Luda yã takada kũ Bisã yão 1 SAMUƐLI 16

Samuɛli nísikuna Dauda mìia

1 Dikiri pì Samuɛlinɛ: Ĩnigↄ̃ ↄ́ↄ dↄ Solu yã musu ari bↄrɛmɛɛ? Ma ginɛ à kí ble Isarailanↄa. Ǹ nísi ká bɛ̃nɛn à pa ǹ da zɛ́n. Ma n zĩ Bɛtilihamu gbɛ̃ Yɛsɛ kĩnaa, zaakũ a nɛ́nↄ doken ma sɛ̀ à gↄ̃ kína ũ. 2 Akũ Samuɛli pì: Deran mani kɛ mà gɛ́ gwee? Tó Solu mà, ani ma dɛ. Akũ Dikiri pìnɛ: Ǹ zùnunu sɛ́ ǹ gɛ́o ǹ pi n su ma gbagbamɛ. 3 Ǹ Yɛsɛ sísi sa pì onaa gũn, mani yã kũ ĩni kɛ onnɛ, ĩni nísi kúmɛnɛ gbɛ̃ kũ mani mↄnnɛ mìia.

4 Samuɛli yã kũ Dikiri òarɛ kɛ̀. Kũ àtɛn ká Bɛtilihamu, lakutu pì gbɛ̃ zↄ̃kↄ̃nↄ gɛ̀ɛ ò dàalɛ. Vĩna ń kũ, akũ ò a là ò pì: Aafiaamɛ n su la yá? 5 À pì: Aafiaamɛ. Ma su Dikiri gbagbamɛ. À gbã̀ bo á zĩdanɛ à gɛ́ kũmao sa o. Akũ à gbã̀ bò Yɛsɛnɛ kũ a nɛ́gↄ̃gbɛ̃nↄ à ń sísi sa'onaaa. 6 Kũ ò kà, Samuɛli Ɛliabu è, akũ à laasun lɛ̀ à pì: Gbɛ̃ kũ Dikiri sɛ̀ mɛ́ à zɛna a arɛ gwe. 7 Akũ Dikiri pìnɛ: Ǹsun a zɛna ke a gbã̀nakɛ gwaro, ma giimɛ. Madì gbɛ̃ gwa lákũ bisãsiri dì gwa nàro. Bisãsiri dì gbɛ̃ gwa a mɛ̀ɛamɛ, makũ sↄ̃, swɛ̃̀ɛn madì gwa. 8 Akũ Yɛsɛ Abinadabu sìsi, à sù Samuɛli arɛ, akũ à pì: Dikiri dí gbɛ̃ díkĩna sɛ́ro. 9 Akũ Yɛsɛ Sama sìsi, à sù Samuɛli arɛ dↄ, akũ à pì: Dikiri dí gbɛ̃ díkĩna sɛ́ro. 10 Akũ Yɛsɛ a nɛ́gↄ̃gbɛ̃ gbɛ̃nↄn supplanↄ sìsi, ò sù Samuɛli arɛ, akũ à pì: Dikiri dí ń gbɛ̃ke sɛ́ro. 11 Akũ à Yɛsɛ là à pì: N kɛfɛnnanↄ lɛ́n dí ń pínki yá? À wèa à pì: Ń gbɛ̃ kpɛde mɛ́ à kú laro, àtɛn sã dãmɛ. Akũ Samuɛli pìnɛ: Ǹ gbɛ̃ zĩ ò a sísi. Óni pↄ́ke kɛro séto à sù. 12 Akũ à gbɛ̃ zĩ̀a, à sù. Nɛ́ pì bi gbɛ̃ tɛ̃ramɛ, a pɛtɛna mana akũsↄ̃ a ãn kɛ̃kↄ̃ana. Akũ Dikiri pì: Ǹ futɛ ǹ nísi kú a mìia, zaakũ àpiin gwe. 13 Akũ Samuɛli bɛ̃nɛ pìi sɛ̀ à nísi kù a mìia a vĩ̀ninↄ wára. Zaa zĩ birean Dikiri Nini sù Daudaa. Abire gbɛra Samuɛli ɛ̀ra à tà Rama.

Dauda zĩkɛna Solunɛ

14 Dikiri Nini gò Solua, akũ Dikiri tò tãna pãsĩ sùa. 15 A ìbanↄ pìnɛ: Luda tò tãna pãsĩ tɛn wɛ́ tãmma. 16 Kína, ǹ tó ókↄ̃nↄ n ìbanↄ ò gbɛ̃ kũ à mↄrↄlɛna dↄ̃ wɛtɛ. Tó Luda tò tãna pãsĩ pìi sùmma, anigↄ̃ mↄrↄ lɛ́nnɛ, ń le ǹ kɛ sã̀na. 17 Akũ à pì a ìbanↄnɛ. À gbɛ̃ kũ à mↄrↄlɛna dↄ̃ manamana wɛtɛ à su kãaomɛnɛ. 18 Akũ a ìbanↄ doke pìnɛ: Ma Bɛtilihamu gbɛ̃ Yɛsɛ nɛ́ ke è, à mↄrↄlɛna dↄ̃. Zĩ̀kari wↄ́rↄgↄdemɛ, akũsↄ̃ à yã'ona dↄ̃. Gↄ̃ manamɛ, akũsↄ̃ Dikiri kú kãao. 19 Akũ Solu gbɛ̃nↄ zĩ̀ Yɛsɛa, ò gɛ̀ɛ ò pìnɛ: Solu pì ǹ n nɛ́ Dauda kũ àdi sãnↄ dã gbarɛarɛ.

20 Akũ Yɛsɛ burodii dì zaakinɛ kũ sèwɛ̃o tùru do kũ blèkofĩninɛ bↄ̀rↄↄo, à a nɛ́ Dauda gbàrɛo Solua. 21 Kũ à kà Solu kĩnaa, à gↄ̃̀ a zĩkɛri ũ. Solu yei manamana, akũ à a dìtɛ a zĩ̀kapↄnↄsɛrinↄ doke ũ. 22 Akũ Solu gbɛ̃ zĩ̀ Yɛsɛa à pì: Ǹ tó Dauda gↄ̃ ma zĩkɛri ũ, zaakũ a yã dì kɛmɛnɛ nna. 23 Tó Luda tò tãna pìi sù Solua, akũ Dauda dì a mↄrↄ sɛ́ àgↄ̃ lɛ́nɛ. Tó tãna pìi gòa, akũ àdi kɛ sã̀na, à su a laakariia.