1 Samuɛli pì Isarailanↄnɛ ń pínki: Ma yã kũ a òmɛnɛ mà pínki, ma kína kàárɛ kpatan. 2 Àkũ mɛ́ ani doárɛ arɛ sà. Makũ sↄ̃ ma zĩ kũ̀, ma mìkã pura kũ̀ akũ ma nɛ́nↄn kú kãáo. Ma doárɛ arɛ zaa ma kɛfɛnnakɛgↄrↄa ari kũ a gbãrao. 3 Makũn dí! À kɛ ma sèedadenↄ ũ Dikiri kũ kína kũ à kào arɛ. Ma zù ke zaaki sì á gbɛ̃kea yá? Ma á gbɛ̃ke blè yá? Ma wɛ́ tã̀ á gbɛ̃kea yá? Gusarɛgba ma wɛ́ blè ari ma bo á gbɛ̃ke kpɛ yá? Tó ma kɛ̀ lɛ, mani a fĩna bonɛ. 4 Akũ ò wèa ò pì: Ńdi ó blero, ńdi wɛ́ tãwáro, ńdi pↄ́ke sí ó gbɛ̃kearo. 5 Samuɛli pìńnɛ dↄ: Dikiri kũ kína kũ à kàaoomɛ á sèedadenↄ ũ gbãra, kũ ádi taari emaro. Ò pì: Dikiri mɛ́ à ó sèedade ũ. 6 Akũ Samuɛli pìńnɛ: Dikiri mɛ́ à Musa kũ Harunaoo dìtɛ, akũ ò bò kũ á dizinↄ Misila. 7 À zɛ kyáu Dikiri arɛ, mani yã mana kũ à kɛ̀árɛ kũ á dizinↄ babaárɛ. 8 Yakubunↄ gɛna Misila gbɛra á dizinↄ wiki lɛ̀ Dikiria, akũ à Musa kũ Harunaoo dìtɛ, ò ń bↄ́tɛ Misila, akũ ò ń kátɛ bùsu dín. 9 Kũ Dikiri ń Luda yã sã̀ńgu yãi, akũ à ń kpá Azo zĩ̀karinↄ gbɛ̃ zↄ̃kↄ̃ Siseraa kũ Filisitininↄ kũ Mↄabunↄ kínao, òtɛn zĩ̀ ká kũńwo. 10 Akũ ò wiki lɛ̀ Dikiria ò pì: O durunna kɛ̀ o pã kpànyĩ o dò Baalinↄi kũ Asatorɛnↄ. Ǹ ó bo ó ibɛrɛnↄ ↄĩ sà, ónigↄ̃ donyĩ. 11 Akũ Dikiri Gidiↄn dìtɛ kũ Barakio kũ Yɛfɛtao kũ Samusio ò á bó á ibɛrɛ pìnↄ ↄĩ gu sĩnda pínkia, akũ a gↄ̃ katɛna aafia.

12 Kũ a è Amↄni kína Naasa tɛn su lɛ́tɛáwa, bee kũ Dikiri á Ludamɛ á kína ũ, a pìmɛnɛ: Oi! Kínan á yei! 13 Tera sà kína kũ a gbɛ̀ka a sɛ̀n dí, àkũmɛ Dikiri dìtɛárɛ. 14 Tó á Dikiri vĩna vĩ akũ átɛn doi, tó átɛni a yã ma akũ ádi bo a yã kpɛro, tó ákↄ̃nↄ kũ gbɛ̃ kũ àtɛn kí bleáwao tɛ́ Dikiri á Ludai, ánigↄ̃ aafia. 15 Tó ádi Dikiri yã ma sↄ̃ro, akũ a bo a yã kpɛ, ani ↄ tↄ̃áwa lákũ à kɛ̀ á dizinↄnɛ nà. 16 À zɛ à yã zↄ̃kↄ̃ kũ Dikiri ni kɛárɛ e. 17 Ésekɛ̃gↄrↄn ó kun loo? Mani Dikiri sísi, ani tó legũ pata à ma, ánigↄ̃ dↄ̃ kũ á kína gbɛkanaa kɛ̀ Dikirinɛ ĩni manamana.

18 Akũ Samuɛli Dikiri sìsi, akũ Dikiri tò legũ pàta à mà zĩ birea. Akũ gbɛ̃ sĩnda pínki vĩna kɛ̀ Dikirinɛ kũ Samuɛlio manamana. 19 Akũ ò pìnɛ: Ǹ wɛ́ kɛwɛrɛ Dikiri n Ludaa de ókↄ̃nↄ n zↄ̀blerinↄ sún gagaro. O yã vãni kàra ó durunnanↄla, kũ o kína gbɛ̀ka.

20 Samuɛli pìńnɛ: Àsun tó vĩna á kũro. A yã vãni pìi kɛ̀ pínki, ama àsun kɛ̃ Dikiriaro. Àgↄ̃ doi kũ nɛ̀sɛ mɛ̀n doo. 21 Àsun kɛ̃a à tɛ́ pↄ́ ginanↄiro. Ò àre vĩro, oni fↄ̃ ò gbɛ̃ boro, zaakũ pↄ́ pãnↄmɛ. 22 Dikiri ni a gbɛ̃nↄ zukũnaro a tↄ́ zↄ̃kↄ̃ yãi, zaakũ à kàagu à á kɛ́ a gbɛ̃nↄ ũ. 23 Makũ sↄ̃, Dikiri sún tó mà durunna kɛarɛ mà aduakɛnaárɛ tóro. Mani zɛ́ mana kũ à de à sɛ́ mↄárɛ. 24 À vĩna kɛ Dikirinɛ, àgↄ̃ doi kũ náanio kũ nɛ̀sɛ mɛ̀n doo. À laasun lɛ́ yã zↄ̃kↄ̃ kũ à kɛ̀árɛnↄa. 25 Tó a gi a tɛ yã vãnii, ákↄ̃nↄ kũ á kínao, oni á kakatɛ á pínki.