1 Gↄrↄ birea gyã Yeroboamu nɛ́gↄ̃gbɛ̃ Abia kũ̀. 2 Akũ Yeroboamu pì a nanↄnɛ: Ǹ futɛ ǹ n zĩda litɛ, de òsun n dↄ̃ ma nↄ ũro, ǹ gɛ́ Silo. Annabi Ahia kú gwe. Àkũ mɛ́ à pìmɛnɛ manigↄ̃ de Isarailanↄ kína ũ. 3 Ǹ burodi sɛ́ mɛ̀n kuri kũ kàranↄ kũ zↄ́ tùruuo, ǹ gɛ́onɛ. Ani yã kũ ani nɛ́ pì le onnɛ. 4 Akũ Yeroboamu nanↄ kɛ̀ lɛ, à fùtɛ à gɛ̀ɛ Silo à gɛ̃̀ Ahia bɛa. Ahia wɛ́ dí gu e doro, zaakũ à zĩ kũ̀ a wɛ́ gↄ̃̀ dãadãa. 5 Dikiri gĩnakɛ à ò Ahianɛ kũ Yeroboamu nanↄ nɛ́ tɛn gyã kɛ, akũ àtɛn su à yã gbɛkamma. Ǹ onɛ lán dí bà lán dí bà, zaakũ tó à sù, ani a zĩda litɛnnɛ gbɛ̃ pãnde ũmɛ.

6 Kũ Ahia a gɛ̀sɛ kĩnii mà, àtɛn gɛ̃ kpɛ́n, à pì: Ǹ gɛ̃ Yeroboamu nanↄ! Bↄ́yãin n n zĩda lìtɛ lɛɛ? Yã pãsĩn Luda pì mà onnɛ. 7 Ǹ gɛ́ ǹ o Yeroboamunɛ, Dikiri Isarailanↄ Luda pì, akãamɛ a n sɛ n gbɛ̃nↄ tɛ́, a n kɛ a gbɛ̃ Isarailanↄ don'arɛde ũ. 8 A kpataa bò Dauda burinↄ ↄĩ, akũ a n kan, ama ń de lán a zↄ̀bleri Dauda bàro, kũ à a yãditɛnanↄ kũna, à tɛ́i kũ nɛ̀sɛdoo à yã kũ á yeii kɛ̀. 9 N yã vãni kɛ̀ de gbɛ̃ kũ ò dònnɛ arɛnↄla, n gɛ n tãnanↄ kɛ̀ n zĩdanɛ, mↄ̀ kũ n kàsanↄ, akũ n kpɛ lìarɛ, n a pↄ fɛ̃̀. 10 Abire yãin áni ásaru zĩ n burinↄa, áni n gↄ̃gbɛ̃nↄ kakatɛ Isarailanↄ gũn zↄ̀nↄ kũ zĩdadenↄ ń pínki, áni tɛ́ na n bɛa, lákũ òdi tɛ́ na zùgbↄ̃ↄa nà ari à tɛ́ kũ à láka pínki. 11 Gbɛ̃danↄ ni n buri kũ oni gaga wɛ̃tɛnnↄ só, bãnↄ ni n gbɛ̃ kũ oni gaga sɛ̃̀nnↄ ble. Dikiri mɛ́ à ò lɛ. 12 Mↄkↄ̃n sↄ̃ nↄgbɛ̃, ǹ futɛ ǹ tá bɛ. Tó n gɛ̀sɛɛ pɛ̀tɛ wɛ̃tɛ gũn gↄ̃̀nↄ, nɛ́ pì ni ga. 13 Isarailanↄ ni a gɛ̀ ↄ́ↄ dↄ ò a vĩ. Yeroboamu burinↄ tɛ́ ń pínki, àpiin oni vĩ ado, zaakũ àkũmɛ ado Dikiri Isarailanↄ Luda yã mana lèa Yeroboamu ↄnn. 14 Dikiri ni kína pãnde ditɛ a gbɛ̃ Isarailanↄnɛ. Àkũ mɛ́ ani Yeroboamu burinↄ dɛdɛ. Gbãra día! Bↄ́ↄↄ? Lɛmɛ, tera dí! 15 Dikiri ni gò tↄ̃ Isarailanↄa, oni gↄ̃ lán leba kũ àtɛn yĩgã í gũn bà. Ani Isarailanↄ bↄtɛ bùsu mana kũ à kpà ń dizinↄa dín à ń fãkↄ̃a Yuflati bara dire, kũ ò Asatorɛ lí pɛ̀tɛpɛtɛ ò Dikiri pↄ fɛ̃̀onɛ yãi. 16 Ani Isarailanↄ kpáḿma durunna kũ Yeroboamu kɛ̀ à Isarailanↄ dà a kɛnan yãi.

