Luda yã takada kũ Bisã yão 1 SAMUƐLI 2

Ana aduakɛnaa

(Luk 1:46-55)

1 Akũ Ana aduaa kɛ̀ à pì:

Ma nɛ̀sɛ tɛn yáa dↄ Dikiria,

ma mì dana ía Dikiri yãi.

Matɛn woo kɛ ma ibɛrɛnↄa,

ma pↄ kɛ̀ nna, kũ à ma sura bà.

2 Gbɛ̃ke kú adona lán Dikiri bàro,

gbɛ̃ke kun lán a bàro,

gbɛ̀si ke kun lán ó Luda bàro.

3 Àsun yã bↄtɛ kũ yↄ̃nkↄoro,

àsun tó zĩda bina yã bo á lɛ́nlo,

zaakũ Dikiri Ludamɛ yãdↄ̃ri ũ,

àkũ mɛ́ àdi ó yãkɛnanↄ yↄ̃ à gwa.

4 Gↄ̃sa gbãnanↄ sá ɛ̀'ɛ,

ama gbɛ̃ funanↄ gbãna asa dↄ̀ ń pi.

5 Gbɛ̃ kãna tɛn a zĩda aya kɛ pↄ́ble yãi,

ama nà tɛn gbɛ̃ kũ àtɛni a dɛ yã dɛ doro.

Para nɛ́ ì mɛ̀n suppla,

ama nɛ́dasi'irii gↄ̃̀ wɛ̃nda.

6 Dikiri mɛ́ àdi tó gbɛ̃ ga,

akũsↄ̃ àdi tó gbɛ̃ gↄ̃ kun.

Àkũ mɛ́ àdi tó gbɛ̃ gɛ̃ bùsuu gũn,

akũsↄ̃ àdi gɛ̀ vu.

7 Dikiri mɛ́ àdi su kũ takasio kũ kunna nnao,

àdi ↄ tↄ̃ gbɛ̃kenↄa, àdi gbɛ̃kenↄ sɛ́ lei.

8 Àdi wɛ̃ndadenↄ bo bùsutitin,

àdi takasidenↄ bo tuburan.

Àdi ń vutɛ gu dokↄ̃nↄ kũ kínɛnↄ,

àdi tó ò kpata ble kũ gakurio.

Zaakũ zĩtɛ pɛ́tɛkinↄ bi Dikiri pↄ́mɛ,

akũ à andunia kàtɛa.

9 Àdi a gbɛ̃nↄ gbápɛtɛki dãkpãńnɛ,

àdi yãvãnikɛrinↄ dúgu zↄ̃ gusiran.

Gbɛ̃ke ni fↄ̃ à ↄsi nɛ kũ a zĩda gbãnaoro.

10 Dikiri ni a ibɛrɛnↄ ú lↄ́,

ani pata a ibɛrɛnↄa zaa musu,

ani yãkpatɛ kɛ kũńwo ari andunia lɛ́zɛkia.

Ani kína kũ à kàa gba gbãna,

ani gbɛ̃ kũ à sɛ̀ɛ pìi mì da ía.

11 Akũ Ɛlɛkana tà a bɛ wɛ̃tɛa Rama, akũ nɛ́gↄ̃gbɛ̃ pìi gↄ̃̀, àtɛn zĩ kɛ Dikirinɛ kũ sa'ori Ɛlio.

Ɛli nɛ́gↄ̃gbɛ̃nↄ

12 Ɛli nɛ́gↄ̃gbɛ̃nↄ bi nɛ́ pãsĩnↄmɛ, òdi Dikiri daro. 13 Yã kũ sa'orii pìnↄ dì kɛńnɛn dí. Tó gbɛ̃ sa ò, gↄrↄ kũ àtɛn nↄ̀bↄↄ pì fùfu kɛ, sa'ori ìba ke dì su kũ saka gã̀nɛ aakↄ̃deo kũna. 14 Akũ àdi sí ta gũn ke oro ke mↄ̀'oro, akũ sa'ori dì pↄ́ kũ saka pìi bòo sɛ́ a pↄ́ ũ pínki. Lɛn òdi kɛ Isaraila kũ ò sù Silonↄnɛ lɛ ń pínki. 15 Bee ari ògↄ̃ gɛ́ nↄ̀bↄ kpá tɛ́a a nísi láka, sa'ori ìba ke dì su à pi gbɛ̃ kũ à sa òo pìinɛ: Ǹ nↄ̀bↄ kpá sa'oria à kpá tɛ́a, zaakũ ani we à nↄ̀bↄ fùfukɛna símmaro, sé a búsu. 16 Tó gbɛ̃ pìi pìnɛ áni nↄ̀bↄ kpá tɛ́a gĩa a nísi láka, gbasa pↄ́ kũ à yei à sɛ́ sà, akũ ìbaa pìi dì pi: Oi! Ǹ kpáma gↄ̃̀nↄ! Tó n gi, mani bo kũ gbãnao. 17 Kɛfɛnna pìnↄ durunna zↄ̃kↄ̃ Dikirinɛ manamana, zaakũ òtɛni a sa'onↄbↄ gya bomɛ.

