Luda yã takada kũ Bisã yão 1 SAMUƐLI 14

Yonatã zĩ̀blena Filisitininↄa

1 Zĩkea Solu nɛ́ Yonatã pì kɛfɛnna kũ à a zĩ̀kapↄnↄ kũnaanɛ: Ǹ mↄ́ ò gɛ́ Filisitini gudãki kpa zã̀ dire. Adi o a denɛ sↄ̃ro. 2 Solu kú bísi lí gbáru Migirↄnu, Gibɛa sarɛ kũ zĩ̀karinↄ gbɛ̃nↄn wàa aakↄ̃. 3 Sa'ori Ahia kú ń tɛ́, à a uta lokomma dana. Ikabodu vĩ̀ni Aitubu nɛ́mɛ. Aitubu pì bi Finɛasi nɛ́mɛ, Ɛli kũ à de Luda gbàgbari ũ Silo daikoremɛ. Ń gbɛ̃ke dↄ̃ Yonatã gɛ̀ɛ gukearo.

4 Gbɛ̀sↄkↄ kũ Yonatã ye à gɛ̃n à Filisitini gudãkpãrinↄ le, gbɛ̀ sↄ̃ntɛnↄ pɛtɛpɛtɛnan ↄplai kũ ↄzɛo. A do tↄ́n Bozezi, a do sↄ̃ Sɛnɛ. 5 A do kú gugbãndurun Mikimasa kpa, a do sↄ̃ gɛ̀nↄmidↄki Gɛba kpa. 6 Akũ Yonatã pì kɛfɛnna pìinɛ: Ǹ mↄ́ ò gɛ́ gyↄfↄrↄde gudãkpãrii pìnↄ kĩnaa. Ke Dikiri ni kpáwái gwɛɛ? Zaakũ yãke ni fↄ̃ à kpá Dikirinɛ à tó ò gí zĩ̀ bleiro, bee tó ó dasi kesↄ̃ ó dasiro. 7 Akũ a zĩ̀kapↄnↄsɛri pìi pìnɛ: Lákũ à n pↄ gbà nà pínki dé, ǹ kɛ. Lákũ n sɛ̀ nà, má kú kũnwo kũ nɛ̀sɛ mɛ̀n doomɛ. 8 Akũ Yonatã pì: Tↄ̀, ò gɛ́ńyĩ ò ó zĩda mↄ́ńnɛ. 9 Tó ò pìwɛrɛ ò zɛ ò ń dãmɛ, óni zɛ ó gbɛ̀n, óni gɛ́ńyĩ doro. 10 Tó ò pì ò sumɛ sↄ̃, óni gɛ́ńyĩ, zaakũ abirekũ mɛ́ anigↄ̃ de sèeda ũ kũ Dikiri ń náwɛrɛ ó ↄĩ.

11 Akũ ò ń zĩda mↄ̀ Filisitini gudãkpãrii pìnↄnɛ. Akũ Filisitini pìnↄ pì: À gwa! Eberunↄ tɛn bo wɛ̀ɛ kũ ò ùtɛnnↄ gũn. 12 Akũ gudãkpãrii pìnↄ lɛ́ zù Yonatãi kũ a zĩ̀kapↄnↄsɛriio ò pì: À mↄ́ ò yãke oárɛ la. Akũ Yonatã pì a zĩ̀kapↄnↄsɛriinɛ: Ǹgↄ̃ tɛ́ ma kpɛ, zaakũ Dikiri ń ná Isarailanↄnɛ ń ↄĩ. 13 Akũ Yonatã tɛn lↄↄtɛ kutɛna, akũ a zĩ̀kapↄnↄsɛri tɛ́ a kpɛ. Kũ Yonatã ń nɛ́, akũ a zĩ̀kapↄnↄsɛrii pì ń dɛdɛ a kpɛ. 14 Lɛtɛmmana káaku pìi gũn Yonatã kũ a zĩ̀kapↄnↄsɛriio ń dɛdɛ gbɛ̃nↄn baro taka bà. Gu pì yàasaa kà bú dↄ̀rↄ basↄↄro taka bà. 15 Akũ swɛ̃̀ɛ kɛ̃̀ Filisitininↄgu ń bùran kũ zĩ̀lao pínki. Vĩna ń zĩ̀karinↄ kũ̀, gudãkpãrinↄ kũ gbɛ̃ kũ òdi gɛ́ lɛ́tɛ Isarailanↄanↄ ń pínki. Akũ zĩtɛ yĩ̀gãyĩgã. Luda mɛ́ à tò swɛ̃̀ɛ kɛ̃̀ńgu lɛ.

