a kpàasi ũ. 6 Aisamɛ a bɛ azia ũ. Abada nɛ́ Adoniramumɛ zↄ̀zĩ gbɛ̃ zↄ̃kↄ̃ ũ.

7 Kína Sulemanu Isarailanↄ bùsu gbɛ̃ zↄ̃kↄ̃nↄ dìtɛditɛ gunↄa gbɛ̃nↄn kuri awɛɛpla. Wɛ̃̀ kũ wɛ̃̀o ń baadi dì su kína kũ a ↄndenↄnɛ kũ pↄ́bleo ń baadi kũ a mↄo. 8 Ń tↄ́n dí: Uru nɛ́ mɛ́ à Ɛflaimu burinↄ gu sĩ̀sĩde vĩ. 9 Dɛka nɛ́ mɛ́ à Makaza kũ Salabimuo kũ Bɛsɛmɛsio kũ Ɛlↄni Bɛtanao vĩ. 10 Ɛsɛdi nɛ́ mɛ́ à Arubo kũ Sokoo vĩ kũ Ɛfa guo pínki dↄ. 11 Abinadabu nɛ́ mɛ́ à Dↄru gusĩsĩde vĩ. Sulemanu nɛ́nↄgbɛ̃ Tafamɛ a nↄ ũ. 12 Ailudi nɛ́ Baana mɛ́ à Tanaki vĩ kũ Mɛgidoo kũ Bɛtɛsã gu kũ à kãni kũ Zarɛtão Yɛzɛrili gɛ̃i kpa pínki zaa Bɛtɛsã ari Abɛli Mɛↄla ari Yↄkɛmɛamu dire kpa. 13 Gɛba nɛ́ mɛ́ à Ramↄ Giliada vĩ kũ Manase nɛ́ Yairi lakutu kũ ò kú Giliada gũnnↄ kũ Agobu gu kũ à kú Basão kũ a wɛ́ra bĩnide mɛ̀n baaakↄ̃nↄ. Ò ń zɛ́ gùrukpananↄ kɛ̀ kũ mↄ̀gotɛ̃omɛ. 14 Ido nɛ́ Ainadabu mɛ́ à Manaimu gu vĩ. 15 Aimaza mɛ́ à Nafatali gu vĩ. Àkũ mɛ́ à Sulemanu nɛ́nↄgbɛ̃ Basɛma sɛ̀ nↄ ũ. 16 Usai nɛ́ Baana mɛ́ à Asa gu vĩ kũ Alotio. 17 Parua nɛ́ Yosafata mɛ́ à Isaka gu vĩ. 18 Ela nɛ́ Simɛi mɛ́ à Biliaminu gu vĩ. 19 Uri nɛ́ Gɛba mɛ́ à Giliada gu vĩ. Amↄrinↄ kína Siↄ̃ kũ Basã kína Oguo mɛ́ ò kú gwe yã. Gɛbamɛ gu pì don'arɛde ũ ado. 20 Yudanↄ kũ Isarailanↄn dasi lán ísiralɛ bùsu'atɛ̃ bà. Òdigↄ̃ pↄ́ ble ò í mi ò pↄnna kɛ.

Sulemanu nnamana kũ a ↄ̃ndↄ̃o

21 Zaa Yuflati ari Filisitininↄ bùsun kũ Misila bùsu lɛ́o, Sulemanu mɛ́ à kí blè bùsuu pìnↄa pínki. Bùsuu pìnↄ gbɛ̃nↄ dìgↄ̃ táfe bonɛ ari a wɛ̃̀ndi lɛ́n. 22 Sulemanu ↄn gↄrↄ do pↄ́blen dí: Flawa asasa bupla akuri, wísiti asasa basↄↄro. 23 Zù mɛ̀kpana kũ ò gwà bɛ mɛ̀n kuri, kpàsa zù baro, sã basↄↄro kũ gãnↄ kũ zↄ̃nↄ kũ bùganↄ kũ ko mananↄ dↄ. 24 Zaakũ à kí blè bùsu kũ à kú Yuflati ifãlɛtɛ kpanↄa pínki sɛna zaa Tifisa ari Gaza, akũsↄ̃ yãkete kú gukearo. 25 Sulemanu gↄrↄa Yudanↄ kũ Isaraila kũ ò kú zaa Dã ari Bɛsɛbanↄ katɛna ń bùsun ń laakariiamɛ, baadi kũ a geepi línↄ kũ a kakapura línↄ.

26 Sulemanu sↄ̃ kũ òdi gó gátɛnↄ kↄ́sↄ dúbu siikↄ̃mɛ. A sↄ̃ kũ òdi diḿmanↄ sↄ̃, dúbu kuri awɛɛpla. 27 Gu gbɛ̃ zↄ̃kↄ̃ↄ pìnↄ sↄ̃, ń baadi dìgↄ̃ sunɛ kũ pↄ́bleo a mↄa kína Sulemanu kũ gbɛ̃ kũ òdi su pↄ́ ble kãaonↄ pↄ́ ũ. Pↄ́ke dì kĩaḿmaro. 28 Òdigↄ̃ su sↄ̃ pìnↄnɛ kũ éseo kũ sɛ̃̀ɛo dↄ gu kũ ò kún, lákũ ò dìtɛ ń baadinɛ nà.

29 Luda Sulemanu gbà ↄ̃ndↄ̃ kũ wɛ́zɛ̃o manamana. Oni fↄ̃ ò a dↄ̃na lɛ́ dↄ̃ro, lákũ oni fↄ̃ ò ísiralɛ bùsu'atɛ̃ lɛ́ dↄ̃ro nà. 30 Sulemanu ↄ̃ndↄ̃ de ifãbokikpadenↄ kũ Misilanↄ pↄ́la ń pínki. 31 À ↄ̃ndↄ̃ de gbɛ̃ sĩnda pínkila. À de Ɛzɛra buri Etani pↄ́la kũ Maↄli nɛ́nↄ Emani kũ Kalakolio kũ Daadao. À tↄ́ bò bùsu kũ ò lìkainↄ gũn pínki. 32 À yáasi zù dúbu aakↄ̃ akũsↄ̃ lɛ̀ kũ à dànↄ kà dúbu do kũ mɛ̀n sↄↄroo. 33 À línↄ kũ lánↄ yã bↄkↄtɛnaa kɛ̀, naana zaa sida lí kũ à kú Lɛbana bùsun ari à gɛ̀ɛ pɛ́ sɛ̃̀sↄ̃vlã kũ àdi butɛ bĩnianↄa. À nↄ̀bↄnↄ yã dàńnɛ dↄ kũ bãnↄ kũ pↄ́ kũ òdi táa o kũ kùaonↄ kũ kpↄ̀nↄ. 34 Kína kũ ò kú andunia gũnnↄ a ↄ̃ndↄ̃ baaruu mà ń pínki. Bùsu kũ bùsuuo pínki ń gbɛ̃nↄ zĩ̀ ò gɛ́ a ↄ̃ndↄ̃yã ma.