1 Kũ Sulemanu Dikiri ↄnn kàtɛ à làka kũ a ↄnnwo kũ zĩ kũ a pↄ kúanↄ pínki, 2 akũ Dikiri ɛ̀ra à bò à sùa a gɛ̃̀n pladeo lákũ à bò à sùa Gibiↄ̃ nà 3 à pìnɛ: Ma adua kũ n kɛ̀ kũ kútɛ kũ n kɛ̀mɛnɛoo mà. Ma kpɛ́ kũ n bòo pìi dìtɛ ma pↄ́ ũ, ma tↄ́ nigↄ̃ kúa lakanaa sari. Ma wɛ́ nigↄ̃ kúa, ma pↄ nigↄ̃ kúa. 4 Mↄkↄ̃n sↄ̃, tó ń tɛ́ ma zɛ́n súsu kũ nɛ̀sɛ purao lákũ n de Dauda bà, tó ń yã kũ ma dìtɛnnɛnↄ kũna kũ ma yã'onnɛnanↄ, tó ntɛni ma ↄdↄki gwa, 5 mani n kpata zĩni pɛ́tɛ Isarailanↄ tɛ́, anigↄ̃ lakana vĩro, lákũ ma a lɛ́ sɛ̀ n de Daudanɛ nà, ma pì a burinↄ nigↄ̃ kú Isaraila kpatan gↄrↄ sĩnda pínki. 6 Tó mↄkↄ̃n ke n nɛ́nↄ kpɛ lìmɛnɛ sↄ̃, tó á ma dokayãnↄ kũ yã kũ ma dìtɛárɛnↄ kũnaro, tó a gɛ do tãnanↄi ari átɛni ń gbagba, 7 mani Isarailanↄ bↄtɛ bùsu kũ ma kpàḿman, mani gí kpɛ́ kũ ma dìtɛ ma pↄ́ ũ pìii, oni gↄ̃ lalandi pↄ́ ũ, pina pↄ́ ũ buri sĩnda pínkinɛ. 8 Bee kũ kpɛ́ pì naasikɛo, a yã ni bo gbɛ̃ kũ òtɛn gɛ̃tɛ a sarɛnↄ sarɛ. Oni suru gá ò pi: À kɛ̀ dera Dikiri kɛ̀ bùsu dí kũ kpɛ́ díoonɛ lɛɛ? 9 Oni pińnɛ: Kũ ò pã kpà Dikiri ń Luda kũ à ń dizinↄ bↄ̀tɛ Misilai yãimɛ. Ò zɛ̀ kũ tãnanↄ, òtɛni ń gbagba òtɛn kútɛńnɛ. Abire yãin Dikiri kisira dí zĩ̀ḿma pínki.

10 Sulemanu ↄn mɛ̀n pla pìnↄ kàɛ wɛ̃̀ baromɛ, Dikiri ↄn kũ a zĩda bɛo. Abire gbɛran 11 à Galili bùsu wɛ̃tɛ kpà Taya kína Hiramua mɛ̀n baro, zaakũ Hiramu sida lí kũ pini lío kũ wuraao kpàa lákũ à yei nà. 12 Kũ Hiramu bò Taya à gɛ̀ɛ à wɛ̃tɛ kũ Sulemanu kpàawanↄ gwà, adi kɛnɛro, 13 akũ à pì: Ma gbɛ̃, wɛ̃tɛ kpate takanↄn n kpàma gwee? Akũ ò tↄ́ kpà gu pìinɛ Kabulu ari kũ a gbãrao. 14 Hiramu gĩnakɛ à wuraa kpã̀zã Sulemanunɛ yã tↄn siikↄ̃.