16 Kũ Solu gudãkpãri kũ ò kú kãao Gibɛanↄ è Filisitini zĩ̀karinↄ bàa lɛ̀ òtɛn fãkↄ̃a gu sĩnda pínkia, 17 akũ Solu pì gbɛ̃ kũ ò kú kãaonↄnɛ: À wɛ́ pá ó gbɛ̃nↄi à gwa, óni dↄ̃ gbɛ̃ kũ ò bò ó tɛ́. Kũ ò gwà, ò è Yonatã kũ a zĩ̀kapↄnↄsɛriio mɛ́ ò kú ń tɛ́ro. 18 Akũ Solu pì Ahianɛ: Ǹ mↄ́ kũ n sa'o'utao ò Dikiri gbɛka. Zaakũ zĩ birea à uta lokomma pì dana Isarailanↄ tɛ́ gwe. 19 Gↄrↄ kũ Solu tɛn yã o sa'orii pìinɛ, zuka kũ à dↄ Filisitininↄ bùran kɛ̀kɛ àtɛn kara, akũ Solu pìnɛ à tó gwe. 20 Solu a zĩ̀karinↄ kàkara ń pínki, ò gɛ̃̀ zĩ̀n, akũ ò è swɛ̃̀ɛ kɛ̃̀ Filisitininↄgu manamana, òtɛn fɛ̃nɛ kákↄ̃nɛ. 21 Eberu kũ ò vùtɛ Filisitininↄ tɛ́ yã ò sù kũńwo ń bùraa gũnnↄ ɛ̀ra ò nà ń gbɛ̃ kũ ò kú kũ Soluo kũ Yonatãooa. 22 Kũ Isaraila kũ ò utɛna Ɛflaimu bùsu gusĩsĩden gwenↄ mà Filisitininↄ tɛn bàa lɛ́, ò nà ń gbɛ̃nↄa dↄ ò pɛ̀tɛńyĩ zĩ̀i gũn. 23 Lɛn Dikiri Isarailanↄ bò lɛ zĩ birea, akũ ò zĩ̀i blè ari Bɛtavɛ̃.

Yonatã zↄ́blenaa

24 Isarailanↄ wari kɛ̀ zĩ birea, zaakũ Solu yã sɛ̀ kũ Luda tↄ́o a zĩ̀karinↄnɛ à pì: Ari ↄkↄsi gɛ́ kɛo, gbɛ̃ kũ à pↄ́ blè ari màgↄ̃ gɛ́ fĩna bo ma ibɛrɛnↄa, ade gↄ̃̀ láaripↄ ũmɛ. Akũ ń gbɛ̃ke dí pↄ́ blero. 25 Zĩ̀karinↄ sì lákpɛn ń pínki, akũ ò zↄ́'i è di gu pìn. 26 Kũ ò sì lákpɛn lɛ, ò è zↄ́'i tɛn bàa lɛ́, ama ń gbɛ̃ke dí ↄ zↄ̃a à dà a lɛ́nlo, kũ òtɛn vĩna kɛ ladana kũ Solu dà yãi. 27 Yonatã sↄ̃, adi yã kũ a de dìtɛ a zĩ̀karinↄnɛ maro, akũ à a gò kũ à kũnaa zↄ̃̀ zↄ́saa pìia. À ↄ nàa à dà a lɛ́n, akũ a wɛ́ kɛ̃̀. 28 Akũ zĩ̀kari ke pìnɛ: N de yã sɛ̀ a zĩ̀karinↄnɛ kũ Luda tↄ́o à pì, gbɛ̃ kũ à pↄ́ blè gbãra, ade gↄ̃̀ láaripↄ ũmɛ. Abire yãin ń gbɛ̃ sĩnda pínki gbãna làka. 29 Akũ Yonatã pì: Ma de tɛn wari dↄḿmamɛ. Ǹ gwa lákũ ma wɛ́ kɛ̃̀ nà, kũ ma zↄ́ pìi mↄ̀sↄ fíti yãi. 30 Tó gbɛ̃nↄ pↄ́ kũ ò sì ń ibɛrɛnↄaa blè gbãra yã dé, de ò Filisitininↄ dɛ̀dɛ de abirela.

31 Zĩ birean Isarailanↄ Filisitininↄ dɛ̀dɛ sɛna zaa Mikimasa ari Ayalↄni. Ò kpàsa búgubugu, 32 akũ ò sì ń pↄ́kãdenↄ tɛ́, ò sãnↄ kũ zùnↄ kũ zùnɛnↄ kũ̀kũ ò dɛ̀dɛ gwe gↄ̃̀nↄ, òtɛn só kũ a aruo. 33 Akũ ò a baaruu kpà Solunɛ ò pì: Ǹ gwa! Òtɛn durunna kɛ Dikirinɛ, òtɛn nↄ̀bↄ só kũ a aruo. Akũ Solu pì: A bo Dikiri yã kpɛ. À gbɛ̀ gbɛ̃̀ntɛ̃ gbigiri kɛ à suo ma arɛ la likalika. 34 Akũ à pì: À fãkↄ̃a ń tɛ́, à pińnɛ ń baadi mↄ́ ma kĩnaa kũ a zùuo ke a sã, ò a kùtu kpá la ò só. Àsun durunna kɛ Dikirinɛ à nↄ̀bↄ só kũ a aruoro. Akũ baadi sù kũ a zùuo gwãani birea, à a kùtu kpàkpa gwe. 35 Solu Dikiri gbagbaki bò gwe. Sa'oki kũ à bò káakun gwe.

