1 Yenibɑn biru, Yosɑfɑti u wurɑmɑ Yerusɑlɛmuɔ kɑ bɔri yɛndu. 2 Mɑ Yehu, Gusunɔn sɔmɔ Hɑnɑnin bii u nùn sennɔ dɑ. Mɑ u Yosɑfɑti sɔ̃ɔwɑ u nɛɛ, bɑ rɑ tɔn kɔ̃so somi? A be bɑ Gusunɔ tusɑ kĩ? Yenibɑn sɔ̃, Yinni Gusunɔ u kɑ nun mɔru sɑ̃ɑ. 3 Adɑmɑ u gɑ̃ɑ geenu wɑ ni ɑ kuɑ. Yerɑ ɑ bũu wi bɑ mɔ̀ Asitɑɑten bwɑ̃ɑrokunu kpuro kɔsukɑ mɑm mɑm tem mɛ kpuro sɔɔ. Mɑ ɑ wunɛn tii wɛ̃ ɑ kɑ wi, Yinni Gusunɔ kɑsu.

4 Yen biru Yosɑfɑti u mɑɑ sinɑ Yerusɑlɛmuɔ. Mɑ u win tɔmbu berɑ sɑɑ Beri Sebɑn di n kɑ dɑ Efɑrɑimun guunɔ. Mɑ u ben gɔ̃rusu wesiɑ Gusunɔ ben bɑɑbɑbɑn Yinnin mi. 5 Mɑ u siri kowobu yi Yudɑn wuu gbɑ̃rɑruguu bɑɑgere sɔɔ. 6 Mɑ u siri kowo be sɔ̃ɔwɑ u nɛɛ, i de i n tii sɛ ye i sirimɔ sɔɔ. Domi n ǹ tɔmbun sɔ̃ i siribu mɔ̀. Yinni Gusunɔn sɔ̃nɑ i sirimɔ. U ko n mɑɑ wɑ̃ɑ bɛɛn bɔkuɔ. 7 Yen sɔ̃, i de i nùn nɑsiɑ kpɑ i n tii sɛ. Domi Yinni Gusunɔn mi, weesu sɑri. U ku rɑ mɑɑ goo gɑrisi tuko. Mɛyɑ u ku rɑ mɑɑ nɔm birɑm kɛ̃nu mwɛ.

8 Sɑnɑm mɛ bɑ wurɑmɑ Yerusɑlɛmuɔ, Yosɑfɑti u Lefibɑ kɑ yɑ̃ku kowobu yi, kɑ sere mɑɑ Isirelibɑn guro gurobu, bu kɑ tɔmbu siriɑ bɑ̀ n gɑri gɛɛ mɔ. 9-10 Wee woodɑ ye u bu wɛ̃. U nɛɛ, goo ù n kɑ siribu nɑ bɛɛn mi sɑɑ wuu gɑgun di yèn sɔ̃ bɑ goo go, ǹ kun mɛ goo u woodɑ sɑrɑ, ǹ kun mɛ u Yinni Gusunɔn yiirebu gɑbu yinɑ, i ko i nùn siriɑwɑ dee dee Gusunɔn nɑsiɑru sɔɔ, kɑ murɑfitiru sɑriru sɔɔ, kɑ gɔ̃ru dɛɛrɔ. I de i bu swɑɑ geɑ sɔ̃ɔsi kpɑ bu ku rɑɑ Yinni Gusunɔ torɑri kpɑ u ku bɛɛ kɑ bɛɛgibu mɔru ko. Nge mɛyɑ i ko i n dɑ kɑ bu sirie kpɑ i ku kɑ tɑɑrɛ wɑ. 11 Wee yɑ̃ku kowo tɔnwero Amɑriɑ u ko n sɑ̃ɑ wirugii sɑ̃ɑrun swɑɑ sɔɔ, kpɑ Sebɑdiɑ, Isimɛɛlin bii Yudɑbɑn yɛnu yɛ̃ro u n sɑ̃ɑ wi u rɑ sinɑ bokon yɛnun wunɑnɔsu ko, kpɑ Lefibɑ bɑ n mɑɑ sɑ̃ɑ siri kowobu. Yen sɔ̃, i tii dɑm kɛ̃ɛyɔ kpɑ i se i sɔmɑ ko, kpɑ Yinni Gusunɔ u n wɑ̃ɑ kɑ wi u koo geɑ ko.