18 Nɛ́gↄ̃gbɛ̃ Samuɛli sↄ̃ àdigↄ̃ zĩ kɛ Dikirinɛ kũ uta lokommao dana. 19 A da dì uta gyaba fítinna zↄ̃nɛ. Tó àtɛn su sa o kũ a zão wɛ̃̀ kũ wɛ̃̀ɛo, akũ àdi suonɛ. 20 Ɛli dì sa mana o Ɛlɛkananɛ kũ a nↄ pìio à pi: Dikiri n gba nɛ́ dↄ kũ n nↄ pìio, nɛ́ kũ à a wɛ́ kɛ̀ akũ à kpà Dikiriaa pìi gɛ̃nɛ ũ. Akũ òdi tá ń bɛa. 21 Akũ Dikiri arubarikaa dà Ananɛ, à ɛ̀ra à nɛ́ ì mɛ̀n sↄↄro, gↄ̃gbɛ̃ aakↄ̃, nↄgbɛ̃ pla. Nɛ́gↄ̃gbɛ̃ Samuɛli sↄ̃ àtɛn zↄ̃kↄ̃ kũ Dikiri ↄĩ.

22 Ɛli zĩ kũ̀ yúkuyuku, à yã kũ a nɛ́nↄ tɛn kɛ Isarailanↄnɛ mà pínki kũ lákũ òdi wútɛ kũ nↄgbɛ̃ kũ òdigↄ̃ zĩ kɛ dakarɛki kuta kpɛ́lɛlɛanↄo nà. 23 Akũ à ń lá à pì: Bↄ́ mɛ́ à tò átɛn yã kɛ lɛɛ? Ma mà gbɛ̃ sĩnda pínki tɛni á yãvãnikɛna o. 24 Àsun kɛ lɛro ma nɛ́nↄ! Baaru kũ ma mà kũ àtɛn dagula Dikiri gbɛ̃nↄ tɛ́ pì manaro. 25 Tó gbɛ̃ durunna kɛ̀ a gbɛ̃dakenɛ, Luda ni a yã gↄ̃gↄ̃, ama tó gbɛ̃ durunna kɛ̀ Dikirinɛ, dí mɛ́ ani kútɛ kɛnɛɛ? Akũ ò gì ń de yã mai, zaakũ Dikiri zɛ̀ kũ ń dɛdɛna yãomɛ. 26 Nɛ́gↄ̃gbɛ̃ Samuɛli sↄ̃, àtɛn zↄ̃kↄ̃ kũ àtɛn kara. Àdigↄ̃ nna kũ Dikirio kũ gbɛ̃ sĩnda pínkio.

Àlesi bɛ̃̀nɛ dↄna Ɛli bedenↄa

27 Akũ Luda gbɛ̃ke sù à pì Ɛlinɛ: Dikiri pì, gↄrↄ kũ n dizi Haruna bedenↄ tɛn zↄ̀ ble Firi'aunanɛ zaa Misila, a bo a suḿma tɛ̃tɛ̃ntɛ̃, 28 Isaraila burinↄ tɛ́ pínki n dizi Harunan a sɛ̀ a gbàgbari ũ. Akũ à a gbagba, à turaretiti kàarɛ tɛ́n kũ sa'o'utao dana. Dikiri pì, a sa'opↄ kũ Isarailanↄ dì kpáta kpà a burinↄa pínki. 29 Dikiri pì, bↄ́ mɛ́ à tò adì a sa'ona nↄ̀bↄ zↄ̃ kũ gbáo kũ gba kũ a dìtɛ ò suoarɛ a kpɛ́ gũnwoo? À pì, bↄ́yãi ndì n nɛ́nↄ ditɛ deala, akũ átɛn mɛ̀ kpá kũ a gbɛ̃ Isarailanↄ sa'ona nↄ̀bↄ manaoo? 30 Abire yãi Dikiri Isarailanↄ Luda pì, a dìtɛ yã n burinↄ kũ n dizi burinↄ mɛ́ ògↄ̃ a gbagba ari gↄrↄ sĩnda pínki, ama tera adì we abirekũi doro. À pì, gbɛ̃ kũ à a kpe tàn áni bɛ̀ɛrɛ línɛ, gbɛ̃ kũ à a gya bò áni kɛ pↄ́ ũro. 31 Ǹ ma! À pì, gↄrↄke ni su, áni n bɛ gbãna símma kũ n de bɛ pↄ́o. Mare zĩ ke nigↄ̃ kú n ↄnn doro. 32 Ĩni wari e a bɛa. Bee tó a arubarikaa pìsi Isarailanↄa ń pínki, mare zĩ ke nigↄ̃ kú n ↄnnlo ari gↄrↄ sĩnda pínki. 33 N ↄndenↄ ni gaga zɛ́gbãn ń pínki. N gbɛ̃ kũ adi a bo a gbagbazĩ gũnlo ni tó n wɛ́ bobo kũ ↄ́ↄdↄo, n pↄ ni sira kũ. 34 N nɛ́ gbɛ̃nↄn pla Ɔfini kũ Finɛasio ni gaga gↄrↄ dokↄ̃nↄ zĩ ń pínki. Abirekũ nigↄ̃ dennɛ sèeda ũ kũ yã kũ a ò ni kɛ pínki. 35 Dikiri pì, áni gbɛ̃ sɛ́ sa'ori náanide ũ, ani a pↄyenyĩna kɛ lákũ á yei nà. Áni a burinↄ gba gbãna gíngin, anigↄ̃ zĩ kɛ kína kũ áni kánɛ ari gↄrↄ sĩnda pínki. 36 N buri kũ ò gↄ̃̀nↄ ni su ò kútɛ kɛnɛ ↄgↄ ke burodi yãi ò pi: Ǹ sa'ori zĩ ke dawɛrɛ ò kɛ, de ò pↄ́ fítinna le ògↄ̃ ble.