Luda yã takada kũ Bisã yão 1 SAMUƐLI 24

Dauda gina Solu dɛnaai gbɛ̀wɛɛn

1 Kũ Solu sù kũ pɛtɛna Filisitininↄiio, ò pìnɛ Dauda kú Ɛngɛdi gbárannan. 2 Akũ à Isaraila zĩ̀karinↄ sɛ̀tɛ gbɛ̃nↄn wàa gɛ̃ro à dà kũńwo zɛ́n, de ò Daudanↄ wɛtɛ gu kũ òdi pi Zↄ̃nↄ Gbɛ̀ɛa. 3 Kũ à kà sãnↄ kara kũ à kú zɛ́ sarɛ kĩnaa, à gbɛ̀wɛɛɛ è gwe, akũ à gɛ̃̀n à bĩnisarɛ kɛ. Dauda kũ a gbɛ̃nↄ sↄ̃, ò kú gbɛ̀wɛɛɛ pìn zaa a lɛ́zɛkia. 4 Akũ Dauda gbɛ̃nↄ pìnɛ: Ǹ gwa, a gↄrↄn gbãra kũ Dikiri pì áni n ibɛrɛ nannɛ n ↄĩ ǹ yã kɛnɛ lán ń yei nà. Akũ Dauda fùtɛ tɛɛnɛ, à Solu arukĩmba lɛ́ zↄ̃̀ a sarɛ. 5 A gbɛra Dauda laasun tɛn wari dↄa Solu uta lɛ́ kũ à zↄ̃̀ↄ pì yãi, 6 à pì a gbɛ̃nↄnɛ: Kai! Dikiri sún tó mà yã dí taka kɛ ma dikiri kũ à a kàanɛro. Mani ↄ kɛaro, zaakũ Dikiri mɛ́ à a kà kín.

7 Dauda kpãkɛ̃ a gbɛ̃nↄi kũ yã pìio, adi tó ò Solu dɛ̀ro. Kũ Solu bò gbɛ̀wɛɛn, àtɛn gɛ̃ zɛ́la, 8 akũ Dauda bò gbɛ̀wɛɛɛ pìn, à lɛ́ zùi à pì: Ma dikiri kína! Kũ Solu lìtɛ à a kpɛ gwà, akũ Dauda kùtɛ à wùtɛ a gbɛrɛa. 9 Akũ à pì Solunɛ: Tó ò pì ma yã vãni kpàkpa n musu, bↄ́ yã mɛ́ à tò ndì síi? 10 Ǹ gwa! N wɛ́ è gbãra lákũ Dikiri n namɛnɛ ma ↄĩ nà gbɛ̀wɛɛn. Ò pìmɛnɛ mà n dɛ, akũ ma n wɛ̃nda gwà, ma pì mani ↄ kɛ ma dikiriaro, zaakũ Dikiri mɛ́ à a kà kín. 11 Ǹ gwa dí Baa! Ǹ gwa, má n uta lɛ́ kũna dí! Ma n uta lɛ́ zↄ̃̀, ama mádi n dɛro. N dↄ̃̀ sà kũ má n kũna kũ nɛ̀sɛ vãnioro. Mádi taari kɛnnɛro, akũ ntɛni ma wɛtɛ ǹ ma dɛ. 12 Dikiri yã gↄ̃gↄ̃wɛrɛ à fĩna bommamɛnɛ, ama makũ mani ↄ nammaro. 13 Lákũ ò yáasi zù zaa zĩ nà ò pì, yã vãni dì bo yãvãnikɛrinↄ kĩnaamɛ, mani ↄ nammaro. 14 Mↄkↄ̃n Isarailanↄ kína, dí yãin n boo? Dín ntɛn pɛ́tɛii? Gbɛ̃da gɛ̀ɛn yá? Ke kↄ̀kↄ fítinna? 15 Dikiri ma yã gwa à yã gↄ̃gↄ̃wɛrɛ. À yã nna kpáma à zɛ kũmao à ma bo n ↄĩ.

16 Kũ Dauda yã dí ò Solunɛ à làka, Solu pì: Ma nɛ́ Dauda, n kòtoon gwe yá? Akũ Solu pũ̀tã kũ wikio 17 à pì Daudanɛ: N yã nna demala, zaakũ yã vãnin ma kɛ̀nnɛ, akũ n fĩna bòmɛnɛ kũ a manao. 18 N yã mana kũ n kɛ̀mɛnɛ ò tera. Kũ Dikiri ma nannɛ n ↄĩ, ńdi ma dɛro. 19 Tó gbɛ̃ bò a ibɛrɛɛa, àdi tó à tá aafia yá? Dikiri yã mana kũ n kɛ̀mɛnɛ gbãra fĩna bonnɛ. 20 Má dↄ̃ sà kũ ĩni gↄ̃ kína ũ, ĩnigↄ̃ kí ble Isarailanↄa. 21 Ǹ símɛnɛ kũ Dikiri tↄ́o, kũ ĩni ma buri kakatɛro, ĩni ma tↄ́ dɛ ma de bedenↄ tɛ́ro. 22 Akũ Dauda la dà Solunɛ. Kũ Solu tà bɛ, akũ Dauda kũ a gbɛ̃nↄ ɛ̀ra ò tà sɛ̃̀ntɛpↄrↄtu.