Luda yã takada kũ Bisã yão 1 SAMUƐLI 10

Samuɛli nísikuna Solu mìia

1 Akũ Samuɛli nísi tùruu sɛ̀ à nísi kù Solunɛ a mìia, akũ à lɛ́ pɛ̀a à pì: Dikiri mɛ́ à n ditɛ don'arɛde ũ a gbɛ̃ Isarailanↄnɛ. Ĩni kí ble Dikiri gbɛ̃nↄa ǹ ń bo ń ibɛrɛ kũ ò likańyĩnↄ ↄĩ. Sèeda kũ ani tó ǹ dↄ̃ kũ Dikiri mɛ́ à n ditɛ a gbɛ̃nↄ don'arɛde ũn dí. 2 Tó o kɛ̃kↄ̃a la tera, ĩni da gbɛ̃nↄn planↄlɛ Zɛlɛza, Rahila mira sarɛ, Biliaminu bùsu lɛ́i. Oni pinnɛ: Ò zaaki kũ n gɛ wɛtɛnↄ lè. Ń yã n de kũna gbãna doro, n yãn àtɛni a damu kɛi sà, àtɛn pi deran áni kɛ a nɛ́ yã musu nàa? 3 Bona gwe, tó n tɛ arɛ, tó n ka gbiri lí kũ̀ kĩnaa zaa Tabo, gbɛ̃nↄn aakↄ̃ ni danlɛ gwe dↄ, òtɛn gɛ́ Luda gbagba zaa Bɛtɛli. Ń gbɛ̃ do blènɛnↄ kũna mɛ̀n aakↄ̃, ń gbɛ̃ do burodi kũna mɛ̀n aakↄ̃, akũ ń gbɛ̃ do sèwɛ̃ kũna tùru do. 4 Oni n aafia gbɛka, oni burodi mɛ̀n pla kpámma, ń sí. 5 Abire gbɛra tó n ka Luda sĩ̀sĩ kũ à kú Gibɛa, gu kũ Filisitininↄ gudãkpãki kún, tó n ka kãni kũ wɛ̃tɛ pìio, ĩni dakarɛ kũ annabinↄ ò tɛ́tɛkↄ̃i, òtɛn kipa gbagbakia. Òtɛn dońnɛ arɛ kũ mↄrↄnↄ kũ gã̀gãnↄ kũ gidigbonↄ kũ kutɛnↄ, òtɛn annabikɛyã o. 6 Dikiri Nini ni summa, ĩni annabikɛyã o kũńwo, ĩni li gbɛ̃ dufu ũ. 7 Tó sèeda birenↄ kɛ̀ lɛ, ǹ yã kũ n a kɛna zɛ́ è kɛ, zaakũ Luda kú kũnwo. 8 Ǹ domɛnɛ arɛ gɛna Giligala, mani n le gwe, mani sa'opↄ kũ òdi ká tɛ́n à tɛ́ kũ o kũ kɛnnakũkↄ̃o sa'opↄo. Ǹ ma dã gwe ari gↄrↄ suppla, mani su mà n le gwe, mani yã kũ ĩni kɛ onnɛ.

9 Kũ Solu kpɛ lì Samuɛlinɛ, àtɛn tá, Luda a nɛ̀sɛɛ lìtɛnɛ, akũ sèedaa pìnↄ kɛ̀ zĩ birea pínki. 10 Kũ ò kà Gibɛa, annabinↄ dàalɛ ò tɛ́tɛkↄ̃i, akũ Luda Nini sùa, àtɛn annabikɛyã o kũńwo. 11 Kũ gbɛ̃ kũ ò a dↄ̃nↄ a è, àtɛn annabikɛyã o kũ annabinↄ, ò kↄ̃ là ò pì: Bↄ́ mɛ́ à Kisi nɛ́ lèe? Solu kú annabinↄ tɛ́ see? 12 Akũ Gibɛa gbɛ̃ke yã wèḿma à pì: Gbɛ̃ kparanↄ denↄmɛ dínↄ ũ sↄ̃ↄ? Akũ à gↄ̃̀ baaru pↄ́ ũ òdi pi: Solu kú annabinↄ tɛ́ see? 13 Kũ Solu annabikɛyã ò à làka, akũ à gɛ̀ɛ gbagbaki pìia.

14 Kũ Solu tà bɛ kũ a zĩkɛriio, a disɛ̃ ń lá à pì: A gɛ mámɛɛ? Solu wèa à pì: O gɛ zaakinↄ wɛtɛmɛ. Kũ ódi ń ero, akũ o gɛ Samuɛli kĩnaa. 15 Akũ Solu disɛ̃ pìnɛ: Yã kũ Samuɛli òárɛ babamɛnɛ. 16 Akũ Solu pì: À pìwɛrɛ ò zaaki pìnↄ lè. Ama adi kpata yã kũ Samuɛli òarɛ babanɛro.

Samuɛli Solu kana kín gupuraa

17 Akũ Samuɛli Isarailanↄ kàkara Dikiri arɛ Mizipa. 18 À pìńnɛ: Dikiri á Luda pì, a á bↄ́tɛ Misila, a á sí Misilanↄ kũ buri kũ ò ↄ tↄ̃̀áwanↄ ↄĩ ń pínki. 19 Luda á bↄ́ á yã'ũmmananↄ kũ á warikɛnanↄ gũn pínki, akũ a gii gbãra, a pìnɛ à kína káárɛ. Tↄ̀, à mↄ́ à zɛ Dikiri arɛ sà buri kũ burio, ↄn kũ ↄnnwo. 20 Kũ Samuɛli sù kũ Isaraila burinↄ ń pínki, akũ gbɛ̀ Biliaminu burinↄ sɛ̀. 21 Akũ à sù kũ Biliaminu burinↄ ↄn kũ ↄnnwo. Akũ Matari ↄnnn ò zɛ̀o. Ɔnde pìnↄ tɛ́ Kisi nɛ́ Solu mɛ́ à blè. Kũ ò a wɛ̀tɛ, òdi a lero. 22 Akũ ò ɛ̀ra ò Dikiri là dↄ ò pì: Gↄ̃gbɛ̃ pìi sù la kↄ̀ yá? Akũ Dikiri pì: À utɛna asonↄ dagura. 23 Akũ ò bàa lɛ̀ ò gɛ̀ɛ ò a bò ò sù kãao ń tɛ́. Kũ à zɛ̀ ń tɛ́, ń pínki ń gbã̀na zɛ̀ a gã̀ lɛ́n. 24 Akũ Samuɛli pìńnɛ ń pínki: A gbɛ̃ kũ Dikiri sɛ̀ɛ è yá? Gbɛ̃ke kun lán a bà á tɛ́ro. Akũ gbɛ̃ sĩnda pínki wiki lɛ̀ ò pì: Luda ó kína dↄ̃ kũ aafiaao! 25 Akũ Samuɛli kíblena zɛ́ bↄ̀kↄtɛńnɛ, akũ à kɛ̃̀ takadan à dìtɛ Dikiri kpɛ́n. Akũ à ń gbárɛ, baadi tà a bɛa. 26 Solu sↄ̃ à tà a bɛa Gibɛa. Gↄ̃ wↄ́rↄgↄde kũ Luda zĩ kɛ̀ ń swɛ̃̀ɛ gũnnↄ tɛ̀i. 27 Akũ gbɛ̃ pã kenↄ pì: Gbɛ̃ bire mɛ́ ani ó sura ba yá? Akũ ò a gya bò, odi sunɛ kũ pↄ́keoro, ama Solu a yĩtɛna o.