17 Akũ Yeroboamu nanↄ fùtɛ àtɛn tá. Kũ à kà Tiza, kũ à gɛ̀sɛɛ zɛ̀ kpɛ́lɛlɛa gↄ̃̀nↄ, akũ nɛ́gↄ̃gbɛ̃ pìi gà. 18 Ò a vĩ̀, akũ Isarailanↄ ↄ́ↄ dↄ̀ ń pínki lákũ Dikiri ò a zↄ̀bleri annabi Ahia gãi nà. 19 Yeroboamu yã kparanↄn kú Isarailanↄ kínanↄ gĩayãkɛna takadan, zĩ̀ kũ à kànↄ kũ a kíkɛyãnↄ pínki. 20 Yeroboamu kí blè wɛ̃̀ baro awɛɛplamɛ. Kũ à gà, akũ a nɛ́ Nadabu vùtɛ a gɛ̃nɛ ũ.

21 Sulemanu nɛ́ Reoboamumɛ Yudanↄ kína ũ. À kí blè a wɛ̃̀ bupla awɛɛdodemmɛ, akũ à kí blè Yurusalɛmu wɛ̃̀ gɛ̃ro awɛɛpla, wɛ̃tɛ kũ Dikiri sɛ̀ Isaraila buri sĩnda pínki wɛ̃tɛnↄ tɛ́ de a tↄ́ gↄ̃ kúa. A da tↄ́n Naama, Amↄni burimɛ. 22 Yudanↄ yã kũ Dikiri yeiro kɛ̀, ò a pↄ fɛ̃̀nɛ de ń dizinↄla ń pínki ń durunna kũ ò kɛ̀ yãi. 23 Ò tãnagbagbakinↄ bò ń zĩdanɛ sĩ̀sĩ lei sĩnda pínki musu kũ lí zↄ̃kↄ̃ sĩnda pínki gbáruo, ò gbɛ̀nↄ kũ línↄ pɛ̀tɛpɛtɛn. 24 Bee se tãnagbagbaki karuanↄn kú Isarailanↄ bùsun gↄ̃gbɛ̃nↄ kũ nↄgbɛ̃nↄ. Lɛmɛ Isarailanↄ buri kũ Dikiri pɛ̀ḿmańnɛnↄ dà vãninↄ sɛ̀tɛ lɛ pínki.

25 Kína Reoboamu kíblena wɛ̃̀ sↄↄrode gũnn Misila kína Sisaki sù à lɛ̀tɛ Yurusalɛmua. 26 À Dikiri ↄn aruzɛkɛnↄ kũ kínabɛ pↄ́nↄ nàkↄ̃a à wura sɛ̃gbako kũ Sulemanu pìnↄ sɛ̀tɛ pínki. 27 Akũ kína Reoboamu sɛ̃gbako pìnↄ gɛ̃nɛ pì kũ mↄ̀gotɛ̃o à nà a bɛ dogari don'arɛdenↄnɛ ń ↄĩ a bɛ kpɛ́lɛlɛa. 28 Tó kína tɛn gɛ́ Dikiri ↄnn, dogarii pìnↄ dìgↄ̃ sɛ̃gbako pìnↄ kũna. Tó ò ɛ̀ra ò sù, òdi ɛra ò kátɛ ń kpɛ́n.

29 Reoboamu yã kparanↄ kũ yã kũ à kɛ̀nↄ pínki kú Yudanↄ kínanↄ gĩayãkɛna takadan. 30 Reoboamu kũ Yeroboamuo dìgↄ̃ zĩ̀ ká kũ kↄ̃o gↄrↄ sĩnda pínki. 31 Kũ Reoboamu gà, ò a mira kpàkũsũ kũ a dizinↄo Dauda wɛ̃tɛn. A da tↄ́n Naama, Amↄni burimɛ. Akũ a nɛ́ Abia vùtɛ a gɛ̃nɛ ũ.