15 Gbɛ̃ kũ Sulemanu ń dá zↄ̀zĩnnↄ yãn dí. Gbɛ̃ pìnↄ mɛ́ ò Dikiri ↄn kũ Sulemanu ↄnnwo zĩ kɛ̀. Ò Milo wɛ̀ɛɛ tàta kũ bùsuuo, ò Yurusalɛmu bĩni bò, ò ɛ̀ra ò Azo kũ Mɛgidoo kũ Gɛzao kɛ̀kɛ ò kàtɛ. 16 Misila kína Firi'auna lɛ̀tɛ Gɛza pìia yã, akũ à sì à tɛ́ sↄ̃̀a à Kanaa kũ ò kú a gũnnↄ dɛ̀dɛ, akũ à kpà a nɛ́nↄgbɛ̃a zãkɛna gba ũ gↄrↄ kũ à a kpã̀zã Sulemanua. 17 Akũ Sulemanu ɛ̀ra à Gɛza pìi kɛ̀kɛ à kàtɛ kũ Bɛtoroni gɛ̃i pↄ́o 18 kũ Baalao kũ Tadamↄ kũ à kú a bùsu gbárannanwo 19 kũ wɛ̃tɛ kũ à kusuna kàtɛnnↄ kũ wɛ̃tɛ kũ a sↄ̃gonↄ kũ a sↄ̃nↄn kunnↄ kũ kpɛ́ kũ à ye à dↄ Yurusalɛmunↄ kũ Lɛbanao kũ bùsu kũ àtɛn kí bleanↄ pínki. 20 Buri kũ ò de Isaraila ũronↄ: Amↄrinↄ, Itinↄ, Pɛrizinↄ, Ivinↄ kũ Yebusi kũ ò gↄ̃̀nↄ ń pínki, 21 gbɛ̃ kũ Isarailanↄ dí fↄ̃ ò ń dɛdɛronↄ, ń buri kũ ò gↄ̃̀ ń bùsuu pìnnↄn Sulemanu ń dá zↄ̀zĩn, akũ òdigↄ̃ zĩ pì kɛ lɛ ari kũ a gbãrao. 22 Adi Isarailanↄ da zↄ̀zĩnlo. Mↄ́kↄ̃nↄn à ń dítɛ a zĩ̀karinↄ ũ, a ìbanↄ, a kína dakenↄ, a gbɛ̃nↄ don'arɛdenↄ, a sↄ̃godenↄ, a sↄ̃denↄ. 23 Mↄ́kↄ̃nↄmɛ zĩ kũ òtɛn kɛ pì gbɛ̃ zↄ̃kↄ̃nↄ ũ dↄ, ò gbɛ̃nↄn wàa pla kũ basuppla akurio.

24 Kũ Firi'auna nɛ́nↄgbɛ̃ bò Dauda wɛ̃tɛn à tà a kpɛ́ kũ Sulemanu bòarɛn, a gbɛran Sulemanu Milo wɛ̀ɛɛ tàta. 25 Wɛ̃̀ kũ wɛ̃̀ɛo Sulemanu dìgↄ̃ sa o gɛ̃̀n aakↄ̃kↄ̃. Àdi sa'opↄ kũ òdi ká tɛ́n à tɛ́ kũ kũ kɛnnakũkↄ̃o sa'opↄo o sa'oki kũ à bò Dikirinɛɛa, àdi turaretiti kpata Dikiri arɛ gwe dↄ. Lɛn à Dikiri ↄn zĩnↄ kɛ̀ lɛ mámmam.

26 Kína Sulemanu gó'itɛnↄ kɛ̀ Ɛziↄ̃ Gɛba Elata sarɛ Ɛdↄmu bùsun Isira Tɛ̃ra lɛ́a. 27 Hiramu a góde kũ ò ísira dↄ̃nↄ zĩ̀, akũ ò dì ísira musu lɛɛlɛ kũ Sulemanu gbɛ̃nↄ. 28 Ò gɛ̀ɛ Ofi, ò wuraa sɛ̀tɛ gwe tↄn gɛ̃ro ò sùo kína Sulemanunɛ.