Luda yã takada kũ Bisã yão 1 SAMUƐLI 5

Luda àkpati kunna Filisitininↄ kĩnaa

1 Kũ Filisitininↄ Luda àkpatii sì, ò bòo Ɛbɛnɛza ò tào Asadↄdi. 2 Akũ ò gɛ̃̀o ń tãna Dagↄ̃ kpɛ́n ò dìtɛ a sarɛ. 3 Kũ gu dↄ̀, Asadↄdidenↄ fùtɛ kↄnkↄkↄnkↄ, akũ ò è Dagↄ̃ lɛ̀tɛ zĩtɛ a gbɛrɛa Dikiri àkpati arɛ. Akũ ò Dagↄ̃ sɛ̀ ò vùtɛ a gbɛ̀n. 4 Kũ gu dↄ̀ dↄ, ò fùtɛ kↄnkↄkↄnkↄ, akũ ò è Dagↄ̃ lɛ̀tɛ zĩtɛ a gbɛrɛa dↄ Dikiri àkpati arɛ. A mì kũ a ↄnↄ wòwokↄ̃a katɛna kpɛ́lɛlɛ gbĩ̀ia. A gbãn mɛ́ à gↄ̃̀ ditɛna ado. 5 Abire yãi Dagↄ̃ gbàgbarinↄ kũ gbɛ̃ kũ òtɛn gɛ̃ a kpɛ́n Asadↄdinↄ dì gɛ̀sɛ pɛ́tɛ a kpɛ́ kpɛ́lɛlɛ gbĩ̀iaro ari kũ a gbãrao.

6 Dikiri ↄ tↄ̃̀ Asadↄdidenↄa à ń ásaru kɛ̀ à gbɛ̀nna kàńgu, Asadↄdi kũ a lakutunↄ pínki. 7 Kũ Asadↄdidenↄ è lɛ, ò pì: Isarailanↄ tãna àkpati ni le àgↄ̃ kú kũoo la doro, zaakũ àtɛn ↄ tↄ̃wá kũ ó tãna Dagↄ̃o pãsĩpãsĩ. 8 Akũ ò gbɛ̃nↄ zĩ̀ ò ń kínanↄ kàkara ń pínki, akũ ò ń lá ò pì: Deran óni kɛ nà kũ Isarailanↄ tãna àkpatiioo? Akũ ò pì: Ò gɛ́o Gata. Akũ ò gɛ̀ɛo.

9 Kũ ò kào gwe, Dikiri ↄ tↄ̃̀ wɛ̃tɛ gwe denↄa dↄ, akũ wɛ̃tɛ pìi wã̀. Dikiri gagagyã kàńgu, gbɛ̀nna dàńla ń pínki nɛ́ fíti gbɛ̃ zↄ̃kↄ̃. 10 Akũ ò gɛ̀ɛ kũ Luda àkpatii pìio Ɛkɛrↄnu. Kũ òtɛn gɛ̃o, wɛ̃tɛpidenↄ wiki lɛ̀ ò pì: Ò gɛ̃̀wái kũ Isarailanↄ tãna àkpatiio, de ò ó dɛdɛ ó buriamɛ. 11 Akũ ò gbɛ̃nↄ zĩ̀ ò ń kínanↄ kàkara ń pínki ò pìńnɛ: À Isarailanↄ tãna àkpati sɛ́ à táo a gbɛ̀n, de àsun ó dɛdɛ ó buriaro. Zaakũ gaga tò wɛ̃tɛ pìi wã̀, Luda ↄ tↄ̃̀ḿma gwe manamana. 12 Gbɛ̀nna kà gbɛ̃ kũ odi garonↄgu, akũ wɛ̃tɛpidenↄ wiki kà ludambɛ.