36 Akũ Solu pì: Ò pɛ́tɛ Filisitininↄi gwãaniala ògↄ̃ ń dɛdɛ ari gu gɛ́ dↄ. Òsun ń gbɛ̃ke tóro. Akũ ò pìnɛ: Ǹ kɛ lákũ à kɛ̀nnɛ mana nà. Akũ sa'orii pì: À tó ò gbɛka Ludaa la gĩa. 37 Akũ Solu gbɛ̀ka Ludaa: Ò pɛ́tɛ Filisitininↄi, ĩni ń nawɛrɛ ó ↄĩ yá? Akũ adi wea zĩ birearo. 38 Akũ Solu pì: Ákↄ̃nↄ zĩ̀kari gbɛ̃ zↄ̃kↄ̃nↄ á pínki, à namai la, de ò le ò dↄ̃ durunna kũ ò kɛ̀ gbãra. 39 Kũ Dikiri Isarailanↄ Surabari tↄ́o, bee tó ma nɛ́ Yonatã mɛ́ à durunna kɛ̀, séde à ga. Akũ gbɛ̃ke dí lɛ́ síro. 40 Akũ à pìńnɛ: À zɛ kpado gwe, makũ kũ ma nɛ́o ónigↄ̃ kú kpado la. Akũ ò pìnɛ: Ǹ kɛ lákũ à kɛ̀nnɛ mana nà. 41 Solu pì Dikiri Isarailanↄ Ludanɛ: Ǹ tó ò yãpura dↄ̃. Akũ yã Yonatã kũ Soluoo blè, akũ baadi mìi bò bàn. 42 Solu pì: À gbɛ̀ la makũ kũ ma nɛ́o musu. Kũ yã Yonatã blè, 43 akũ Solu pìnɛ: Ǹ yã kũ n kɛ̀ omɛnɛ. Akũ Yonatã pìnɛ: Ma gò lɛ́ sↄ̃ntɛn ma zↄ̃̀ zↄ́a, fíti ma mↄ̀sↄ. Makũn dí! Mà ga. 44 Akũ Solu pì: Yonatã, tó ńdi garo, Luda yã kɛmɛnɛ pãsĩpãsĩ. 45 Akũ ò pì Solunɛ: Yonatã ga yá! Àkũ kũ à tò o zĩ̀i blè yá? Oi! Kũ Ludao ódi we kũ bee a mìkã mɛ̀n do à lɛ́tɛ zĩtɛro, zaakũ Luda kpányĩn à yã pìi kɛ̀o gbãra. Lɛn ò Yonatã mìi sì lɛ, adi garo. 46 Akũ Solu kámma bò kũ pɛtɛna Filisitininↄiio, akũ Filisitininↄ tà ń bùsun.

47 Kũ Solu vùtɛ Isarailanↄ kpatan à làka, à zĩ̀i kà kũ a ibɛrɛnↄ gu sĩnda pínkia: Mↄabunↄ kũ Amↄninↄ kũ Ɛdↄmunↄ kũ Zoba kínanↄ kũ Filisitininↄo. Kpa kũ à lìtɛn pínki, àdi zĩ̀ bleḿmamɛ. 48 A wↄ́rↄgↄkɛ tↄ́ bò à zĩ̀i blè Amalɛkinↄa, à Isarailanↄ sì ń wɛ́tãmmarinↄa. 49 Yonatã kũ Isibosɛo kũ Malakisuaoomɛ Solu nɛ́gↄ̃gbɛ̃nↄ ũ. À nɛ́nↄgbɛ̃nↄ vĩ gbɛ̃nↄn pla. A káaku tↄ́n Mɛraba, a plade Mikala. 50 A nanↄ tↄ́n Ainↄama, Aimaza nɛ́mɛ. A zĩ̀karinↄ gbɛ̃ zↄ̃kↄ̃ tↄ́n Abana. Solu pì dakũnamɛ, a disɛ̃ Nɛrɛ nɛ́mɛ. 51 Solu de Kisi kũ Abana de Nɛrɛoomɛ Abiɛli nɛ́nↄ ũ. 52 Solu gↄrↄ àdigↄ̃ pãsĩ kũ Filisitininↄo gↄrↄ sĩnda pínki. Tó Solu gↄ̃sa gbãna ke wↄ́rↄgↄde è, àdi a sí à na a zĩ̀karinↄa.